Dei tu ga Noqu Veiwekani kei Jiova Niu Vesu

Ena 1966 keitou lesu tale i Ukraine. Au vakasamataka vinaka tu niu se yabaki va, au lai sikovi tutu e valeniveivesu. Keirau vodo sitimanivanua kei tinaqu mai Kryvyi Rih e Ukraine, ina valeniveivesu e Mordovia mai Rusia. E soli ga e rua na aua me keirau veitalanoa kei tutu, ratou tiko tale ga na ovisa, ratou vakatara me keveti au o tutu.

Nuitaki Jiova Tiko ga e Koronivuli

Niu tiko e Ukraine niu se gone, e levu na gauna e vakatovolei noqu nuitaki Jiova. Me kena ivakaraitaki, niu sa tekivu vuli, e vinakata na matanitu me keimami dara na badge ena neimami sulu ni vuli e laurai kina na taba kei Lenin.a Oti e vica na yabaki, e vinakati tale me keimami dara na ioronidomo me ivakatakilakila ni keimami tokoni Lenin. Au sega ni via dara na ivakatakilakila ni politiki qori niu kila ni dodonu me qaravi duadua ga o Jiova.

Rau vukei au noqu itubutubu meu vakatulewataka meu qaravi Jiova, rau qai vosovoso ni vakamacalataka na vuna eda tawaveitovaki kina ena veika vakapolitiki. Rau uqeti au tale ga meu gugumatua ena vuli ni na lagiti kina o Jiova.

Dua na siga e gole mai e dua na dauvolaitukutuku ni mekesini na Nauka i religiia (Science and Religion). E kena inaki na mekesini qo me rawai ira e levu mera kua ni vakabauta na Kalou. Ratou kauti au noqu qasenivuli ena idabedabe e liu ni vakamacala o dauvolaitukutuku, e saga me rawai ira na gonevuli ena nona ivakamacala ya ni sega ni bula tiko na Kalou.

Oti qori ratou kauti au na qasenivuli vei dauvolaitukutuku me vosa vei au. E tarogi au se matalotu cava au lewena, au kaya, “Au dua na iVakadinadina i Jiova.” E sega ni kaya e dua na ka, e vakavinavinakataka ga noqu vakarorogo vinaka. Ratou cati au sara ga noqu qasenivuli!

Keitou Nuitaki Jiova Tiko ga Vakavuvale

Keitou nuitaki Jiova vakavuvale me vukei keitou, na kena tabaki na ivola vakaivolatabu e vale kei na kena veisoliyaki. E ivakatawa ni tabacakacaka o Ta ena lomanivanua kei Ukraine, e dau sikova na ivavakoso kei na iwasewase lalai.

Ena yakavi ni Feperueri 1978, ni vo e rua na siga me sucu kina na taciqu o Pavlik. Au suka mai na vuli e kabuacara tu na iyaya e loma ni vale. Eratou vaqaqara na ovisa e vale qai kauta kece na ivola vakaivolatabu.

Ena siga tarava, era vakaraici au kei taciqu na qasenivuli nira nanuma ni rau yamata ni Merika na noqu itubutubu. Toso na gauna, ra qai liaca na qasenivuli ni cala nodra rai qai so na lewe ni noqu kalasi era mai iVakadinadina!

Ena 1981, e caka tale na vaqaqara e vale. Dina niu se bera ni yabaki 18, e vakarota na ovisa me keitou gole o au, o ta kei tutu me keitou lai vakatarogi. Ratou vakarerei au na vakailesilesi me ratou na biuti au e valeniveivesu. E yalataka e dua na turaga e sega ni vakaisulu ni ovisa ni na vinaka noqu bula keu tokoni ratou. E dua na ovisa e veivakarerei, dua tale na ovisa e saga me vakalomavinakataki au. Nodrau saga me rau rawai au, rau kaya kina niu na vesu me vaka ga e caka vei tamaqu, noqu tutu kei momo. Qori e vakadeitaka vei au keu mani vesu, au na rawa niu vosota ena veivuke ga i Jiova.—Filipai 4:13.

Nuitaki Jiova Tiko ga Niu Vesu

Niu yabaki 18, au ciqoma e dua na ivola meu vakaitavi ena mataivalu. Au sega ni via curu ena mataivalu, au mani vesu tu vakawawa meu wawa veilewai. Au vesu vata kei ira na le 85 na tagane ena dua na rumu levu, e 34 ga na idavodavo qai kemami dau veiveisau na moce kina. E vakatarai ga me keimami sili vakadua ena loma ni macawa.

Niu curu yani ena sela, e sogo vakaukaua na katuba era vakaraici au tu mai eso na ilala tagane, ra qai tarogi au na vuna au vesu kina. Au rere sara ga, au mani vakasamataka na italanoa kei Taniela, e sega ni vakaleqai ni biu ena qara ni laione. E uqeti au qori meu nuitaki Jiova qai lomavakacegu tu ga.—Aisea 30:15; Taniela 6:21, 22.

Ni oti na vakayakavi, e taroga e dua na kaivesu noqu vakabauta. Sega ni dede e vagagalu na loma ni sela nira sa vakarorogo kece tu na vo ni kaivesu. Au vakamacala vei ira ena loma ni va ina lima na aua. Dua na ka noqu vakavinavinakataki Jiova nona veivuke!

Ni bera na veilewai, au kerei Jiova me solia vei au na vuku kei na yaloqaqa meu tutaka noqu vakabauta. E kaya na dauveibeitaki ni noqu vakabauta e iulubale wale ga meu kua ni curu ena mataivalu. Au saga meu vakamacalataka ena mataveilewai ni na rarawa na Turaga Cecere ni lomalagi kei na vuravura keu curu ena mataivalu. Ia e totogitaki au ga na mataveilewai ena 1982 meu vesu me rua na yabaki.

Au marau ni lima tale na tacida keitou a vesu vata. Dina ni vakatarai me keitou veitalanoa me vica ga na miniti, keitou dau saga me keitou veivosakitaka e dua mada ga na tikinivolatabu. Ia e sega neitou iVolatabu. Eso na ivola era vola mai na itokani kei na vuvale e dau volai tu kina na tikinivolatabu. Keitou dau kunea tale ga na tikinivolatabu ena so na ivola era tu e valeniveivesu!

Nuitaki Jiova Tiko ga Niu Qaravi Vakavuniwai

Ena 1983 niu se vesu tiko, e yaco e dua na vakacalaka. E lutu mai ena dua na misini ni cakacaka na kaukaumea e rua na tani na kena bi, e tau sara ga e dakuqu. Au davoraki au i ra, qai raramusumusu na sui ni yavaqu imawi.

Au masuti Jiova me vakaukauataki au meu vosota na mosi. E tukuna o nasi niu rawa ni vosota keu kaila qai vosa ca. Ia au sega ni cakava qori au lagata ga noda sere ni soqosoqo.

Meu yaco i valenibula, au cicivaki ena dua na lori, vodo ena waqa, kei na lori ni valenibula. E ono na aua na ilakolako qori qai lako tani vei au e levu na dra. Au kila tu ga ni na vinakati meu sele, au mani masuti Jiova me solia na vuku vei ira na vuniwai, mera doka tale ga noqu vakatulewa me baleta na dra. Niu vakamacala vei vuniwai, e sega ni via rogoci au, au mani vakamasuti koya me doka noqu vakabauta. Au tukuna vua niu na tu vakarau meu beitaki keu mani leqa. Au lomavakacegu ni vakadonuya me seleti au ni sega ni vakayagataka na dra. Ia ka ni rarawa ni vinakati me musu e dua na tiki ni yavaqu imawi.

Oti na veisele au malumalumu sara ga. Ena loma ni vica na macawa ratou nanuma na vuniwai niu na mate. Ni rau rogoca qori noqu itubutubu, rau tuvanaka meu kania e veisiga e dua na sepuni denioni, dua na yaloka kei na ivakarau bata. Dua na yakavi, e kaya na nasi meu kania na kakana bulabula qori me vinaka kina na yagoqu. E maroroi tiko ena katoniwaililiwa e toka voleka, e vinaka sara mai na kakana au dau kania e valeniveivesu. Ratou na ciqoma ga vakadua na ovisa na vakau mai ni yaya qori.

E sega ni lekaleka na liga i Jiova. (Aisea 59:1) Ni dau veisau noqu vadreti, ratou dau wasea vei au na nasi na kedratou kakana. Ratou dau biuta tale ga ena katoniwaililiwa na kakana bulabula. Au lai nanuma kina na italanoa ena iVolatabu me baleta na yada e sega ni oti rawa na waiwai ena nona saqa.—1 Tui 17:14-16.

Toso na gauna au sa bulabula mai. Era vakauta mai noqu vuvale kei na itokani e 107 nodra ivola, e dau vakacegui au qai vakayaloqaqataki au. Au sauma lesu kece nodra ivola qori. Eso tale ga na taciqu era vesu tu ena dua tale na vanua, era dau vakau iyaya mai!

Oti e rua na vula, au sa qai rawa ni sisili vakataki au! Dua na ka noqu vinakata meu lesu vei ira na tacida era vesu tu me keimami veimaliwai tale.

Ni vakarautaka tiko na vuniwai na ka vakaivola me baleta noqu vakarau suka, e kacivi au ena nona ofisi qai taroga e levu na ka me baleta noqu vakabauta. Sa qai tataunaka meu dei tiko ga ena noqu vakabauta. Au sega ni tadra me tukuna qori vei au e dua e vaisulu tu ni sotia!

Ena Epereli 1984, au lai tiko ena veilewai me vakadeitaki noqu sere mai valeniveivesu, e qai tarogi keu na curu ena mataivalu se sega. Au mani sauma ni sega ni vakaibalebale nodratou taro baleta niu sa yavaidua tu qai vakaititoko. Ratou mani taroga tale: “Cava o na cakava ke vinaka ruarua tu na yavamu?” Au tukuna niu na sega ga ni curu ena mataivalu qai yalodina tiko ga vua noqu Kalou. Ratou kaya niu na vesu tiko me yacova ni oti na kequ itotogi. Ia au marau niu qai sere ni vo e rua na vula kei na 12 na siga.

Nuitaki Jiova Tiko ga Niu Sere Mai Valeniveivesu

Oti e dua na yabaki noqu sere, e soli vei au na yavakau. E veimataka, ena taura e dua na aua meu daramaka. Ena vulaibatabata e dau dredre noqu vakayagataka na yavakau, ni sega ni dau drodro vinaka na dra e yavaqu. Tekivu mai na gauna au yabaki 19 kina au sa sega ni rawa ni qai cici tale, ia au vanamata tu ena vuravura vou meu na cakava qori.—Aisea 35:6.

E dredre meu kunea e dua na cakacaka nira sega ni vinakata na kabani e dua e vakaleqai tu na yagona. Dina niu yava kau, au se sega vakadua ni cakacaka ena dua na vanua meu dabe tu ga. Au dau ripea motoka, au taravale tale ga.

Ena 1986, au vakamau kei na dua na tacida yalewa o Svitlana. Me vakataki au ga, rau qaravi Jiova na nona itubutubu kei rau na tukana. E dau tukuna tu ga nona marautaka neirau vakadeitaka ena gauna ni veibuku me keirau vakaliuci Jiova tu ga ena neirau bula vakawati.

Rau vulica na tarataravaki na luvei keirau o Olia kei Volodia, qai vukei au ena vakavinakataki ni vale keitou tiko kina. Ni rau tubu cake tiko, rau marautaka na veivuke ena taravaki ni Vale ni Soqoni. Rau painia tudei tale ga. E veiqaravi ena tabana ni tarataravaki o Olia, e qase ni ivavakoso o Volodia.

E dau tokoni au tu ga o Svitlana, e vukei au meu qarava vinaka noqu itavi ena ivavakoso. Ena veiyabaki ni 1990, levu na ivavakoso e Ukraine era lewena e sivia ni 200 na dautukutuku, qai dua se rua na kena qase ni ivavakoso. Ena muanimacawa ena loma ni dua na vula, au dau kauta na ivola vakaivolatabu ena lomanivanua e Ukraine.

Nuitaki Jiova Tiko ga ena Gauna Qo

Ena 2022, keirau vakatulewataka kei Svitlana me keirau biuta neirau vale e Kryvyi Rih, qai lai veiqaravi ena dua na ivavakoso e Austria.

Niu se gone au dau vuli ena nodra ivakaraitaki na wekaqu era iVakadinadina. Dina nira sotava e levu na ituvaki dredre, era lomavakacegu na ka era taukena. E vukei keirau na iVolatabu me keirau kilai koya vinaka na Dauveibuli qai veiwekani voleka kei koya. (Jemesa 4:8) Qori e vakainaki kina neirau bula. Ena ituvaki dredre kece au sotava, au marau niu rawa ni vakalagilagi Jiova ni ganiti koya.