Vakatakila na Yaca i Jiova kei na Nona Cakacaka

¹ “Dou ia na vakamolimoli vei Jiova; dou masuta na yacana: dou tukuna voli vei ira na tamata na nona cakacaka. . . . Me marau na lomadra era sa qaravi Jiova.” (Same 105:1, 3) Na daunisame e vola na vosa oqo e marau ni tukuni Jiova kei na nona “cakacaka” vei ira na tani. Na cakacaka cava? Sega ni vakabekataki ni cakacaka e vauca na nona veiliutaki lagilagi na Kalou kei na kena ‘tukuni voli ni sa dauia na veivakabulai o koya.’​—Same 96:2, 3; 145:11, NW, 12.

² Ni roro mai na vula ni iVakananumi ni yabaki 2001, eda marautaka na levu ni cakacaka vinaka e cakava vei keda o Jiova. Ena sala cava? Na iVakayakavi ni Turaga, e sega ni vakabekataki ni soqo bibi duadua vei ira kece na lotu Vakarisito dina. Sega tale ni dua na soqo me tautauvata kaya, ena kena bibi, kena inaki, se na kena icakacaka. E gauna meda vakananuma kina na ka erau cakava o Jiova kei Jisu meda bula kina. Sa rauta me dau guti vakalevu na cakacaka vakavunau ena vula ni iVakananumi, ena noda ‘tukuna voli na veivakabulai’!

³ O na Painia Veivuke Kina? Ena Epereli ni yabaki sa oti, eda vakayaloqaqataki dina ena levu ni painia veivuke. E Viti era le 306, 20 mai Kiribati, 11 mai Tuvalu. E rawa beka nida painia ena vula o Maji kei na Epereli ni yabaki oqo, meda vakalevutaka kina na noda cakacaka vakaitalatala? E lima na siga Vakarauwai ena Maji, qai lima na Sigatabu ena Epereli. Ni tuvanaki meda cakacaka vakavunau ena siga taucoko ni muanimacawa, era raica e levu na dautukutuku era cakacaka saumi nira rawa ni painia veivuke ena rua na vula oya. Me rawata nona iokaoka ni 50 na aua e dua na painia veivuke ena dua na vula, ena vinakati me cakacakataka e 12 na aua dua na macawa. Vakasamataka vinaka na ituvatuva e volai tiko ena kato ena taqana 4. E ganiti iko beka e dua vei iratou? Ke sega, cakava ga na nomu ituvatuva o kila ni na rawa mo painia veivuke kina ena Maji kei na Epereli.

⁴ Mera tekivu veivakauqeti ena gauna oqo na qase ra qai veitokoni me rawa nira na vakalevutaka kina e levu na nodra cakacaka vakavunau. Eratou a painia veivuke kece na qase kei iratou na dauveiqaravi vakaitalatala ena dua na ivavakoso ena Epereli ni yabaki sa oti, e lai uqeti ira kina e le 64 vei ira na 121 na dautukutuku mera painia tale ga! E marautaka tale ga na ivavakoso oqo ni ratou le ono na dautukutuku bera ni papitaiso ena Maji kei na Epereli. E gauna vinaka vei ira na gone kei ira na ka vou mera raici iratou na qase se sa ganiti ira mera tekivu vakaitavi ena cakacaka vakavunau e matanalevu.

⁵ Vakalougatataki na Gugumatua: O ira na ivavakoso era tuvanaka e so na isausau lavotaki ra qai saga vagumatua mera sauva, era na marautaka e levu sara na veivakalougatataki. E so na ivavakoso era na rairai tuvanaka mera na cakacakataka na nodra yalava e dau tarai vakavudua, e so tale beka era na tuvanaka ni sega nira na lako ga e veivale ia era na vakabibitaka na iwalewale ni vunau tale e so, me vaka na vunau ena talevoni​—⁠e sala vinaka ni nodra tarai na sega ni dau tiko e vale ena gauna ni vunau kei ira e dredre na vanua era tiko kina.

⁶ Me lai tarova beka e dua na nona tautauvimate kei na ituvaki qase me kua kina ni vakaitavi vakalevu ena cakacaka vakavunau? Sega. Me kena ivakaraitaki, e dua na tacida yalewa yabaki 86 e tauvi kenisa e painia veivuke ga ena Epereli ni yabaki sa oti dina ga ni vuvuce tu na yavana ruarua. E vakarawarawataka na nona cakacaka na nona dau vunau ena talevoni, vakavuna me vakalevutaka kina na nona vakacaucautaki Jiova. E vakabulabulataki koya, vaka kina o ira ena ivavakoso.

⁷ Vakavakarau Vinaka ina iVakananumi: Ena caka tiko na iVakananumi ni yabaki oqo ena 8 Epereli. Me vaka ni Sigatabu tiko na siga oya, ena rawarawa sara mera tiko kina e le levu. Kena irairai ni na levu sara ga na iwiliwili ke da cakava oqo (1) meda tiko sara ga kina o keda da qai (2) sureti ira tale e so mera mai tomani keda ena iVakananumi. O cei meda sureta?

⁸ Raica na yacadra na tataleitaki ena nomu house to house record, dina ga ni o sega soti ni dau lesuvi ira vakawasoma. Ni vo e rua se tolu na macawa ina iVakananumi, saga mo sikovi ira kece oqo qai solia vei ira na ivola ni veisureti ni iVakananumi. Ke tiko nomu motoka, de rawa ni o na lai kauti ira mai na via tiko kina.

⁹ Ena so na ivavakoso, e sega ni dau veisoliyaki kece kina na ivola ni veisureti ni iVakananumi. Mera qarauna na vunivola ni ivavakoso mera solia taudonu toka na ivola ni veisureti me rawa ni veisoliyaki kece ni se vo levu na gauna. O rawa ni taipataka se vola toka vakamaqosa na gauna kei na vanua ena vakayacori kina na iVakananumi ena boto ni ivola ni veisureti. Se o rawa ni solia vata kei na tikidua e vakamacalataki kina na vanua e tiko kina na Kingdom Hall, ke caka e kea na iVakananumi ni nomudou ivavakoso. Kua ni guilecava, mo solia sara ga o iko na ivola ni veisureti vua na itaukeinivale.

¹⁰ Nanumi Ira na Dautukutuku Mate: E dau vakavumarau ni yalataki koya vei Jiova qai papitaiso e dua na vuli iVolatabu. Ia ena veiyabaki, e so vei ira na tacida sa ra sega ni veimaliwai kei keda, ra sega tale ga ni vunautaki Jiova kei na nona cakacaka. E dodonu meda kauaitaki ira era tu ena ituvaki oqo. E dina ni levu na dautukutuku mate era sega ni biuta na ka dina, ia era sa sega tu ga ni lako ena cakacaka vakavunau nira yalolailai, e tiko nodra leqa vakataki ira, se so tale na ka. (Maciu 13:20-​22) O ira era malumalumu tu vakayalo ena gadrevi mera vukei, mera lesu tale mai ena ivavakoso ni bera ni qai tilomi ira na ituvaki i Setani. (1 Pita 5:⁠8) Ena vula ni iVakananumi ni yabaki oqo, meda saga sara ga meda vukei ira na dautukutuku mate era se yacova na kena ivakatagedegede mera vunautaka tale na itukutuku vinaka.

¹¹ Na vunivola ni ivavakoso me tukuna vei ira na qasenivuli ni vulivola ke dua ena nodra iwasewase lailai e mate tu vakayalo. Me ratou liutaka na Komiti ni Cakacaka ni iVavakoso na kena tuvanaki na veivakatawani vei ira na dautukutuku mate. Ke vinakati vua e dua na dautukutuku mate me vulica tale na iVolatabu, ena tuvanaka na ivakatawa ni cakacaka na veivukei oqo, ni veivosaki oti kei iratou na vo ni lewe ni komiti ni cakacaka se o cei e ganita vinaka me veivakavulici. Dina ga ni na sega ni balavu sara na gauna ni vuli, ia sa rawa ni ripotetaka o qasenivuli na gauna, veisikovi lesu, kei na vuli iVolatabu.

¹² E dua na tacida yalewa a vunau voli ena salatu ena Epereli ni yabaki sa oti mani solia e so na ivoladraudrau vua e dua na cauravou. E kaya vua na tacida na cauravou oqo ni o watina e dua na iVakadinadina ia sa sega tu ni lotu. E taroga na vanua e tiko kina na Kingdom Hall qai sureti tacida me sikovi rau yani vakaveiwatini. Rau mani tiko ena soqoni e tarava na veiwatini oqo, rau vakadonuya tale ga me rau vuli iVolatabu.

¹³ Tu Vakarau mo Vakalevutaka Nomu Cakacaka! E tomana na daunisame ni sa tukuna oti meda vakatakila na yaca i Jiova kei na nona cakacaka: “Dou sere vua, dou seretaka vua na same: dou veitukutukunitaka na nona cakacaka mana kecega. Dou vakacaucautaka na yacana tabu.” (Same 105:2, 3) Meda vakaraitaka mada ga na noda kauaitaka na yaca tabu i Jiova kei na nona “cakacaka mana” ena noda saga vagumatua meda vakalevutaka na noda cakacaka vakaitalatala me yaco kina na vula ni iVakananumi oqo me kena e vinaka duadua!

[Kato ena tabana e 4]

So na iTuvatuva Ena Rawati Kina e 12 na Aua Ena Dua na Macawa Mo Painia Veivuke Rawa Kina

Siga Aua

Moniti 1 2 − −

Tusiti 1 − 3 −

Vukelulu 1 2 − 5

Lotulevu 1 − 3 −

Vakaraubuka 1 2 − −

Vakarauwai 5 4 3 5

Sigatabu 2 2 3 2

iSoqoni: 12 12 12 12

Ena rawa beka ni o muria e dua na ituvatuva oqo? Ke sega, vakacava mo cakava ga na nomu ituvatuva?