“Na Gauna Cava me Caka Kina?”
1 Oqo na ka eda dau kudruvaka ena levu ni ka e tu meda cakava. E tukuni ni gauna e ka bibi duadua mai na veika yaga kece eda taukena, e dina ni lekaleka wale. O koya gona, na gauna cava meda cakava kina na veika e uasivi sara, me vaka na kena wiliki kei na vulici ni Vosa ni Kalou?—Fpai. 1:10, VV.
2 Ni sega ni rawa ni vakabalavutaki o gauna, e kena ibalebale ni ka bibi na kena lewai vinaka na ka me caka ena gauna e tu vei keda. E 168 taucoko na aua ena dua na macawa, mai na iwiliwili kece oqo e 100 na aua eda vakayagataka meda moce ka cakacaka kina. Meda vakayagataka vinaka vakacava na vo ni gauna? E vakatututaki ena Efeso 5:15-17 meda ‘vakataki ira na vuku, meda volia me noda na gauna, meda kila na loma ni Turaga.’ E laurai e ke ni na vinakati meda vakayagataka na gauna veiganiti kece meda cakava kina na ka e kaya o Jiova ni bibi.
3 E vakatauvatana o Jisu na noda gauna kei na gauna i Noa. (Luke 17:26, 27) Era osooso na tamata ena gauna oya ena ogaoga ni veisiga. Ia, a tuvanaka o Noa na gauna me taya kina na waqa vakaitamera qai vunau tale ga. (Iper. 11:7; 2 Pita 2:5) A rawata vakacava oya? Ena nona vakaliuca na loma ni Kalou, a “cakava vakakina” ena nona talairawarawa.—Vkte. 6:22.
4 Na Cava me Vakaliuci? E kaya o Jisu: “Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.” (Maciu 4:4) E veimacawa e takivaki mai na ‘keda ivotavota [vakayalo] ena kena gauna dodonu.’ (Luke 12:42) Ena vinakati e ke e dua na ituvatuva ni wilivola kei na vuli vakawasoma me rawa nida vakayagataka kina na veika oqori, me yaga vinaka vei keda. Nida ciqoma ena marau na kakana vakayalo oqo eda na sega ni raica me vaka na kakana mamada eda dau kania vakusakusa. Kena veibasai ga, nida vakavinavinakataka na isolisoli vakayalo oqo eda na wasea na gauna meda vulica, da qai vakasamataka.
5 Nida kania na kakana vakayalo e rawa nida bula tawamudu kina. (Joni 17:3) E dodonu me vakaliuci ena noda ituvatuva ni veisiga. E rawa beka ni tiko na gauna meda wilika kina e veisiga na iVolatabu, da qai vakavakarau ina soqoni vakarisito? Io, e rawa. Ena qai “levu na kenai sau” vei keda, ni sega nida kila wale ga, ia eda cakava na loma ni Kalou.—Same 19:7-11.