Vinaka na Gauna kei na Kena Wasewasei

E MACALA ni bibi me dau vinaka noda veivakavulici nida vunau, ia e bibi tale ga meda kauaitaka noda gauna. Na noda soqoni e tiko na gauna e dodonu me tekivu kina, kei na gauna e dodonu me oti kina. Ia, ena gadrevi nodra veitokoni o ira kece era vakaitavi ena soqoni.

E duatani sara na raici ni bula ena levu na vanua nikua ni vakatauvatani kei na gauna vakaivolatabu. Ena gauna vakaivolatabu, e dau cavuti vakararaba tu ga na gauna me vaka na “mataka,” ‘sigalevu,’ kei na “yakavi.” (1 Tui 18:26; Vkte. 43:16; 24:11) E sega ni dau kauaitaki me vakamatatataki na gauna e caka kina e dua na ka. E so na vanua e vuravura ena gauna oqo e se vaka tiko ga oqo nodra raica na gauna.

Ia, ke sa matau vei keda meda sega ni dau kauaitaka na gauna, se da susu mai na vanua e sega ni dau kauaitaki kina na gauna, ena vinaka meda saga meda kauaitaka ena gauna oqo. Ni lewe vica toka era lesi mera vakaitavi ena dua vata ga na porokaramu, e dodonu mera kauaitaka na gauna e soli ena nodra dui iwasewase. Na ivakavuvuli, “na ka kece ga me caka sara vaka vinaka ka tuvalaki vakamatau,” e rawa ni taurivaki tale ga ena vakayacori ni itavi kece ena soqoni ena kedra dui gauna.—1 Kor. 14:40, VV.

Ka Mo Cakava me Vinaka Kina Nomu Gauna. Kena dina ga na vakavakarau. Vakalevu me sega ni dau vinaka nodra gauna o ira era sega ni dau vakavakarau. Ra sa nuidei tale beka vakasivia. Se ra qai lai vakavakarau tu ni sa voleka nira vakaitavi. Ena vinaka nomu gauna ke o raica vakabibi na itavi e lesi vei iko, e gu tale ga na lomamu mo vakavakarau vinaka.

Vakacava ke o lesi mo wilivola ena ivavakoso? Railesuva mada na Lesoni 4 ina 7 mo raica kina na ivakasala e so me baleta na wiliwili e taladrodro, na cegu, vakabibitaki donu ni vosa, kei na sala me vakavotui kina na vakasama bibi. Vakatovotovotaka sara ena nomu wilika na itavi e lesi vei iko ena nomu muria na veika o sa railesuva mai. Raica na nomu kaloko mo kila kina na kena dede. De dua ena gadrevi mo wiliwili cake vakatotolo me rawa kina ni oti nomu wiliwili ena loma ni gauna e soli vei iko. Me totolo cake nomu wiliwili ena veivanua e sega soti ni bibi, ia mo cegu vinaka, vakamalua tale ga vakalailai nomu wilika na veivanua o via vakabibitaka. Vakatovotovo vakavica, kua ni vakadua ga. Ni sa na taladrodro nomu wiliwili, sa na rawarawa sara nomu vakayacora nomu itavi ena loma ga ni gauna e soli vei iko.

Kevaka o na bulia ga e dua nomu suinivosa, e sega ni tukuni me volai yadudua na vosa mo cavuta me rawa kina ni o qai vakaotia nomu itavi ena kena gauna dodonu. De dua o se nanuma vinaka tiko na kena iwalewale vinaka cake o rawa ni cakava a vakamacalataki ena Lesoni 25. Kua ni guilecava na lima na tikina oqo: (1) Vakarautaka e so na ivakamacala vinaka, me kua ga ni sivia. (2) Me matata vei iko na veitikina o na vakabibitaka, kua ga ni cavuqaqataka na iyatuvosa yadua. (3) Vakatakilakilataka ena nomu tikidua ni vosa na balavu ni gauna o na vakayagataka ena iwasewase yadua, se gauna e dodonu mo vakaotia kina e dua na iwasewase. (4) Ena nomu vakavakarau, mo na raica tale ga na tikina o na rawa ni vakalutuma ke o sa mani bera. (5) Vakatovotovotaka na nomu sa vosa sara tiko ga vei ira na vakarorogo.

E bibi na vakatovotovo. Ni o vakatovotovo, raica tale tiko ga na balavu ni gauna o vakayagataka ena iwasewase yadua. Vakatovotovo tiko me yacova ni o sa vakaotia vinaka na nomu vunau se vakamacala, ena loma ni gauna e soli vei iko. Me kua ni rui levu na ka o via vakamacalataka. E vinaka cake me lekaleka ga na gauna o vakayagataka ni o vakavakarau tiko, baleta ni vaka me dau lai balavu tale vakalailai nida sa vakaitavi mai na buturara.

Wasewasei ni Gauna. Ena vinaka nomu gauna ke o wasewasea vinaka na gauna o na vakayagataka ena veiwasewase ni nomu itavi. Me levu duadua na gauna o vakayagataka ena nomu lewenivosa. Ni oqori ga na vanua ena basika mai kina na uto ni veivakavulici. Na balavu ni ikaunivosa e dodonu me rawati ga kina na tolu na inaki a vakamacalataki ena Lesoni 38. Me kua ni balavu sivia tale na lewenivosa me lai sega kina na gauna me talaucaki kina e dua na itinitini e veivakauqeti, me vaka e cauraki ena Lesoni 39.

Ena kuria na totoka ni nomu vunau na nomu saga mo vosa ga ena gauna e soli vei iko, ena vakaraitaka tale ga ni o dokai ira na kena vo era vakaitavi ena soqoni, o dokai ira tale ga na lewe ni ivavakoso.