Me Levu Noda Cakacaka ena Gauna ni iVakananumi
1. Na ka vinaka cava era vakila na Isireli era daurerevaka na Kalou ena “so levu i Jiova”?
1 Ena gauna lokuci e veiyabaki, era dau vakananuma kina na Isireli makawa na “so levu i Jiova.” (Vunau 23:2) Na nodra dau vakananuma na veika vinaka e cakava vei ira na nodra Kalou, e vakamarautaki ira qai uqeti ira tale ga mera yalodina tiko ga ena sokalou savasava.—2 Vei. 30:21–31:2.
2, 3. Na cava e veiganiti kina meda vakalevutaka noda cakacaka vakavunau ena gauna ni iVakananumi? Ena vakayacori ena gauna cava na iVakananumi?
2 Ena gauna tale ga oqo, e tubu cake tiko ga na cakacaka vakalou eda vakayacora ena gauna ni iVakananumi. Oqo na gauna meda vakasamataka kina vakatitobu na isolisoli uasivi i Jiova a solia ena vukuda, oya na Luvena duabauga e vakatubura. (Joni 3:16; 1 Pita 1:18, 19) Nida vakasamataka na nodrau loloma na Kalou kei na Luvena, ena uqeti keda meda vakacaucautaki Jiova, da qai gumatua ni cakava na lomana.—2 Kor. 5:14, 15.
3 Ena vakayacori tiko na iVakayakavi ni Turaga ena siga Lotulevu, 24 Maji, ni sa dromu na siga. Eda na vakalevutaka gona vakacava noda cakacaka vakavunau ena vula o Maji, Epereli, kei na Me?
4, 5. (a) Na cava e vukei ira e so mera tukuna na itukutuku vinaka vei ira e levu na tamata? (b) Na cava o raica ni yaga ena nomu yalava?
4 Vosa Vakalevu Vei Ira na Tamata: Nida cakacaka vakavunau, meda qara na sala meda vosa kina vakalevu vei ira na tamata. Rawa beka nida tuvanaka meda cakacaka vakavunau e veivale ena gauna era dau tiko kina na itaukeinivale, me vaka beka ena yakavisiga se na yakavibogi? Ke so ena noda iwasewase ni vulivola era via cakacaka vakavunau ni bera na vulivola, me tuvanaka na ivakatawa ni vulivola na vanua me caka kina na sota ena dua na yalava e voleka ga ena vanua ni vulivola.
5 Dua tale na sala eda na vosa kina vei ira e lewe levu oya na noda vunau ena vanua era dau kune vakalevu kina na tamata. E via painia veivuke e dua na tacida yalewa e Japani e cakacaka saumi tiko. A vakatura e dua na qase ni ivavakoso ni bera ni lai cakacaka e veisiga, me vunau ena vanua e volekata na ikelekele ni sitimanivanua. Ni valuta nona mamadua kei na nodra dau vakadiloi koya o ira na vodo vata tiko, e sa dau solia tiko kina na ilavelave kece ni ivoladraudrau vei ira e lewe 40, okati kina o ira na dau vodo vata, o ira na cakacaka ena siteseni ni sitimanivanua, kei ira na itaukeinisitoa era tu voleka. Ena kena ivakatautauvata e solia tiko e 235 na ivoladraudrau ena veivula. Nona dau wasea vakalalai na veitikina vakaivolatabu vei ira e so ena veisiga, e tekivutaka rawa kina e ono na vuli iVolatabu.
6. Era na vakalevutaka vakacava na itabagone nodra cakacaka vakavunau?
6 Vanua Eda Rawa ni Vunau Kina: E levu na gone era se vuli tiko e koronivuli era sa dautukutuku era dau sereki ena so na gauna. Oqo na gauna vinaka sara ga mera painia veivuke kina. Kuria oya, e rawa nira vakalevutaka na nodra cakacaka vakavunau na itabagone lotu Vakarisito nira vunau e koronivuli. O na kurabuitaka na ka era na vakataroga na nomu icaba me baleta na nomu vakabauta. Vakacava mo soli ivakadinadina ena gauna e dau veivosakitaki kina e so na ulutaga e koronivuli, se ena gauna mo ni vola kina e dua na italanoa? E so era sa cakava vaka kina ena nodra vakayagataka na vidio ni isoqosoqo. E so era sa vuli iVolatabu kei na nodra icaba e koronivuli, yaco sara mera yalataki ira ra qai papitaiso. Oqo na sala vinaka meda “vakavinavinaka ki na yaca i Jiova.”—Same 148:12, 13.
7. (a) Na cava e cakava e dua na tacida tagane me vakalevutaka kina nona cakacaka vunau? (b) E vakatale beka ga oqori na ka o sotava?
7 Meda vaqara na sala meda vakamacalataki koya kina na noda Kalou vinaka kei na veika totoka e yalataka, ena gauna eda na vakayacora tiko kina na veika e sa macala tu ga nida na cakava e veisiga. E dua na tacida tagane e dau vodo tiko ena sitimanivanua e veisiga, e dau vunau vei ira era dau vodo vata ena gauna veiganiti. Kena ivakaraitaki, gauna e dau waraka kina na sitimanivanua ena siteseni, e dau vunau tiko vua e dua na cauravou e veisiga me lima na miniti. Mani vakadonuya na cauravou oqo kei na dua na nona itokani me rau vuli iVolatabu. E dau caka na vuli iVolatabu ni ratou sa vodo tiko ena sitimanivanua. Dua na gauna e muri, na marama e dau rogoca tiko nodratou veivosaki e qai kerea tale ga vua na tacida oqo me vuli iVolatabu. E sa marautaka tiko na marama oqo nona vuli iVolatabu ena gauna e dau vodo sitima kina. Sa vakavulici ira oti e lewe tini na tacida oqo nira vodo tiko ena sitimanivanua.
8. Na cava e rawa nira vakayagataka o ira na sa qase se o ira na tautauvimate mera vakalevutaka kina nodra cakacaka vakavunau?
8 Ia vakacava ke sega ni levu na ka eda rawa ni cakava baleta nida sa qase se tautauvimate? E tiko na sala eda rawa ni vakalevutaka kina noda vakacaucautaki Jiova. Eda sa tovolea beka na vunau ena talevoni? Ke da sega ni kila na kena icakacaka, meda tukuna vei ira noda ivakatawa ni vulivola. De rawa ni raica mai e dua na dautukutuku e sa kenadau me vukei keda. Nida cakacaka vata kei na dua, eda na vuli da qai veivukei tale ga me yaga kina noda vunau. So na vakatutu totoka me baleta na vunau ena talevoni e tiko ena Noda Cakacaka Vakaitalatala, Feperueri 2001, tabana 5-6.
9. Eda na vukei ira vakacava na vuli iVolatabu mera mai veitomani kei na ivavakoso ena cakacaka vakavunau?
9 Na nodra tiko ena iVakananumi na dautukutuku vou e rawa ni uqeti ira mera vakalevutaka nodra vakacaucautaki Jiova. Rawa nida vukei ira mera valuta nodra dau taqaya ena cakacaka vakavunau ena noda tukuna vei ira e so na veika eda sotava ena cakacaka vakavunau, kei na noda vakavulici ira tiko vakamalua mera vakamacalataka na ivakavuvuli vakaivolatabu ra qai taqomaka tale ga na nodra vakabauta. (1 Pita 3:15) Ke sa vinakata e dua na vuli iVolatabu me dautukutuku ni itukutuku vinaka, me tukuni vua na ivakatawa daulewa. Ena qai lokuca na gauna me na raici koya kina na gonevuli me vakadeitaka kina ke sa rawa ni veitomani kei na ivavakoso ena cakacaka vakavunau. Ena vakamarautaki Jiova dina ni raici ira na ka vou nira totaki koya ena veileti ni kena lewai na lomalagi kei vuravura!—Vkai. 27:11.
10. (a) Ena vukei keda vakacava e dua na ituvatuva vinaka meda painia veivuke kina? (b) O painia veivuke beka ena gauna ni iVakananumi ena yabaki sa oti? O cakava vakacava?
10 O Rawa ni Painia Veivuke? E dodonu me kauaitaki vakabibi na 50 na aua mera rawata na painia veivuke. (Maciu 5:37) Kena ibalebale oqo ni na vinakati mo vakayagataka me kena i vakatautauvata e 12 na aua ena cakacaka vakavunau e veimacawa. E ganita beka na keda ituvaki e dua vei ira na sabolo ni ituvatuva ni painia veivuke ena tabana 5? Ke sega, e rawa beka nida vakarautaka e dua tale na ituvatuva meda painia veivuke kina ena Maji, Epereli, kei na Me? Meda kerei Jiova me vakalougatataka noda sasaga meda vakalevutaka noda cakacaka vakavunau.—Vkai. 16:3.
11. E rawa vakacava nira tokoni ira na painia veivuke o ira na qase kei na dauveiqaravi ni ivavakoso?
11 Era na tokona na qase kei ira na dauveiqaravi ni ivavakoso na noda sasaga ena gauna ni iVakananumi oqo meda vakacaucautaki Jiova kina. E sega ni vakabekataki ni levu tale ga vei ira era na painia veivuke. Era na tuvanaka na qase na vanua me na caka tale ga kina na cakacaka vakavunau ena yakavisiga kei na yakavibogi ena lomanimacawa, vaka kina na muanimacawa, ke gadrevi. Ena kena tuvanaki na vanua kei na gauna ena caka kina na sota, kei koya ena rawa ni liutaka, me ratou kerea na qase e dua e sa nakinaki tiko me na painia me qarava na itavi oqori. Era na saga na qase mera tuvana e dua na ituvatuva me rawa ni so na dautukutuku mera cakacaka vata kei iko ena siga kei na gauna o sa tuvana tu mo na cakacaka vakavunau kina. Oqo ena rawa ni dei kina na ituvatuva e sa tuvanaki tu, ena rawati tale ga kina e levu na ka vinaka.—Vkai. 20:18.
12. Na cava e uqeti keda meda vakacaucautaki Jiova tiko ga?
12 Gumatua Tiko Ga: Ke sega ni rawa nida painia ena vuku ni keda ituvaki, meda nanuma tiko ni ciqoma o Jiova na noda sasaga kei na veika eda rawa ni cabora ‘me vaka na ka sa tu vei keda, sega ni vaka na ka sa sega ni tu vei keda.’ (2 Kor. 8:12) E levu dina na ka meda vakavinavinakataki Jiova kina. A vola kina o Tevita: “Au na vakavinavinaka vei Jiova e na gauna kecega; ena tikotiko ga e na gusuqu na vakamolimoli vua.” (Same 34:1) Me noda inakinaki mada ga oqori ena gauna ni iVakananumi oqo.
[Kato ene tabana e 3]
O na Vakalevutaka Vakacava Nomu Cakacaka Vakavunau?
◼ Vunau ena gauna era tiko kina na itaukeinivale
◼ Vunau ena vanua era dau kune vakalevu kina na tamata
◼ Vunau ena vanua ni cakacaka se koronivuli
◼ Vunau ena talevoni
◼ Painia veivuke