Leqataki na Nodra Bula!

¹ E tukuna vakamatata na iVolatabu ni loma i Jiova “me bula na tamata kecega.” Ia, e dina tale ga ni nodra bula e vica vata na bilioni e vuravura ena vakatau ena nodra rai me baleti Jiova na Kalou kei na nona Matanitu ena vuku i Jisu Karisito. Na rai dodonu ena yavutaki wale ga ni dua e “kila . . . nai vakavuvuli dina.” (1 Tim. 2:3, 4) Nida tukuna tiko ni sa voleka ni vakasavasavataki na vuravura ena kena vakarusai laivi na ituvaki ca me rawa ni vakarautaka na Kalou na vuravura vou ni yalododonu, eda sa vakacolati tale tiko ga ena cakacaka bibi ni veivakabulai.​—Maciu 24:14; 28:19, 20; Roma 10:13-15.

² Na Cava me Vakatotolotaki Kina? E veivakasalataki o Jisu ni na “levu sara na rarawa, ka sega ni vakakina eliu mai nai vakatekivu kei vuravura.” (Maciu 24:21) Na rarawa oya ena qai tini ena Amaketoni. (Vkta. 16:16) E dua na iwiliwili vakaitamera era na vakarusai ke ra bese ni rogoca na itukutuku vinaka, wili kina o ira na wekada tawavakabauta, ira eda tiko veitikivi, ira eda cakacaka vata, eda vuli vata, kei ira tale ga eda veikilai. Eda kauaitaka gona meda tarai ira na “tamata kecega” ena noda vakatotomuria na Kalou ena nona vakaraitaka na nona lomana na kawatamata kece mani solia kina na Luvena, o Jisu Karisito, me keda ivoli. (Joni 3:16) E dodonu meda saga vagumatua meda sureti ira kece mera dro ina vanua ena veitaqomaki kina na Kalou. Nida vakayacora vinaka na cakacaka vakavunau, eda sa na galala kina mai na nodra dra.​—Isik. 33:1-7; 1 Kor. 9:16.

³ Na Cava na Noda iNaki? Na bibi ni cakacaka vakavunau e vakabibitaki ena loma kece ni Vosa ni Kalou. Me vaka e vakamacalataka na yapositolo o Paula, ‘sa rawai keda sara na loloma i Karisito’ meda bula me salavata kei na ivalavala ni Kalou. (2 Kor. 5:14) Na Vale ni Vakatawa tale ga e vakabibitaka na noda itavi meda dau cakacaka vakavunau. Na Noda Cakacaka Vakaitalatala ni Matanitu e dusimaki keda e veigauna ena iwalewale ni cakacaka vakavunau meda cakava. Era tuvana na cakacaka na qase ra qai uqeti keda meda vakaitavi kina. O ira noda itokani dautukutuku era dau sureti keda meda cakacaka vata kei ira ena cakacaka vakaitalatala. Eda sa dau rogoca wasoma ni vinakati meda vakarautaka na noda iwalewale ni vosa, na soli ni ivoladraudrau kei na ivola tale e so, na veisikovi lesu, na caka vuli iVolatabu, da qai vakayagataka na gauna kece eda rawata meda vunau kina. Na veika kece oqo ena vukei keda me rawati kina na noda inaki, oya meda veivakabulai.​—1 Kor. 9:22, 23; Efeso 1:13.