Vakayagataka Vinaka Nomu Gauna ena Cakacaka Vakavunau
1 Se levu tu na ka me caka ena noda cakacaka vakavunau, ia sa vakalekalekataki na gauna sa vo. (Joni 4:35; 1 Kor. 7:29) Nida vakavakarau da qai tuvana vinaka noda cakacaka, ena levu kina noda gauna ni cakacaka vakavunau.
2 Vakavakarau: Ni bera nida lako ena cakacaka vakavunau, meda vakarautaka vinaka noda ivakamacala kei na ivola eda na solia. Ni oti na masu ena gauna ni sota meda gole sara ena vunau. Qo ena solia e levu na gauna vei keda meda cakacaka vakavunau kina ena yalava.
3 Ke o lesi mo liutaka na cakacaka vakavunau, me tekivutaki ena kena gauna donu. Me lekaleka ga—kua ni sivia na 10 se 15 na miniti. Ni bera nira gole yani ena cakacaka vakavunau, me vakamatatataki na yalava ena cakacakataki kei na tacida era na cakacaka vata tiko.
4 Nida Vunau: Ni oti na veilesi, meda kua tale ni dabe tiko se veitalanoa, ia meda lako sara ina yalava ni cakacaka. Ke o nanuma mo na biubiu totolo ena gauna ni cakacaka vakavunau tuva e dua na ituvatuva me kua ni vakacaraka na cakacaka. Nida cakacaka tiko vakaiwasewase, meda veinanumi ena noda kauaitaki ira eda cakacaka vata tiko mera kua ni wawa vakadede. Okati kina noda tatau mai vakavinaka vei koya na itaukeinivale e via veileti se qai sikovi koya lesu e tataleitaki.—Maciu 10:11.
5 Nida veisikovi lesu, rawa nida qiriti ira na tataleitaki meda vakadeitaka nira na tiko e vale se sega. Qo ena vakabula na gauna kei na ilavo. (Vkai. 21:5) Ke o nanuma ni na balavu nomu veisikovi lesu, rawa ni tuvanaki me caka ga vakavoleka na cakacaka ena nomu iwasewase lalai se me caka ena yalava oya na veisikovi lesu.
6 Eda sa bula donuya tu na gauna ni tatamusuki vakayalo. (Maciu 9:37, 38) Sa voleka ni oti na cakacaka qo. Koya gona, meda vakayagataka vakavinaka noda gauna ena cakacaka vakavunau.