Kua ni Guce ena Cakacaka Vakavunau
1 Eda sa bula tu oqo ena gauna dredre. Sa qai takalevu ga na veivaluvaluti vakalewenivanua, na veivala vakayavusa, na leqa tubukoso, kei na vuqa tale na ka vakadomobula. Sa qai gadrevi ga kina vakalevu nikua mera rogoca na kawatamata na itukutuku vinaka. Ia, e dua tale na ka sa takalevu tu—na kena sega ni kauaitaki na veika vakayalo. Ena so gona na vanua, e dredre meda kunei ira na itaukeinivale, sa qai dredre sara meda kunei ira era rogoci keda, se o ira na via vulica na iVolatabu. Ia, se mani ituvaki cava e sotavi, e bibi meda kua ni guce na vunautaka na itukutuku vinaka ni Matanitu ni Kalou e sa tauyavu oti.—Maciu 24:14.
2 E Lomani Ira na Tamata: E vakavotuya na noda vunau na nona lomani keda o Jiova. “Sa sega ni vinakata me rusa e dua, me yacova ga na veivutuni ko ira kecega na tamata.” (2 Pita 3:9; Isik. 33:11) E vakarota gona, me vaka ga a kaya o Jisu, “ena vunautaki dina mada eliu nai tukutuku-vinaka e na veivanua kecega.” (Mari. 13:10) Na Kalou e vakamasuti ira na tamata mera vakararavi vua mera bulata kina na siga ena lewai kina na vuravura i Setani. (Joeli 2:28, 29, 32; Sefa. 2:2, 3) Sega li nida vakavinavinakataka ni lesi keda o Jiova ena cakacaka oqori?—1 Tim. 1:12, 13.
3 Ni vakatautauvatataki na ripote ni cakacaka mai na veiyasa i vuravura ena yabaki vakacakacaka ni 2004, e rauta ni 6,085,387 era vuli iVolatabu e veivula, ia ni vakatautauvatataki na tisaipeli vou era papitaiso, e rauta ni 5,000 e veimacawa! E so vei ira na yalayala vou oqo era kune ena nona vakalougatataka o Jiova na nodra sega ni guce o ira na dautukutuku era saga ena nodra igu mera vunau vei ira kece na tiko ena yalava era lesi kina. E vakavureki dina oqori ena veivavakoso, qai ka dokai tale ga meda cakacaka vata kei na Kalou ena cakacaka ni veivakabulai oqo!—1 Kor. 3:5, 6, 9.
4 E Vakacaucautaka na Yaca ni Kalou: Eda sega ni guce na vunau ni oqo e dua na sala eda vakacaucautaki Jiova kina e matanalevu, meda vakacerecerea tale ga na yacana vei ira kece e vuravura. (Iper. 13:15) E temaki ira na ‘kai vuravura kece’ o Setani mera vakabauta ni sega vua na Kalou na kaukaua me walia kina na leqa ni kawatamata, e sega ni kauaitaka na rarawa eda sotava tu, se e sega ga ni bula dina tiko e dua na Kalou. (Vkta. 12:9) Na noda vunau gona eda sa tutaka tiko kina na ka dina me baleta na Tamada vakalomalagi veivakurabuitaki oqo. Meda vakacaucautaka tiko ga na yacana ena gauna oqo ka sega ni mudu.—Same 145:1, 2.