Na Vakatutu ni Kena Soli na iVola Kaya na iVolatabu
Na itoma oqo e okati kina e so na vakatutu ni kena soli na ivola Kaya na iVolatabu. Me laulau na nomu ivakamacala, biuta ga ena kena ibiubiu e matau vei iko, veisautaka na nomu ivakamacala me ganiti ira na tiko ena yalava, mo kila vinaka tale ga na veitikina mai na ivola ena rawa ni tekivutaki kina na veivosaki ena iVolatabu. Rawa tale ga ni vakayagataki e so na vakatutu e ganita na nomu yalava.—Raica na Noda Cakacaka Vakaitalatala, Janueri 2005, t. 6.
Amaketoni
◼ “E levu nira rogoca na vosa ‘Amaketoni’ era dau vakasamataka sara e dua na veivakarusai levu. Sega li ni o kurabui ke o kila ni Amaketoni e dua na ka e dodonu meda vakanamata kina? [Waraka me sauma. Wilika na Vakatakila 16:14, 16.] Rogoca mada na ivakamacala oqo me baleta na gauna e sa na oti kina na Amaketoni.” Cega na tabana 82-4 qai wilika na parakaravu 21.
Bula Tawamudu
◼ “E levu era gadreva tu mera bulabula vinaka, mera bula balavu tale ga. Ia kevaka e rawa oqori, o na vinakata beka mo bula tawamudu? [Waraka me sauma. Wilika na Vakatakila 21:3, 4 kei na parakaravu 17 ena tabana 53-4.] E vakamacalataki ena ivola oqo na sala eda na rawata kina na bula tawamudu, kei na ivakarau ni bula ena gauna sa na vakavatukana kina na yalayala oqo.”
iValu/Sautu
◼ “Dua na ka na nodra diva tu na tamata ena veivanua na veisaututaki. Na cava beka nomu nanuma, e ka ni tadra ga na noda nuitaka tu na veisaututaki e vuravura? [Waraka me sauma. Wilika na Same 46:8, 9.] E vakamacalataki ena ivola oqo na sala ena vakayacora kina na Kalou na nona inaki, kei na kena vakalesui tale e vuravura na veisaututaki.” Vakaraitaka na iyaloyalo ena tabana 35, qai veivosakitaka na parakaravu 17-21 ena tabana 33-4.
iVolatabu
◼ “Levu era kaya ni iVolatabu e Vosa ni Kalou. O bau lomatarotarotaka tu beka se rawa vakacava me tukuni ni Vosa ni Kalou na ivola era a vola ga na tamata? [Waraka me sauma. Wilika na 2 Pita 1:21 kei na parakaravu 5 ena tabana 19-20.] Na ivola oqo ena sauma vakaivolatabu na veitaro oqo.” Vakaraitaka sara na taro ena tabana 6.
◼ “Sa dua na ka na levu ni veimataqali tukutuku era tu nikua ni vakatauvatani kei na dua tale na gauna. Ia e vei na vanua eda rawa ni kunea kina na ivakasala vinaka ena vakamarautaki keda, ena vinaka tale ga kina na ivakarau ni noda bula? [Waraka me sauma. Wilika na 2 Timoci 3:16, 17 kei na parakaravu 12 ena tabana 23.] E vakamacalataki ena ivola oqo na sala eda rawa ni veisautaka kina noda bula me vakamarautaka na Kalou, meda marau tale ga kina.” Vakaraitaka na kato kei na iyaloyalo ena tabana 122-3.
Jisu Karisito
◼ “Levu nikua era sa kilai Jisu Karisito. E so era kaya ni dua ga na tamata vinaka. E so tale era qaravi koya me Kalou Kaukaua Duadua. Na cava beka nomu nanuma, e bibi na ka eda vakabauta me baleti Jisu Karisito?” Waraka me sauma. Wilika na Joni 17:3 kei na parakaravu 3 ena tabana 37-8. Vakaraitaka sara na taro ena ruku ni ulutaga ena tabana 37.
Kalou o Jiova
◼ “E levu vei ira na vakabauta na Kalou era vinakata mera volekati koya. O kila beka ni iVolatabu sara ga e uqeti keda meda toro voleka vua? [Waraka me sauma. Wilika na Jemesa 4:8a kei na parakaravu 20 ena tabana 16.] E vakarautaki na ivola oqo me vukei keda meda vulica e levu tale na ka me baleta na Kalou ena noda vakayagataka sara ga na noda iVolatabu.” Vakaraitaka sara na taro ena ruku ni ulutaga ena tabana 8.
◼ “E levu era dau masulaka me vakarokorokotaki na yaca ni Kalou. O bau dau vakataroga tu beka se o cei na yacana? [Waraka me sauma. Wilika na Same 83:18 kei na parakaravu 2-3 ena tabana 195.] Na ivola oqo e vakamacalataka na ka e kaya sara ga na iVolatabu me baleta na Kalou o Jiova kei na ka e nakita tu vua na kawatamata.”
Leqa Tubukoso/Rarawa
◼ “Ni yaco na leqa tubukoso, era dau taroga e levu se kauaitaki ira dina na Kalou, e kila tale beka ga na nodra rarawa? O dau lomatarotarotaka tale ga oqori? [Waraka me sauma. Wilika na 1 Pita 5:7 kei na parakaravu 11 ena tabana 11-12.] E vakamacalataka na ivola oqo na sala ena kauta laivi kina vakadua na Kalou na rarawa kece eda sotava tu na tamata.” Vakaraitaka sara na taro ena ruku ni ulutaga ena tabana 106.
Lotu
◼ “E levu era sa tekivu liaca ni vakavuna sara tiko ga o lotu na leqa e yaco tu nikua. Na cava beka nomu nanuma, e sa dusimaki ira tiko na tamata ena sala dodonu na lotu? [Waraka me sauma. Wilika na Maciu 7:13, 14 kei na parakaravu 5 ena tabana 145-6.] E veivosakitaki ena wase oqo e ono na ka meda kila kina na sokalou e vakadonuya na Kalou.” Vakaraitaka na ono na tikina e koto ena tabana 147.
Masu
◼ “O dau vaqaqa tu beka se dau sauma vakacava na Kalou na noda masu? [Waraka me sauma. Wilika na 1 Joni 5:14, 15 kei na parakaravu 16-18 ena tabana 170-2.] E vakamacalataki tale ga ena wase oqo na vuna meda masu kina vua na Kalou, kei na ka meda cakava me rogoci kina noda masu.”
Mate/Veivakaturi
◼ “E levu era dau vakataroga tu se cava dina e yaco nida mate. Na cava nomu nanuma, e rawa beka nida kila? [Waraka me sauma. Wilika sara na Dauvunau 9:5 kei na parakaravu 5-6 ena tabana 58-9.] Na ivola oqo e vakamacalataka tale ga na ka e yalataka tu na iVolatabu me baleta na nodra vakaturi na sa mate.” Vakaraitaka na iyaloyalo ena tabana 75.
◼ “Ni takali e dua na wekada lomani, sa macala ga nida na via raici koya tale. Se cava nomu nanuma? [Waraka me sauma.] Era vakacegui e levu ena vosa ni yalayala ena iVolatabu, ni na yaco na veivakaturi. [Wilika na Joni 5:28, 29 kei na parakaravu 16-17 ena tabana 71-2.] Na wase tale ga oqo e sauma na veitaro oqo.” Vakaraitaka sara na taro ena ruku ni ulutaga ena tabana 66.
Veivakavaletaki
◼ “Ena tubu cake ni saunivale ena levu na vanua sa dredre kina ni kunei na vale vinaka. Na cava nomu nanuma, ena dua beka na siga sa da na yadua kece na vale vinaka? [Waraka me sauma. Wilika na Aisea 65:21, 22 kei na parakaravu 20 ena tabana 34.] E vakamacalataka na ivola oqo na vakayacori ni yalayala oqo ni Kalou.”
Vuvale
◼ “Eda vinakata kece me marau na noda bula vakavuvale. Se cava nomu nanuma? [Waraka me sauma.] E tukuni ena iVolatabu e dua na ka e rawa nira cakava kece na lewenivuvale me vakilai kina na marau, oya na nodra vakatotomuria na Kalou ena nona dau loloma.” Wilika na Efeso 5:1, 2 kei na parakaravu 4 ena tabana 135.
[Kato ena tabana e 5]
Na Ka Mo Kaya me Baleta na Cau
“Ke oni via solia e dua na cau lailai me baleta na cakacaka keimami cakava tiko e vuravura raraba, au na ciqoma ena marau.”
“Dina ga ni sega ni saumi na neimami ivola, ia keimami ciqoma na cau ga oni rawa ni solia me baleta na cakacaka keimami cakava tiko e vuravura raraba.”
“Oni na rairai taroga beka se vakailavotaki vakacava na cakacaka oqo. E caka rawa ena veitokoni ni cau. Kevaka o via solia nikua e dua na cau lailai, au na marau ni ciqoma.”