Me Yaga na Sota ni Cakacaka Vakavunau

Na sota ni cakacaka vakavunau, e dua na isolisoli i Jiova eda rawa ni veivakauqeti kina ena loloma kei na caka vinaka me vaka ga na soqoni kece ni ivavakoso. (Ipe 10:24, 25) Na kena balavu me lima ina vitu na miniti, e okati kina nodra tuvanaki na mataveitacini, lesi ni yalava, kei na masu. (Ke veimuri na sota kei na dua tale na soqoni, me lekaleka sara.) E bibi me vakarautaka o koya e liutaka na sota na ka ena yaga vei ira na lai vunau ena siga qori. Kena ivakaraitaki, ke ra lewe levu na tiko ena Vakarauwai era sega ni vunau ena muanimacawa yani e liu, ena rairai vinaka me veivosakitaki ga na ka me tukuni vei itaukeinivale. Na ulutaga cava tale ena rairai yaga me veivosakitaki?

• Na vakatutu ni veivosaki ena iVola ni Soqoni—Noda Bula vaKarisito kei na Cakacaka Vakaitalatala

• Me tekivutaki na veivosaki ena dua na itukutuku butakatakata se ka e yaco tiko

• Me saumi vakacava na iulubale e matau ena yalava

• Na ka meda tukuna vua e dua e sega ni vakabauta na Kalou, tokona na bula vakaidewadewa, duatani nona vosa, sega ni kilai levu ena yalava na nona lotu

• Na ivakavakayagataki ni website na jw.org, na JW Library^®, se iVolatabu

• Na ivakavakayagataki ni dua na ivola se vidio ena iVukevuke ni Veivakavulici

• iWalewale ni cakacaka vakaitalatala, me vaka na vunau ena talevoni, vola ivola, vunau e matanalevu, veisikovi lesu, se vuli iVolatabu

• Vakadreti na bibi ni qaqarauni, yalorawarawa, itovo vinaka, rai donu, se dua tale na ka va qori

• Dua na ulutaga se vidio ena brochure Mo Gumatua ena Wilivola kei na Veivakavulici

• Sala mo drau veivukei se veivakayaloqaqataki kina kei na nomu itokani drau vunau vata

• Dua na tikinivolatabu e veisemati kei na cakacaka vakavunau se dua na irogo veiuqeti ni vunau