Tatamusuki Vakalevu
1 O ira na parofita makawa i Jiova, vaka kina o Jisu Karisito era cavuta kece e dua na cakacaka ni veivakasoqonitaki. (Aisea 56:8; Isik. 34:11; Joni 10:16) Sa vakayacori sara tiko ga oqo na cakacaka oya ena kena vunautaki tiko na itukutuku vinaka ni Matanitu ni Kalou e vuravura raraba. (Maciu 24:14) E laurai levu ni duatani o koya e qarava na Kalou, e duatani o koya e sega ni qaravi koya. (Mala. 3:18) Na cava e kena ibalebale oqo vei keda?
2 Noda iColacola Yadua: Eda rawa ni vuli ena ivakaraitaki i Paula, ni a liutaka sara ga na cakacaka vakaitalatala vakarisito. E kila ni nona itavi me vunau mera rogoca na tamata kece na itukutuku vinaka mera na bula kina. Na ka oqo e uqeti koya me oga voli kina ena vukudra. (Roma 1:14-17, VV) Nida vakasamataka na ituvaki dredre sa sotava tu na kawatamata edaidai, sega li nida vakacolati meda vunau vakalevu vei ira ena noda yalava?—1 Kor. 9:16.
3 Sega ni Gauna ni Lokuyara: Na cakacaka vakavunau e rawa ni vakatauvatani kei na cakacaka ni nodra dau vakasaqarai na yali. Dodonu mera kune ra qai vukei ni bera ni yaco na leqa. Me vakatotolotaki. Ni leqataki sara ga na nodra bula! Sa rauta bagi me uqeti iratou nona tisaipeli o Jisu me ratou “masuti koya kina na i Taukei ni were, me talai ira yani na tamata cakacaka me ra la’ki tatamusuki e na nona were.”—Maciu 9:38, VV.
4 Nira kila ni sega ni gauna ni lokuyara oqo, levu gona na dautukutuku ni Matanitu ni Kalou era sa qai vakaitavitaki ira ga vakalevu ena cakacaka ni veivakabulai oqo. E lako mai ena dua na vuvale itubutubu le dua e dua na itabagone o Hirohisa, qai va na tacina. E qarava na nona vuvale ena nona dau yadra ena tolu na kaloko e veimataka me kau niusipepa wavoki ena vanua e vinakati kina. Ia, e vinakata ga o Hirohisa me vakalevutaka na nona cakacaka vakaitalatala, mani tekivu painia tudei. E tiko beka e so na sala o rawa ni vakaitavi kina vakalevu ena cakacaka sega ni tokaruataki tale oqo?
5 “Sa vakalekalekataki na gauna sa vo.” (1 Kor. 7:29) O koya gona, meda cakava kece mada ga na ka eda rawata ena cakacaka bibi duadua sa vakayacori tiko edaidai ena vuravura raraba—na vunautaki ni itukutuku vinaka ni Matanitu ni Kalou kei na nodra vukei na lewenivanua mera mai tisaipeli. E vakatauvatana o Jisu na cakacaka oqo kei na tatamusuki. (Maciu 9:35-38, VV) Nida tatamusuki vakalevu, na vua ni noda oga ena rairai okati kina na noda vukea e dua me mai lewe ni isoqosoqo levu e vakamacalataki ena Vakatakila 7:9, 10.