Na Vidio ena Dolava na Matada Qai Uqeti Keda!

Epereli 1951. Na yabaki era a vakasasataki kina vakavuvale e vica vata na udolu na iVakadinadina i Jiova ena matanitu makawa na Soviet Union, ra qai vakavodoki vakaukaua ena sitimanivanua dau usa kako mera kau vakavesu i Siberia. Na cava a saga kina ena nona igu na matanitu kaukaua ni Rusia me vakawabokotaki ira na iVakadinadina i Jiova? Ra a bulata vakacava na tacida na vicasagavulu na yabaki ni veivakacacani kaukaua oya, qai tubu sara tale ga kina na kedra iwiliwili? O na kunea na isaunitaro oqo ena vidio Faithful Under Trials​—Jehovah’s Witnesses in the Soviet Union. Sarava mada, ni na dolava na matada na ka eda na raica, qai uqeti keda meda yalodina tiko ga vei Jiova, veitalia se cava e takoso e matada!

O rawa beka ni sauma na veitaro oqo? (1) Era a kilai vakalawa ni naica na iVakadinadina i Jiova mai Rusia? (2) Ni se bera, vaka kina ni oti na iKarua ni iValu Levu, a ra lai tu vakacava ena Soviet Union e vica vata tale na udolu na vuvale iVakadinadina? (3) A veisaqasaqa vakacava na nodra vakabauta kei na ka a vakavulica na turaga iliuliu Kominisi o Lenin? (4) Na sasaga cava a vakatokai na Operation North, na cava a nona inaki o Stalin ena sasaga oya? (5) Na cava ena yaco vei ira na iVakadinadina ke ra sa na kau vakavesu, ia na cava a tukuni vei ira mera cakava mera kua kina ni vakau tani? (6) Ena nodra vodo sitimanivanua balavu i Siberia, era veivakayaloqaqataki vakacava na tacida, nira druka sara ga kina na ovisa? (7) Na veivakalolomataki cava era vosota na iVakadinadina e Siberia? (8) Na isolisoli vakayalo cava era vakamareqeta vakalevu na tamata i Jiova, na cava na vuna? (9) Na cava era bolemate kina na tacida ena vuku ni nodra ivolatabaki vakaivolatabu, era a qaqa vakacava, dina nira saga ena nodra igu na veiliutaki mera latia na yaco yani ni ivola? (10) A tomana vakacava na iliuliu o Khrushchev na nodra vakacacani na tamata ni Kalou? (11) A ra saga vakacava na veiliutaki mera vakamatea na nodra vakabauta na luvedra na iVakadinadina? (12) Na cava era a kila vakamatata tu na tacida e vu ni nodra vakacacani? (2002 Yearbook, tabana 203-4) (13) A qai lauti ira tale vakacava na sui ni kedra na vakacacana tiko na isoqosoqo ni Kalou? (2002 Yearbook, tabana 220-1) (14) Na cava soti a qai yaco era a dau tadra tu ga na iVakadinadina ena matanitu makawa na Soviet Union? (15) Na cava a vukei ira na tacida mera vosota rawa na nodra a vakatovolei, e vakadinata vakacava na dina ni Jeremaia 1:19 na ka e saravi ena icavacava ni vidio? (16) Tukuna e dua na italanoa ni yalodina ena gauna ni veivakatovolei e tarai iko ena vidio.