Kato Ni Taro

◼ Cava me caka me oti ga kina ena kena gauna na noda soqoni?

Vaka me dau lekaleka wale na gauna nida talaucaka tiko vei ira noda itokani na itukutuku veivakauqeti. Oqori na vuna e sega ni ka rawarawa kina me dau vakacavari ena kena gauna na itavi ena soqoni. Eda na walia vakacava?

Tekivu ena kena gauna. Ke soqoni vakaivavakoso, de vinaka ni se vo e dua se rua na miniti, mera sa sureti rawa na mataveitacini mera dabe. Ke caka oqori, ena tekivu vakamatau na soqoni ena kena gauna. (Dauv. 3:⁠1) Ia ena sotasota lalai, me vaka beka na sota ena cakacaka vakavunau, mera kua ni dau waraki o ira na bera yani.

Vakavakarau vinaka. Ke o via cakacaka ena gauna, vakavakarau vinaka. Taumada, me macala vinaka vei iko na inaki ni nomu itavi. Mo kila na veitikina bibi, qai vakabibitaka ga oqori. Kua ni vakaoti gauna ena veitikina lalai e sega ni bibi. Kua ni talimagimagi. Me dau vakatovotovotaki ni se bera na soqoni na veitarotarogi se vakatasuasua. Ke rawa, dau vakatovotovotaka vakadomoilevu na nomu itavi ia me tiko vei iko na kaloko mo raica toka na kena gauna.

Vidavida nomu lewenivosa. Se o mani vosa ena nomu itavi se ra na sureti na vakarorogo mera vakaitavi kina, ena yaga ke o vidavida na lewena. Lewa rawa na levu ni gauna mo na vakayagataka ena iwasewase yadua o sa vidavida, vola sara na levu ni gauna oqori ena tikina lala ena yasa ni nomu isuinivosa. Ia ni o sa vakaitavi, qarauna vinaka na gauna o sa vola toka oqori. Ena itavi e dodonu mera cau kina na vakarorogo, kua ni vakamacala vakabalavu ena ikaunivosa, ni na lailai kina nomu gauna emuri mo sereka vinaka na veitikina bibi. Mera vakabula gauna o ira na dau veituberi ena vuli Vale ni Vakatawa me veirauti kina na gauna ni kato ni railesuvi. Mera kua tale ga ni taura na gauna e dau laga kina na iotioti ni sere kei na masu.

Tinia ena kena gauna. Ena soqoni e vica kina na itavi, me vaka na Soqoni ni Cakacaka, mera kauaitaka na tacida era vakaitavi na gauna e tekivu qai cava kina na nodra dui itavi. Vakacava ke sa lekaleka na gauna ia e se vo levu na itavi? Ke se bera ni vakaitavi e dua se rua na tacida tagane, me rau na musumusuka na nodrau ivakamacala me qai vo ga na veitikina bibi. Na qasenivuli maqosa ga e rawa ni cakava oqori.

Vei keda na vakarorogo, meda vukea na tacida e vakaitavi ena noda vakamacalataka vakalekaleka na veitikina ga e bibi. O koya gona, o keda kece eda rawa ni cau ena kena ‘caka vakavinaka qai tuvanaki vakamatau’ na noda soqoni.​​—⁠1 Kor. 14:​40, VV.