Au Mamadua ia Au Qai Daukaulotu

Au a sucu ena 1951 e Vienna, e Austria, ena dua na vuvale Katolika. Au dau mamadua, ia au vakabauta na Kalou, au dau masu tale ga vakalevu vua. Niu yabaki ciwa, e tekivu vulica o Ta na iVolatabu kei ira na iVakadinadina i Jiova, oti ya sa qai vuli o Na.

Keitou lewena na ivavakoso o Döbling e Vienna. Keitou dau cakava vata vakavuvale e levu na ka. Keitou wilika na iVolatabu, vulica vata, tiko ena soqoni, keitou veivuke tale ga ena soqo lelevu. Niu se gone, e dau vakavulici au o Ta meu lomani Jiova vakalevu. E dau masulaka tale ga meu painia kei taciqu. Ia ena gauna ya, e sega ni noqu isausau qori.

TEKIVU NA VEIQARAVI VAKATABAKIDUA

Au papitaiso ena 1965, niu yabaki 14. Ia e dredre meu vosa vei ira ena yalava ena cakacaka vakaitalatala. Au dau beci au tale ga, au vinakata meu taleitaki vei ira na noqu icaba. Ni oti ga noqu papitaiso, au tekivu vakailala kei ira na sega ni qaravi Jiova. Au taleitaka neimami veimaliwai, ia e ca noqu lewaeloma niu kila ni keimami sa dau vakailala vakalevu. E sega ni rawarawa meu veisau. Cava e qai uqeti au?

Rauta na gauna qori, e toki mai na ivavakoso e dua na goneyalewa yabaki 16, na yacana o Dorothée. Au qoroya vakalevu nona gumatua ena vunau e veivale. Au qase toka vua, ia au sega ni gumatua sara ena vunau me vakataki koya. Au kaya ga: ‘Au susu ena dina, ia o Dorothée e sega ni dua ena nona vuvale e tiko ena dina. E tiko kei tinana e tautauvimate, ia e sega ni calata na cakacaka vakavunau!’ E uqeti au nona ivakaraitaki meu vakalevutaka noqu qaravi Jiova. Toso na gauna, keirau veitomani kei Dorothée ena painia. Keirau tekivu painia veivuke, na gauna ya se vakatokai me vacation pioneer, toso na gauna keirau sa painia tudei. Au sa gumatua tale ga me vakataki Dorothée. E vukei au meu tekivutaka e dua na vuli iVolatabu. Toso na gauna, au sa sega ni rere meu vosa vei ira na tamata e veivale, e gaunisala, kei na so tale na vanua.

Ena imatai ni yabaki au painia tudei kina, e toki mai na neitou ivavakoso e dua na tacida tagane mai Austria na yacana o Heinz. E vulica na ka dina mai Kenada ena gauna e gade kina vei tuakana, e iVakadinadina i Jiova. E lesi me mai painia lavotaki ena neitou ivavakoso e Vienna. Au taleitaki koya sara ga ena gauna qori. E vinakata me daukaulotu, ia e sega ni noqu isausau qori. Oya na vuna au sega ni tukuna kina vua na lomaqu. Toso na gauna keirau sa qai veibuku, keirau vakamau, keirau tekivu painia vata e Austria.

NEIRAU ISAUSAU NA KAULOTU

E dau tukuna vakalevu vei au o Heinz ni vinakata me daukaulotu. A sega ni vakasaurarataki au, ia e dau taroga eso na taro veiuqeti me vaka: “Ni daru sega ni vakaluveni, rawa ni daru vakarabailevutaka nodaru veiqaravi vei Jiova?” Niu mamadua, au dau rerevaka gona meu daukaulotu. E dina niu sa painia tiko, ia sa rui dredre tale vei au na daukaulotu. Ia e vukei au tiko ga o Heinz meu vakasamataka tiko ga na isausau qori. E uqeti au tale ga meu dau kauaitaki ira vakalevu na tamata, meu kua ni kauaitaka tiko ga noqu mamadua. E yaga sara ga vei au nona ivakasala.

Toso na gauna, au sa qai taleitaka na cakacaka vadaukaulotu, keirau mani vakalewe fomu ena vuli i Kiliati. Ia e vakatututaka na ivakatawa ni valenivolavola ni tabana meu vakavinakataka mada noqu vosa vakavalagi. Oti e tolu na yabaki sa vinaka sara noqu vosa vakavalagi, keirau sega ni namaka me keirau lesi ena ivavakoso vosa vakaYugoslavia e Salzburg, e Austria. Keirau veiqaravi e keri me vitu na yabaki, wili kina e dua na yabaki ena veiqaravi vakaivakatawa ni tabacakacaka. E dredre na vosa vakaSerbo-Croatia, ia e levu na neirau vuli iVolatabu.

Ena 1979 keirau kerei me keirau “gade vakalekaleka” i Bulgaria. E tabu tu na cakacaka vakavunau ena vanua qori. E sega ni rawa gona ni keirau vunau ena neirau gade. Ia keirau kauta vakavuni yani eso na noda ivola lalai me soli vei ratou na lima na tacida yalewa ratou tiko e Sofia, na kena koroturaga. Dua na ka noqu domobula, ia e vukei au o Jiova ena ilesilesi marautaki qori. A rawa ni ratou vesu na tacida yalewa qo, ia na nodratou yaloqaqa kei na mamarau e uqeti au meu solia noqu vinaka ena vanua e lesi au kina na isoqosoqo i Jiova.

Ni oti toka e dua na gauna, keirau vakalewe fomu tale e Kiliati, ena gauna qo sa vakadonui mai. Keirau nanuma sara ga ni keirau na tiko ena kena vuli vakavalagi e Merika. Ia ena Noveba 1981, sa tekivu tale ga ena valenitabana e Wiesbaden, e Jamani, na vuli vata ga e caka tiko e Kiliati. Keirau mani tiko kina ena vosa vakaJamani, e rawarawa sara ga vei au. Keirau na lesi mada i vei?

VEIQARAVI ENA DUA NA VANUA E LEVU KINA NA IVALU

Keirau lesi i Kenya! E kerei keirau na valenitabana e Kenya me keirau lai veiqaravi ena dua tale na vanua voleka, o Uganda. Sivia ni tini na yabaki yani e liu, e kutaka na matanitu o Uganda na mataivalu e liutaka na Turaganivalu o Idi Amin. Ena nona veiliutaki ena veiyabaki qori era mate kina e vica na udolu, e vica vata na milioni era vakararawataki. Oti qori ena 1979, e kutaki tale na matanitu o Uganda. Na ituvaki qori e vakavuna meu lomalomaruataka na toki ena vanua e yaco tu kina na ivalu. Ia e vakarautaki keirau vinaka na vuli e Kiliati me keirau nuitaki Jiova. Keirau mani vakadonuya.

Sa qai dredre ga na bula e Uganda. E sega ni vakarautaka rawa na matanitu na wai, na livaliva, kei na so tale na ka yaga. Sa sega ni rawa na qiri. Era veivanavanai na lewenivanua, era butako, vakabibi ena bogi. Ni sa buto, levu era sa tu ga vakadua e vale, era vakanuinui tu se masulaka mada ga me kua ni dua e mai butako se vakamatei ira. Ni dredre tu na ituvaki qori, era toso tiko ga vakayalo na mataveitacini!

Ena 1982, keirau yaco yani kei Heinz e Kampala, na koroturaga kei Uganda. Ena neirau imatai ni lima na vula, keirau tiko ena nodrau vale e dua na veiwatini o Sam kei Christina Waiswa, e lima na luvedrau, kei na va tale na wekadrau. Ratou dau kana ga vakadua ena dua na siga, ia ratou dau veikauaitaki. Keirau vulica vei ratou e levu na ka e yaga ena neirau kaulotu. Kena ivakaraitaki, keirau vulica na kena vakayagataki vakavuku na wai me keirau sili kina, keirau vakayagataka tale na neirau wai ni sili qori e valelailai. Ena 1983, keirau sa qai kunea e dua na neirau vale e Kampala, e vanua vinaka toka.

Keirau marautaka vakalevu na cakacaka vakaitalatala. Au nanuma lesu ni keirau solia rawa e sivia ni 4,000 na mekesini ena dua na vula! Ia keirau taleitaki ira vakalevu na lewenivanua. Era doka na Kalou, era vinakata tale ga mera veivosakitaka na iVolatabu. E voleka ni 10 ina 15 neirau dui vuli iVolatabu. Levu tale ga na ka keirau vulica vei ira neirau gonevuli. Kena ivakaraitaki, keirau vuli vakalevu ena nodra mamarau tu ga nira taubale ina soqoni e veimacawa, era sega ni vosakudrukudru, era dau matadredredre tu ga.

Ena 1985 kei na 1986, e rua tale na nodra ivalu na mataivalu e Uganda. Keirau raici ira na gone lalai era taura tu na dakai lelevu, era sa sotia tu ra qai yadrava na gaunisala. Ena gauna qori, keirau masuti Jiova me solia vei keirau na yalomatua kei na lomavakacegu ni keirau vaqarai ira tiko na tataleitaki ena cakacaka vakavunau. E sauma o Jiova na neirau masu, ni keirau sotava e dua e via vulica na iVolatabu, e oti sara ga na neirau rere.

Keirau marautaka tale ga na vunau vei ira na vulagi. Kena ivakaraitaki, keirau sotava e dua na veiwatini mai Tatarstan (Rusia e Loma) o Murat kei Dilbar Ibatullin, rau vulica na iVolatabu. E vuniwai o Murat. Rau papitaiso sara, ena gauna qo rau se qaravi Jiova tiko ga. Oti qori au sotava e dua na marama ni Ukraine o Tatjana Vileyska, a voleka sara tu ga ni vakamatei koya. Ni papitaiso oti o Tatjana, e toki tale i Ukraine, oti qori e veiqaravi sara me vakadewataka eso na noda ivola.a

ILESILESI VOU

Ena 1991 ni keirau gade tiko kei Heinz e Austria, e volavola yani na valenitabana me tukuna ni sa dua na neirau ilesilesi vou, o Bulgaria. Ni sa oti na veiliutaki vakominisi ena Tokalau kei Urope, sa tara tale na noda cakacaka vakavunau na iVakadinadina i Jiova e Bulgaria. Me vaka sa tukuni oti mai, keirau a kauta vakavuni kei Heinz eso na noda ivola ena vanua qori ni se vakatabui tu kina noda cakacaka. Ia qo keirau sa lesi kina me keirau lai vunau.

A tukuni me keirau kua ni lesu tale i Uganda. Keirau a sega gona ni lesu tale ina neirau vale ni daukaulotu me keirau lai kauta mai na neirau iyaya, se vakamoce vei ira na mataveitacini. Ia keirau lako ina Peceli e Jamani, e vakarautaki e dua na motoka me keirau gole kina i Bulgaria. Keirau lesi ena dua na iwasewase lailai e rauta ni 20 na kena dautukutuku e Sofia.

Levu tale na ka dredre keirau sotava e Bulgaria. Dua, keirau sega ni kila na kena vosa. Kena ikuri, na ivola ga e tabaki ena vosa vaBulgaria, na The Truth That Leads to Eternal Life kei na My Book of Bible Stories. E dredre gona me keirau tekivutaka na vuli iVolatabu. Ia era gumatua tiko ga na tacida ena iwasewase lailai qori. E raica vinaka tu qori na lotu Orthodox, sa tekivu sara ga e keri na nodra veitusaqati.

Ena 1994 sa sega ni qai vakalawataki noda cakacaka na iVakadinadina i Jiova, era nanuma kina e levu nida lotu rerevaki. Era vesu eso na tacida tagane. E kaburaka na tabana ni itukutuku e levu na lasu me baleti keda. Era kaya nida via vakamatei ira na luveda kei ira na tacida ni sega ni soli vei ira na dra. E dredre sara ga me keirau vunau vakaveiwatini. Keirau dau sotavi ira vakalevu na lewenivanua era cudrucudru, karalaki keirau, ripotetaki keirau vei ira na ovisa, era vakaviriki keirau tale ga. E sega ni rawa ni vakau mai na noda ivola, e dredre tale ga me redetaki eso na vanua me caka kina na soqoni. Era curuma mada ga yani na ovisa e dua na noda soqo ni veiwasewase. E vou sara ga vei keirau na ivakarau ni bula va qo. Era duatani sara vei ira na lewenivanua e Uganda nira dau via vulica na iVolatabu! Keirau vosota vakacava?

Keirau marautaka na veimaliwai kei ira na mataveitacini. Era marautaka nira sa mai kila na ka dina, era vakavinavinakataka tale ga na neirau dau veivuke. Keimami dau veivukei, keimami veivolekati tale ga. Keirau vulica ni rawa ni keirau marau tiko ga ena neirau ilesilesi, ke keirau dau lomani ira tiko ga na tamata.

Toso na gauna, sa vinaka sara na ituvaki. E vakalawataki tale na noda cakacaka e Bulgaria ena 1998, e vakadewataki tale ga e levu na noda ivola ena vosa qori. Ena 2004, e vakatabui e dua na vale vou ena valenitabana e kea. Nikua, sa 57 na ivavakoso e Bulgaria, sa 2,953 na kena dautukutuku. Ena yabaki vakacakacaka sa oti, era tiko ena iVakananumi e 6,475. Dua na gauna, a lima ga na tacida yalewa ratou tiko e Sofia, ia qo sa ciwa na ivavakoso! Keirau vakadinadinataka sara ga na ka e tukuna na iVolatabu, “o koya e lailai sara ena yaco me le duanaudolu.”​—Aisea 60:22.

KEIRAU VOSOTA ESO NA KA DREDRE

Au sa tautauvimate. Vica na yabaki sa oti, e laurai vei au eso na vuce, dua mada ga ena noqu mona. Au qaravi vakavuniwai, au lai sele tale ga e Idia rauta ni 12 na aua na kena dede me kau tani kina e levu na vuce qori. Oti noqu vakabulabula ena valenitabana e Idia, keirau lesu tale ina neirau ilesilesi e Bulgaria.

Ena gauna tale ga qori e tauvi Heinz e dua na mate ni nave, e sega ni dau tauvi ira e levu, e matenikawa, ya na Huntington. E dredre me taubale, vosa, se me lewa nona yavavala. Ni sa kaukaua vua na mate qori, e levu na gauna sa vakanuinui sara tu ga vei au. Eso na gauna au dau oca sara ga, au dau lomaleqataka keu sa na sega ni qaravi koya rawa. Ia e dua na cauravou o Bobi e dau sureti Heinz vakalevu me rau lai vunau vata. Sega ni dau maduataka o Bobi na kena ituvaki o Heinz, nona vosa, nona yavavala tu ga. Na gauna kece au kerea kina na veivuke nei Bobi me mai vukei Heinz, ena lako tu ga mai. Keirau sega ni vakaluveni kei Heinz, ia keirau raica ni soli Bobi mai o Jiova me luvei keirau!​—Mari. 10:​29, 30.

E tauvi Heinz tale ga na kenisa. Ka ni rarawa, ni takali na noqu daulomani ena 2015. Au lomaleqa sara ga, dua na ka noqu nanumi koya. Ia ena noqu vakanananu, vaka ga e se bula tiko! (Luke 20:38) Au dau vakasamataka nona dau vosa vakayalovinaka, kei na nona dau vakasalataki au e veisiga. Au vakavinavinakataka vakalevu na gauna kece keirau veiqaravi vata tu mai kina ena yalodina.

AU VAKAVINAVINAKATAKA NA VEITOKONI I JIOVA

E tokoni au tu ga o Jiova ena gauna dredre kece qori. E vukei au meu valuta noqu mamadua, meu lomani ira tale ga na lewenivanua ena noqu daukaulotu. (2 Tim. 1:7) Au vakavinavinakataka vei Jiova ni sa veiqaravi tale ga vakatabakidua na taciqu yalewa. Nikua, sa veiqaravi tiko kei watina ena tabacakacaka vosa vakaSerbia e Urope. E saumi kina na masu nei Ta ena vica vata na yabaki sa oti!

Niu dau vulica na iVolatabu, au vakila sara ga na vakacegu. Ni dredre na ituvaki, au vulica meu dau ‘masu vagumatua’ me vaka e cakava o Jisu. (Luke 22:44) Dua na sala e saumi kina noqu masu, ya ena nodra dau lomani au na mataveitacini ena ivavakoso o Nadezhda, e Sofia, era yalovinaka tale ga vei au. Era dau sureti au, era qai dau vakavinavinakataki au, au marau kina vakalevu.

Au dau vakasamataka vakatitobu na veivakaturi. Au dau raitayaloyalotaka ni rau sa duri tu ena mata ni neitou katuba o rau noqu itubutubu, totoka tu na kedrau irairai me vaka ga ena nodrau siga ni vakamau. Au raici taciqu ni vakasaqa tiko. Au raitayaloyalotaki Heinz ni duri tu ena yasa ni nona ose. Niu cakava qori, e oti kina noqu yalolailai, au qai vakavinavinakataki Jiova vakalevu.

Niu raica lesu na veika vinaka e cakava o Jiova ena noqu bula kei na veika vinaka sa tu qo e liu, au duavata kei na ka e vola o Tevita ena Same 27:​13, 14: “Au na tu e vei ke sega vei au na vakabauta niu na raica na vinaka i Jiova ena nodra vanua na bula? Nuitaki Jiova, mo yaloqaqa qai dei na lomamu. Io, mo nuitaki Jiova.”