‘Me Caka na Loma ni Kalou’
1. Na cava na usutu ni soqo lavotaki siga dua ni yabaki ni cakacaka ni isoqosoqo ni 2012? Na cava e veiganiti kina na usutu qori?
1 Eda buli ena lewa i Jiova. (Vkta. 4:11) Eda na sega ni vakayacora rawa na inaki e buli keda kina o Jiova ke da sega ni vulica da qai cakava na lomana. E sega ni rawarawa qori nida vala tiko kei na gagadre meda “cakava na ka e vinakata na yagoda kei na noda vakanananu” se na veika era “vakayacora na tamata ni vuravura.” (Efeso 2:3; 1 Pita 4:3; 2 Pita 2:10) Ke sega na veivuke ni Kalou e rawa nida ‘coko bulabula ena nona vinakata [na Tevoro] meda cakava na lomana.’ (2 Tim. 2:26) Na soqo lavotaki siga dua ni yabaki ni cakacaka ni isoqosoqo ni 2012 eda na vulica kina na sala meda vakayacora kina na ikatolu ni ka bibi ena masu a vakavulica o Jisu, oya me “caka na lomamuni.”—Maciu 6:9, 10.
2. Na taro cava ena saumi ena soqo?
2 Taro ena Saumi: Ni vakacagau tiko na soqo, saga mo sauma na taro qo: Me ikuri ni noda rogoca na Vosa ni Kalou, na cava e dua tale na ka bibi meda cakava? Eda na kila vakacava na loma ni Kalou vei keda? Na cava meda yalorawarawa kina ni vukei ira na matatamata kece? Eda na kunea vakacava na bula marau kei na vakacegu? Na cava moni vakaraitaka vei Jiova na itabagone? Eda na vakalougatataki vakacava nida cakava na loma ni Kalou? Na cava e bibi kina meda dau veivakauqeti da qai veivakayaloqaqataki?
3. Ena yaga vakacava vei keda na soqo lavotaki siga dua?
3 Mo kua sara ni calata na soqo qai vakarorogo vinaka ena porokaramu. Ena vulagi tiko ni soqo lavotaki qo e dua mai Peceli se na ivakatawa dauveilakoyaki. Ni bera gona ni tekivu na soqo se na gauna e cava kina o rawa ni vosa vua kei na watina ke vakawati. Kua ni “rogoca wale ga na vosa,” ia dou taleva vakavuvale na porokaramu ni soqo ni dou lesu i vale, veivosakitaka tale ga na sala mo dou vakayacora vinaka sara kina na loma ni Kalou.—Jeme. 1:25.
4. Na cava e bibi kina meda vakaliuca na loma ni Kalou?
4 Sa voleka sara na gauna mera vakarusai kina o ira era qara ga na veika e baleti ira, ra sega ni cakava na loma i Jiova. (1 Joni 2:17) Eda vakavinavinaka ni vakarautaka o Jiova na itukutuku taudonu qo me rawa nida vakaliuca kina na lomana!