Vakavulici Ira na Tani ena Vosa Savasava
1 Era cavutu na iVakadinadina i Jiova ‘mai na veivanua kece, veimataqali, veimatanitu, kei na duivosavosa,’ ia era duavata vakaidina na mataveitacini oqo e vuravura raraba. (Vkta. 7:9) E vakasakiti dina, vakabibi ni talawasewase tu o vuravura. E rawati gona vakacava? Ena noda ‘vukici meda mai vosa savasava.’—Sefa. 3:9.
2 Vakatubuqoroqoro na Kena Yaga: Na cava sara mada na vosa savasava oqo? Na kilai ni ka dina ena Vosa ni Kalou me baleti Jiova kei na nona inaki, vakauasivi na ka dina me baleta na Matanitu ni Kalou. Me salavata kei na ka sa tukuna oti tu o Jisu, na idewadewa ena takivaka mai na ka dina oqo e vuravura “na dauveiqaravi yalo dina ka vuku,” me rawa kina vei ira na “duivosavosa mai na veivanua kecega” mera ciqoma na sokalou dina.—Maciu 24:45, VV; Saka. 8:23.
3 Ni vulici na vosa savasava oqo, e uqeti ira na vulica mera moica na nodra bula me lako vata kei na ivakatagedegede i Jiova. Era vulica kina mera ‘duavata ena vakasama kei na lewa.’ (1 Kor. 1:10, VV) Na ivakavuvuli vakalou oqo e rawa ni vakadodonutaka na noda ivalavala, na ka kece meda tukuna me dina, me savasava, qai vauci tale ga e ke na noda tukuna vei ira na tani na itukutuku vinaka. (Taito 2:7, 8, VV; Iper. 13:15) Na veiveisau totoka vaka oqo e lagiti kina o Jiova.
4 Kena ivakaraitaki, a vunau e dua na dautukutuku vua e dua na turaga e levu sara na ka a taroga, ia a sauma vakavinaka kece mai na iVolatabu na tacida oya. A uqeti koya na turaga oya na ivakamacala a rogoca, mani tekivu vuli vakarua e veimacawa, sa tiko sara ena soqoni. Tarai koya tale ga na veikauaitaki a vakaraitaki vua ena Kingdom Hall, vakalevu ni vuqa vei ira na lewenisoqoni era sega ni kaivata kei koya. Ena loma ni dua ga na gauna lekaleka, erau sa veisautaka kei na nona lewenivale na nodrau bula, rau papitaiso sara. Me tekivu mai na gauna oya, sa vukei ira rawa e rauta ni lewe 40 mera qaravi Jiova, okati kina e vica vata na wekana. Dina ni leqa tu na ituvaki ni yagona, ia wale tiko ga oqo sa tekivu cakacaka vakapainia.
5 Vakavulici Ira na Tani: E vakavure vakasama vei ira e vuqa na tamata lomadina na veika lelevu sa yaco tu e vuravura nikua. Meda vakadamurimuri Jisu gona ena noda via vukei ira. Ia na sala levu duadua e rawa nida vukei ira kina na tamata lomadina vaka oqo, na noda cakava vinaka na veisikovi lesu kei na vuli iVolatabu, mera vulica kina na vosa savasava.
6 E dua na iwalewale e yaga sara tiko vei ira na itaukeinivale osooso, oya meda vuli iVolatabu vakalekaleka kei ira ena mata sara ga ni nodra vale. (km-FN 5/02 t. 1) O sa bau tovolea mada? Ni o vakavakarau mo veisikovi lesu, digitaka mai na itoma ni Noda Cakacaka Vakaitalatala, Janueri 2002, e dua na iwalewale ni vunau ena ganiti itaukeinivale. E vuqa na iucu ena itoma oqo e yavutaki tu ena vakasama me vakarawarawataka na noda na vakamua na veivosaki kei itaukeinivale ina brochure na Loma ni Kalou se ivola na Kila. Totoka sara ke o vakatovotovotaka rawa, me na veisemati vinaka kina na nomu iucu kei na parakaravu o na vakayagataka. Digitaka e dua se rua na tikinivolatabu mai na parakaravu mo drau wilika, drau veivosakitaka, qai vakarautaka rawa tu e dua na taro mo na taroga me na tinia toka na nomudrau veivosaki. O rawa ni na qai vakayagataka na taro oya mo dolava kina na nomudrau veivosaki ena parakaravu o nakita mo drau na tara ena nomu veisikovi lesu tale e tarava.
7 Era vakila na tamata i Jiova e levu na veivakalougatataki ena nodra mai vulica na vosa savasava. Meda gumatuataka mada ga na noda vukei ira na tani mera mai tomani keda “me ra masu[ta] . . . na yaca i Jiova,” meda mai “qaravi koya e na lomavata.”—Sefa. 3:9.