‘E Sega ni Rawa Meda Sega ni Tusanaka’
1 E dikeva matua tiko o Jisu Karisito na cakacaka vakavunau. (Maciu 28:20; Mari. 13:10) Era bula ena vunau e voleka ni lewe ononamilioni na daukacikacivaki ena 234 na veimatanitu, ia me kua nida nanuma ni sa cava na noda vunau. Me yacova ni sa lewa mai na Kalou me tini na noda cakacaka, ‘e sega ni rawa meda sega ni tusanaka’ na veika eda sa vulica.—Caka. 4:20, VV.
2 Vakararavi Ina Yalo ni Kalou: E vakadredretaka vei keda e levu na ka o Setani ena nona saga meda yalolailai. (Vkta. 12:17) Sa qai tiko na yagoda ivalavala ca e dau vakaleqai keda vakalevu. Na veika oqo e rawa ni vakamuai keda tani mai na ka bibi duadua, oya na cakacaka vakavunau. Ia, ke da nuitaki Jiova, ena vukei keda na yalona meda vorata rawa kina na cava ga eda sotava.
3 A kaukaua sara na vakacacani ni ivavakoso lotu Vakarisito ena imatai ni senitiuri, ia era a masuta na Kalou na mataveitacini me vukei ira mera tukuna tiko ga na nona vosa ena doudou. A rogoca o Jiova na nodra masu, a vakaukauataki ira ena yalona me rawa nira yalogu kina, mera dei tale tiko ga ina nodra vunau. Yaco kina mera doudou ena nodra vunautaka tiko ga na itukutuku vinaka.—Caka. 4:29, 31; 5:42, VV.
4 Kua ni Rerevaka na Vosa ni Veivakacacani: E rawa ni vakayalolailaitaki keda na nodra nanuma na lewe vuqa me baleti keda, se vosa gaga e dau tabaki. Ia, meda nanuma matua tiko na doudou ni nodratou vosa o Pita kei iratou na vo ni yapositolo vei ira na lewe ni Sanadrini, e volai ena Cakacaka 5:29-32. Me vaka ga a vakadinata o Kamelieli na qasenivuli ni Lawa ni na sega ni rawa ni vakarusai na cakacaka ni Kalou. E sega ni vakayacori rawa ena noda kaukaua. Na cakacaka vakaitamera oqo e tokona tiko na Kalou, ni o koya duadua ga e rawa ni vakayacori kina!—Saka. 4:6.
5 Meda vakamasuti Jiova ena veisiga me vukei keda na yalona meda yalogu ni kacivaka na itukutuku vinaka. Meda duavata mada ga kei Jeremaia ena noda kaya ni itukutuku ni Matanitu e vaka na bukawaqa e sogo tu ena suida. (Jere. 20:9) Ena sega ni rawa nida galuvaka!