Maroroya

So na iWalewale ni Vunau e Veivale

Vakayagataka na iwalewale oqo mo vakarautaka kina na soli ni veivola oqo.

Toro Voleka Vei Jiova

“Levu era vakabauta na Kalou era via toro volekati koya. Oni bau kila ni sureti keda na Kalou meda toro voleka vua? [Wilika na Jemesa 4:⁠8.] E inaki ni ivola oqo me vukei keda meda vakayagataka noda iVolatabu meda toro volekata na Kalou.” Wilika na parakaravu 1 ena tabana 16.

“E yaco tiko vakalevu nikua na veika tawadodonu. E vaka ga e tukuni oqo ena iVolatabu. [Wilika na Dauvunau 8:9b.] Levu era lomatarotarotaka nona kauaitaki keda na Kalou. [Wilika na imatai ni rua na iyatuvosa ena parakaravu 4 tabana 119.] Na wase oqo e vakamacalataka na vuna e vakatara tiko kina na Kalou na veika tawadodonu.”

Yadra Tiko!

“E levu era kauaitaka na leqa lelevu e yaco tu nikua. [Tukuna na kena ivakaraitaki ena nomu yalava.] Oni kila beka ni oqori e tiki ni ivakatakilakila ni kena sa voleka ni liutaki vuravura na Matanitu ni Kalou? [Waraka me sauma. Wilika na tikinivolatabu e veiganiti me vaka na Maciu 24:​3, 7, 8; Luke 21:​7, 10, 11; se 2 Timoci 3:​1-5.] E vakamacalataki ena brochure oqo na vuna meda yadrava tiko kina na veika bibi e yaco tiko nikua.”

“E levu era leqataka na veika ca e yaco tiko se na leqa era dui sotava. Era taroga e so se cava e sega ni cakava kina e dua na ka na Kalou. E vakadeitaka na iVolatabu ni sa voleka ni vakaotia na Kalou na leqa e sotava tiko na kawatamata. [Wilika na Vakatakila 14:​6, 7.] Rogoca na ka ena yaco vua na kawatamata ena siga ni cudru ni Kalou. [Wilika na 2 Pita 3:​10, 13.] E tiko ena brochure oqo e levu na ivakamacala e baleta na ulutaga oqori.”

Na Ka Mo Kila Mo Bula Tawamudu Kina

“Ke oni sureti mo ni bula ena vanua totoka vaka oqo, oni na ciqoma beka? [Vakaraitaka na iyaloyalo ena tabana 4-5, qai waraka me sauma.] Oqo na ka e tukuna na Vosa ni Kalou e rawati kina na bula tawamudu. [Wilika na Joni 17:⁠3.] Ena vukei kemuni na ivola oqo ena ka mo ni kila mo ni rawata kina na bula tawamudu.” Vakaraitaka vua na imatai ni lima na parakaravu ni wase 1 drau na veivosakitaka ena nomu veisiko e tarava.

Cega na iyaloyalo ena tabana 188-9, tarogi itaukeinivale ena taro ena ivakamacala ni iyaloyalo: “E vakacava, o nuitaka tu mo na bula e Parataisi ni sa roboti vuravura na veikilai kei na Kalou? [Waraka me sauma. Wilika na Aisea 11:⁠9.] Oni na vulica ena ivola oqo na ka e tukuna na iVolatabu me baleta na Parataisi, kei na sala eda rawa ni lai bula kina.” Vakaraitaka vua ni drau na veivosakitaka na parakaravu 11-​16 ena wase 1, ena nomu veisiko e tarava.

Vuli Vua na Qasenivuli Levu

“Ena vinaka cake beka na vuravura ke muri na ka e tukuni ena tikinivolatabu oqo? [Wilika na Maciu 7:​12a qai waraka me sauma.] E tiko ena ivola oqo e levu na ka e vakavuvulitaka na qasenivuli levu duadua a bau bula.” Vakamacalataka vakalekaleka na iyaloyalo kei na ivakamacala ni iyaloyalo ni wase 17.

“E levu na itubutubu nikua era dau saga mera tugana vei luvedra na ivakavuvuli yaga. Oni nanuma ni bibi oqo? [Waraka me sauma, qai wilika na Vosa Vakaibalebale 22:⁠6.] Era uqeti e keri na itubutubu mera vakavulici ira na luvedra nira se lalai. E vakarautaki na ivola oqo me vukei ira na itubutubu mera sauma na nodra vakatataro na luvedra.” Vakamacalataka na iyaloyalo ni wase 15 se 18 kei na kedra ivakamacala.

“Era dau kurabuitaka na itubutubu na taro era dau taroga na luvedra. E sega li ni dau dredre me saumi e so na taro oqori? [Waraka me sauma, qai wilika na Efeso 6:⁠4.] Na ivola oqo ena vukei ira na itubutubu mera sauma nodra taro na luvedra.” Vakamacalataka e vica na iyaloyalo kei na kedra ivakamacala ena wase 11 kei na 12 se 34 ina 36.

Na Tamata Rogo Duadua a Bau Bula

“Era vakasamataki Jisu vakalevu na tamata ena gauna vaka oqo. Ia, ni rui levu na ka ca e yaco tiko ena veiyasa i vuravura, so era vaqaqa se e kauaitaki keda dina o Jisu se sega. Na cava oni nanuma?” Waraka me sauma. Cega na wase 24, drau veivosakitaka vakalekaleka na vu ni nona lako mai i vuravura o Jisu. Wilika na Joni 15:​13, vakabibitaka ni a lomani ira dina na tamata o Jisu.

“Ni cavuti o Jisu Karisito, e dau nanumi ga vakalevu nona se gonedramidrami, se nona rarawa ni bera ni mate. Era nanuma ga na sucu kei na mate i Jisu. E sega ni vakasamataki na veika totoka e tukuna se cakava. Na ka e rawata e tarai keda kece na tamata eda bula e vuravura. Oya na vuna e bibi kina meda vulica vakalevu na veika totoka e cakava ena vukuda.” Wilika na Joni 17:⁠3. Cega na ivakamacala taumada ni ivola qai wilika na ikava ni parakaravu.

Na Cava e Loma ni Kalou Vei Keda?

“A nakita beka na Kalou meda mai sotava na bula dredre eda donuya tu oqo? [Waraka me sauma. Wilika na Maciu 6:​10.] Oni sa bau vakasamataka se cava sara mada na Matanitu ni Kalou?” Cega na lesoni 6, wilika na taro era tarogi tiko ena itekivu ni lesoni. Drau veivosakitaka sara na lesoni se lokuca mo drau qai veivosakitaka ena nomu veisiko e tarava.

“Dina ni sa torocake sara na bula nikua, eda vakila tiko ga na rarawa kei na yaluma ni tauvimate kei na mate. Oni kila beka na ka ena cakava o Jisu vei ira na tauvimate, na qase, kei na mate?” Waraka me sauma. Ke via kila na itaukeinivale na kena isau, cega na lesoni 5, qai wilika na taro ni parakaravu 5-6. Drau veivosakitaka na parakaravu oqori, se lokuca mo drau na qai veivosakitaka ena veisiko e tarava.

Qarava na Kalou Dina

“Eda na qara veivuke e vei nida sotava na bula dredre? [Waraka me sauma. Wilika na Roma 15:⁠4.] E vakaraitaka vei keda na iVolatabu na ivakasala, veivakacegui, kei na inuinui, e rawa ni vakaukauataki keda meda vosota kina na veika dredre. Na ivola oqo e vakatura e so na sala e rawa ni yaga kina na noda wili iVolatabu.” Tukuna na va na tikina e volai ena tabana 30.

“Tekivu mai na gauna a bula voli kina e vuravura o Jisu, e levu era sa masuta tiko na kena yaco mai na Matanitu ni Kalou. Oni bau vaqaqa beka se cava ena kauta mai vei keda na Matanitu ni Kalou? [Waraka me sauma. Wilika na Taniela 2:​44.] Na ivola oqo e vakamacalataka na Matanitu ni Kalou, na ka ena vakayacora, kei na kena yaga vei keda na kena veiliutaki.” Vakaraitaka na iyaloyalo ena tabana 92-3.