Doka na iSolisoli ni Kalou
1 Ni sa vakarautaka tiko o Tui Josaia na vakavinakataki ni valenisoro, sa qai kaya oqo ena nona vakacaucautaki ira na lesi mera cakacaka kina: “Ia ka sa sega ni wili nai lavo sa soli kivei ira, ni ra sa tamata daucaka vakayalododonu [se, “tamata yalodina,” NW].” (2 Tui 22:3-7, neitou na matanivola kala.) Na levu ni nodra doka na veika tabu o ira na tagane oya e laurai ena ivalavala era qarava kina na veika a nuitaki vei ira. Nida colata tiko nikua na cakacaka tabu me baleta na itukutuku vinaka ni Kalou, e gadrevi tale ga meda yalodina ena ivalavala eda vakayagataka kina na isolisoli e so e vakarautaki mai.
2 Ena Cakacaka Vakavunau: Ke da doka na itukutuku bibi era tabaki tu ena noda ivola, da liaca tale ga na ilavo levu e vakayagataki ena kena tabaki, eda na vakamareqeta na noda ivola. Meda kua gona ni solia wale tu ga vei ira era sega dina ni taleitaka na itukutuku ni iVolatabu. Ke dua e sega ni kauaitaka soti na itukutuku vinaka, de vinaka me soli ga vei koya na ivolacebaceba.
3 Nida vakamareqeta na noda ivola, eda na lewa vinaka na noda veisoliyaka. Eda na sega ni biuta wale tu vakaveitalia ena vanua era lakovi vakalevu. Meda wilika vinaka na kena levu e tu vei keda mai vale ni se bera nida kerea e so tale, de ra na mamau wale. Ke o raica ni dau vo vakalevu na ivoladraudrau o sa kerea tiko, vakacava mo vakalailaitaka?
4 iVola Eda Kerea me Noda: Meda kerea ga na ivola eda na vakayagataka dina. Me kua ni kerei vakaveitalia na iVolatabu waqa malumu (deluxe), na Reference Bible, kei na so tale na ivola lelevu vaka oya, me vaka na Concordance, Index, Insight, kei na ivola na Proclaimers. Dua na ilavo levu e vakayagataki mera tabaki kina.
5 O dau nanuma mo vola na yacamu kei na nomu itikotiko ena nomu ivola? Ke o cakava oqori, o na sega ni vaqara tiko ga e veigauna na kedra isosomi nira sa yali. Ke yali na nomu ivolanisere, iVolatabu, se ivola me vulici, de dua o na kunea oqori ena ibinibini ivola era dau laurai mai na Kingdom Hall se vanua e caka kina na soqo ni tabacakacaka kei na soqo ni tikina.—Luke 15:8, 9.
6 Meda vakayagataka vakayalomatua na noda ivola. Oqori e dua na sala eda na vakaraitaka kina nida yalodina tiko ena kena vakayagataki vinaka na isolisoli i Jiova me baleta na nona Matanitu.—Luke 16:10.