Kato ni Taro

◼ Gauna cava sa rawa ni tauyavu kina e dua na iwasewase lailai ni Vulivola ni iVavakoso?

Me vakasamataki vinaka na tauyavutaki ni dua na iwasewase lailai vou ena gauna e gadrevi kina, me rauta na le 15 se lailai sobu na iwiliwili ena vale e caka kina na vulivola, vaka kina na kena e caka ena Kingdom Hall. Na cava e vakaturi kina oqo?

Ni lailai ga na lewe ni Vulivola ni iVavakoso, ena rawarawa kina vei qasenivuli me vukei ira yadua na dau tiko kina. Kuria oya, e gauna vinaka tale ga mera vakamacala kina, ni oya e dua na ituvaki e vakarawarawataka na nodra tusanaka nodra vakabauta e matanalevu. (Iper. 10:23; 13:15) Ni levu na iwasewase lalai ena yalava ni ivavakoso, ena vakarawarawataka na noda tiko ena Vulivola ni iVavakoso kei na soqoni ni vunau. O ira na ivavakoso e tubu na iwiliwili ni nodra iwasewase lalai era raica ni kumuni vata na iwiliwili, sa tubu tale ga kina na kedra levu na dau tiko ena vulivola.

Rairai tiko e so na ituvaki ena gadrevi kina me tauyavu e dua tale na iwasewase lailai, dina ga nira na via le lailai. Ena rairai yaga oqo ena vanua ribayawa, se sa oso qai sega ni veirauti na idabedabe ena vanua e caka tiko kina na vulivola ena gauna oqo. Ke gadrevi, sa rawa ni tauyavu e dua na iwasewase lailai, ia me caka na vulivola ena siga baleti ira na sa qase, o ira na yadra bogi, se o ira na tacida yalewa e sega ni tiko na watidra ena dina.

Na iwasewase ni vulivola yadua me vica toka na kena dautukutuku kaukaua vakayalo ra qai toso vinaka, vaka kina na kena qasenivuli kei koya e wiliwili. Mera saga ni sauva na isausau oqo o ira na tacida tagane ena ivavakoso.

Era rawa ni veiuqeti na qase ena toso ni ivavakoso ena nodra raica na iwasewase lalai ni vulivola ni ivavakoso me rauta vinaka ga na lewena, ra qai taqomaki vinaka vakayalo, mera soqoni tale ga ena vanua veiganiti. Se gauna cava ga e ganita, me tauyavutaki na iwasewase vou me rawa nira vakayagataka kece na yaga ni ituvatuva vakayalo oqo. O rawa ni solia nomu vale me caka kina na vulivola? O ira na dau solia nodra vale era vakila nira vakalougatataki kina vakayalo.