Porokaramu Vou ni Soqo ni Tabacakacaka

E vinakata o vuravura meda vakabauta ni iyau kei vuravura nikua ena tudei me tawamudu. Ia e duatani na ka e tukuna na Vosa ni Kalou. (1 Joni 2:​15-​17) E vukei keda na Vosa ni Kalou meda kila ni tawayaga na noda ‘kumuna na iyau vakavuravura.’ E vakarautaki gona na porokaramu vou ni soqo ni tabacakacaka me vakaukauataki keda na tamata ni Kalou. E kena usutu, ‘Kumuna na iYau Mai Lomalagi.’​​—⁠Maciu 6:​19, 20.

Na rai vakavuravura me baleta na iyau e okati vata kei na ka e tukuni ena Efeso 2:​2, na “turaga era sa kaukauwa e na macawa, a yalo sa cakacaka tiko e lomadra era sa dautalaidredre.” Me vaka ga na kena tu vakarawarawa na cagi eda ceguva, e vaka kina na rawarawa ni noda lomoci tale ga ena “yalo ni vuravura.” (1 Kor. 2:​12) Na tatara ni yalo oqo e kaukaua sara, oya na vuna e tukuni kina ni “kaukauwa.” Na porokaramu vou ni soqo ni tabacakacaka ena vukei keda sara ga meda biuta laivi na rai vakavuravura me baleta na iyau, da qai vakaliuca na ka e bibi duadua. (Maciu 6:​33) Ena vukei keda tale ga meda dau vakararavi vei Jiova nida cakacaka vakavunau, dina ga nida na sotava kina na dredre kei na veivakatovolei.

Me noda inaki dei mada ga meda tiko ena siga ruarua ni soqo oqo, “me da vakasamataka sara vakabibi na veika e da . . . rogoca” kina. (Iper. 2:⁠1) Meda vakavola na veika eda rawa ni vakavinakataka ena noda bula vaka kina ena cakacaka vakavunau. Nida tiko ena itekivu ni porokaramu vutuniyau vakayalo oqo me yacova ni lai cava, eda na vakayaloqaqataki, da qai vakaukauataki meda ‘kumuna na iyau mai lomalagi’!