Vakaraitaka Yani “na Rarama kei Vuravura”
1. O cei na rarama levu a parofisaitaki ena Vosa ni Kalou? Na soqo cava e dau vakananumi kina na rarama oqo?
1 E parofisaitaka o Jiova ena gusu i Aisea: “Ko ira na tamata ka lako e na butobuto, era sa raica na rarama levu; sa cadra cake na rarama vei ira era sa tiko e na vanua ni yaloyalo ni mate.” (Aisea 9:2) Na “rarama levu” oqori e vakatakilai ena itovo kei na nona cakacaka na Luve ni Kalou, o Jisu Karisito. Na nona cakacaka vakavunau e vuravura kei na veivakalougatataki e rawati ena nona mai cabora nona bula, a uqeti ira sara ga na tiko ena butobuto vakayalo. Na rarama oqori era gadreva tale ga o ira na bula tu ena gauna butobuto oqo. Na iVakayakavi ni Turaga e gauna vinaka meda vakaraitaka yani kina “na rarama kei vuravura.” (Joni 8:12) Ena yabaki sa oti, e vica na milioni era vakaraitaka na nodra vakabauta ena nodra mai duavata kei keda ena muri ni ivakaro i Jisu: “Dou cakava oqo mo dou vakananumi au kina.” (Luke 22:19) Ni sa voleka na iVakananumi ni yabaki oqo, e rawa vakacava nida vakaitavi ena noda vakaraitaka yani na rarama levu e vu mai vei Jiova?—Fpai. 2:15.
2. Eda na vakaraitaka vakacava noda vakavinavinakataka na isoro ni veivoli? Ena uqeti keda vakacava?
2 Bucina na Yalo ni Vakavinavinaka: Na gauna ni iVakananumi e gauna vinaka meda vakasamataka kina na loloma levu erau vakaraitaka vei keda o Jiova kei Jisu, ena nodrau vakarautaka na isoro ni veivoli vua na kawatamata. (Joni 3:16; 2 Kor. 5:14, 15) Nida vakasamataka na isoro oya eda na vakavinavinakataka na soqo bibi oqo. Era na vinakata kece na dauveiqaravi ni Kalou mera biuta vakatikitiki na gauna mera wilika ra qai vakasamataka vakatitobu na tikinivolatabu me wiliki ena macawa ni iVakananumi, e volai ena Dikeva na iVolatabu e Veisiga. Nida vakananuma na itovo vakasakiti i Jiova e vakilai ena isoro ni veivoli e vakarautaka, eda na dokadokataka na noda vakalou vua. Nida vakasamataka na ibalebale ni ivoli, ena vakalevutaka na noda lomana na Kalou kei na Luvena, ena uqeti keda tale ga meda gumatua ni cakava na loma ni Kalou.—Kala. 2:20.
3. Eda na vakaraitaka vakacava na noda vakavinavinakataka na iVakananumi?
3 Ke titobu noda vakavinavinakataka na isoro ni veivoli e vakarautaka o Jiova, na noda nanamaki ena iVakananumi ena uqeti ira tale ga na noda vuli iVolatabu, noda veisikovi lesu, o ira na wekada, o ira eda tiko veitikivi, noda itokani e koronivuli se valenicakacaka, kei na so tale eda sureti ira ina soqo bibi oqo. (Luke 6:45) Meda solia na ivola ni veisureti vei ira kece eda sureta mera kua kina ni guilecava. E so na tacida era dau maroroya na yacadra o ira era sureta mera kua kina ni guilecava e dua ena iVakananumi, ra qai dau kuria e so tale na yaca e veiyabaki. Noda vakarautaki keda vinaka, kei na noda cakava ena yalodina na veika eda sa vakarautaka me baleta na nodra sureti na tataleitaki, oqo e dua na sala eda sa vakavinavinakataka tiko kina na Kalou o Jiova ena “[i]solisoli sa sega ni tukuni rawa.”—2 Kor. 9:15.
4. Na cava ena vukei keda meda vakalevutaka noda cakacaka vakavunau ena vula o Maji kei na Epereli?
4 Vakalevutaka Noda Cakacaka Vakavunau: Rawa beka nida vakalevutaka noda cakacaka vakavunau ena vula o Maji kei na Epereli? Noda saga meda wasea yani na “[i]tukutuku-vinaka ni serau i Karisito,” eda na vakalougatataki kina. O Jiova na iVurevure ni rarama vakayalo kece ga e vakarota: “Me cila mai na butobuto na rarama.” (2 Kor. 4:4-6) Era na tuvanaka na qase na ikuri ni vanua kei na gauna me na caka kina na sota ke gadrevi, mera na liu tale ga ena nodra tokoni na dautukutuku era vinakata mera vakalevutaka nodra cakacaka vakavunau. Oqo e okati kina na vunau ena salatu ena matakalailai, vunau ena vanua ni bisinisi, ke ganita, vunau ena talevoni ena yakavi se yakavi bogi. Dua na ivukevuke meda vakalevutaka kina noda cakacaka vakavunau, oya meda kotora na aua eda rawa ni sauva, da qai gumatua sara meda rawata. E levu era bole mera painia veivuke ena nodra solia vei Jiova na nodra vinaka kece.—Kolo. 3:23, 24.
5. Na cava era sa vakila e levu ena kena sa vakalailaitaki na aua ni painia veivuke?
5 O Rawa Beka ni Painia Veivuke? “Sa oti oqo e vitu na yabaki na kena sa vakalailaitaki na aua e lavaki vei ira na painia veivuke. Na veisau oqo e rawa kina ni levu era vakila na marau kei na yaga ni painia veivuke. O sa tovolea oti? E so e nodra ivakarau mera painia veivuke e veiyabaki. Ena levu na ivavakoso e levu na dautukutuku era dau painia veivuke vata, oqo e gauna marautaki sara vei ira, e dau vuavuavinaka tale ga kina na cakacaka. Rawa beka ni o tuvanaka mo painia veivuke ena gauna ni iVakananumi? De so era digitaka na vula o Epereli ni lima na kena muanimacawa.
6. Na ituvatuva cava sa vakarautaki tu?
6 Ena veisiko beka na ivakatawa ni tabacakacaka ena nomu ivavakoso ena vula o Maji se Epereli? Oqo e dua na gauna vinaka vei iko. Me vaka sa kacivaki oti ena yabaki vakacakacaka ni 2006, o ira kece era painia veivuke tiko ena vula e veisiko yani kina na ivakatawa ni tabacakacaka, era sureti tale ga mera tiko ena imatai ni veimama ni nodra bose na painia ena macawa ni veisiko. Sega ni vakabekataki ni veika vakayalo ena vakamacalataki ena bose oqori ena uqeti ira tale ga mera sauva na isausau ni painia tudei. Kuria oqori, eda marau nida na veisoliyaka tale ga ena vula o Maji na ivola ni vuli iVolatabu vou Na Cava Sara Mada e Kaya na iVolatabu? Vakacava me nomu isausau mo tekivuna e dua na vuli iVolatabu ena ivola vou oqo.
7, 8. (a) Na cava ena vukei keda meda vakarautaka vinaka kina e dua na ituvatuva ni painia veivuke? (b) Ena veivuke vakacava na nodra veitokoni na lewenivuvale? E yaga vakacava vei ira na lewenivuvale kece?
7 Ni o kila ni vinakati mera rawata ga na painia veivuke e 50 na aua, vakasamataka sara na ituvatuva o na vakayagataka mo na vakacila rarama kina ena 12 ga na aua ena veimacawa. Veivosakitaka kei ira e so tale, vaka kina o ira era sa painia veivuke oti. Oqo ena rawa ni uqeti ira mera tomani iko. Era raica rawa o ira na dautukutuku papitaiso gone kei na qase ni sega ni dredre na rawati ni isausau oqo ke tiko e dua na ituvatuva vinaka. Masulaka tale ga. Ke sa rawa, vakarautaka sara nomu ituvatuva, qai marautaka nomu painia veivuke!—Mala. 3:10.
8 Era vakadinadinataka e levu na vuvale ni nodra veitokoni vinaka e rawa kina ni painia veivuke e dua na lewenivuvale. Eratou vakatulewataka e dua na vuvale me ratou painia veivuke na le lima eratou sa papitaiso. O rau na gone erau se bera ni papitaiso erau saga tale ga me rau vakalevutaka na nodrau cakacaka vakavunau. E yaga vakacava ena vuvale oqo na nodratou vakalevutaka na nodratou cakacaka vakavunau? Eratou vola: “Sa dua dina na vula vinaka, keitou vakila sara ga na qaqaco vinaka ni neitou vuvale. Keitou vakavinavinakataka na veivakalougatataki i Jiova!”
9. Eda na vakacila rarama vakacava ena gauna ni iVakananumi?
9 Ena veivakabulabulataki beka na cakacaka lavotaki oqo ena vula o Maji kei na Epereli, qai vakavolekati keda vua na Tamada vakalomalagi? Ena vakatau sara ga ena noda dui sasaga meda vakalevutaka noda lomana na Kalou kei na Luvena, kei na noda vakalevutaka noda cakacaka vakavunau. Meda vakataki koya mada ga na daunisame ni lagata: “Au na vakavinavinaka vakalevu vei Jiova e na gusuqu; io, ka’u na vakavinavinaka vua e na kedra maliwa na lewe vuqa.” (Same 109:30) Ena vakalougatataka o Jiova na noda cakacaka vagumatua ena gauna ni iVakananumi. Meda vakacila rarama mada ga me rawa ni levu era gole tani mai na butobuto me rawa kina ni tu vei ira “na rarama ni bula.”—Joni 8:12.