O Rawa ni Solia Nomu Vale?
1 Levu na lotu Vakarisito ena imatai ni senitiuri era solia nodra vale me caka kina na soqoni. (1 Kor. 16:19; Kolo. 4:15; Fmon. 1, 2) Ena so na ivavakoso nikua, e sega ni veirauti na vale me caka kina na Vulivola ni iVavakoso, me vanua ni sota tale ga ena cakacaka vakavunau. Lai tini kina mera le 30 se levu cake na lewe ni so na vulivola, ia oqo e sa sivia tale na iwiliwili gadrevi, rauta ni 15.
2 Dua na Ka Dokai: O sa bau vakasamataka mo solia nomu vale me caka kina na Vulivola ni iVavakoso? E yaga sara ke tiko na rumu savasava e veirauti vinaka na kena levu, rarama qai cagicagi vinaka. Dua dina na ka dokai ke da solia noda vale me caka kina na vulivola, ni oqori e tiki ni soqoni vakaivavakoso e vakayagataka tiko o Jiova mera tuberi kina nona tamata. Era vakadinadinataka e levu nira raica na kena yaga vakayalo vei ira nira solia nodra vale me vakayagataki ena inaki oqo.
3 Ke o nanuma ni veiganiti nomu vale, tukuna vei iratou na qase. De dua eratou vaqaqara tiko. Ia ke sega ni rawa ni caka e nomu vale na vulivola, vakacava ga na sota me baleta na cakacaka vakavunau? Kevaka mada ga e sega ni gadrevi sara ena gauna oqo e dua na vale, ena yaga ke ratou kila rawa tu na qase ni o solia nomu vale. Dua na siga, sa na qai vakayagataki ena inaki dokai oqori na nomu itikotiko.
4 iTovo Vinaka: O keda kece na soqo yani ena vale vakaitaukei e dodonu meda doka na itikotiko oqori. Mera qarauni ira na gone na itubutubu mera kua ni curuma vakaveitalia na vale, ia mera toka ga ena vanua e caka kina na vuli. Meda dau veinanumi tale ga vei ira na tiko tikiva na vale ni vulivola, meda kua kina ni veivakasosani.—2 Kor. 6:3, 4; 1 Pita 2:12.
5 E uqeti keda na Iperiu 13:16 meda “kakua talega ni guilecava na caka vinaka kei na dausoli ka: ni sa vinakata sara na Kalou nai madrali vakaoqo.” Dua na sala uasivi mo vota kina na veika vinaka vei ira tale e so kei na nomu “dokai Jiova e na nomui yau” oya nomu solia nomu vale me caka kina na soqoni ni ivavakoso.—Vkai. 3:9.