Soqoni Vata Meda Vakacaucautaki Jiova
1. Cava na usutu ni soqo ni tikina? Cava e dodonu kina meda vakacaucautaki Jiova?
1 O Jiova e kaukaua duadua, e sega ni vakamacalataki rawa nona vuku, e dau lewadodonu, qai vatuka sara ga ni loloma. Ni Dauveibuli, Dausolibula, qai Turaga Sau ni lomalagi kei na vuravura, e dodonu meda sokaloutaki koya duadua ga. (Same 36:9; Vkta. 4:11; 15:3, 4) Na Soqo ni Tikina, “Vakalagilagia na Kalou” ena yabaki oqo ena vaqaqacotaka noda guta meda vakacaucautaki koya ni Kalou dina duadua ga.—Same 86:8-10.
2, 3. Ena vakayacori e vei na soqo ni tikina ena yabaki oqo, ia e vei mo na tiko kina?
2 Ena vakayacori na soqo ni tikina ena yabaki oqo e Suva vaka kina mai Ba. Na soqo ni tikina e Suva ena caka tiko ena National Stadium ena 26-28 Sepiteba. Ena caka tiko ena vosa vakaviti kei na vosa vakavalagi na soqo. O ira kece era nanuma mera rogoca na porokaramu ena vosa vakavalagi mera na gole ina soqo ni tikina oqo. Na soqo ni tikina mai Ba ena vakayacori ena Govind Park mai na 17-19 Okotova. Ena vakayagataki na vosa vakaviti vaka kina na vosa vakaidia ena porokaramu kece.
3 Mera na tiko ena soqo ni tikina e Suva na ivavakoso e Navua, Suva, Serea, Nausori, Levuka, kei Korovou. Na vo ni ivavakoso era tiko e Viti Levu era na qai tiko ena kena mai Ba. Ia, ena sega ni dua na kena leqa ke rawarawa vei ira e so na mataveitacini ena ivavakoso lalai me vakataki Korolevu Baravi mera na tiko ena kena e caka e Suva. Me vaka ni na sega ni caka na soqo ni tikina mai Vanua Levu ena yabaki oqo era na rairai lakova na mataveitacini na soqo ni tikina e Suva se i Ba qai vakatau ena kena ga e voleka se rawarawa vei ira. O ira tale ga na ivavakoso era tu ena yanuyanu lalai era na rairai tiko tale ga ena kena e rawarawa vei ira. Kerei ga me nanumi ni na vakayacori tiko na porokaramu ena vosa vakavalagi ena soqo ni tikina e Suva.
4. Ena yaga vakacava na noda lalawa vakailiu?
4 Lalawa Vakailiu: Me yaga vei keda na magiti vakayalo sa vakarautaka tu o Jiova, e bibi meda lalawa vakailiu. (Efeso 5:15, 16) O sa veivosakitaka tu beka na vanua mo na vakaicili kina, nomu sala ni veitosoyaki vaka kina na nomu na vagalalataki mai nomu cakacaka se koronivuli? Ke o vakaicili vei ira nomu itokani se o ira na wekamu se otela, e dodonu mo veivosakitaka sara ga o iko. Kua tale ni o qai vakaberaberataka tiko na veika bibi oqori me qai caka sara ni sa voleka ga mai na kena gauna. Ke o vakaberabera ni kerea nomu siga ni gade, o sa na calata kina e dua na tiki ni soqo marautaki oqo. E gadrevi meda tiko kece ena gauna taucoko ni soqo.
5. Cava meda totolo kina ina vanua ni soqo ni tikina ena veisiga?
5 Me nomu isausau mo yaco totolo yani ina vanua ni soqo ena veisiga taucoko. O na rawa ni vakacegu vinaka kina ena nomu idabedabe ni bera ni lagati na sere qai vakarautaki na nomu vakasama me ciqoma na ivakasala ena tau mai. Ena dola tiko na vanua ni soqo ena walu na kaloko ena veimataka. Kerei mo ni kua ni dau maroroya na nodra idabedabe o ira oni sega ni lako vata yani.
6. Na cava eda kerei kina meda sa kauta sara tiko ga yani na keda ivaqa?
6 E kerei mo ni kauta tiko ga mai na kemuni ivaqa, me kua tale ni qai lai vaqarai tiko ena gauna ni vakacegu. Nomuni veitokoni ena ituvatuva oqo ena vukea na marautaki ni veimaliwai vinaka qai solia na gauna meda veimaliwai tale ga kina kei ira eda vakabauta vata. (Same 133:1-3) Kerei me nanumi tiko ni na sega ni vakatarai ena vanua ni soqo na bilo se tavaya iloilo, kei na gunu yaqona ni Viti se yaqona ni valagi.
7. E rawa vakacava nida vakarautaka na lomada me baleta na soqo ni tikina?
7 Vakarorogo Mo Vuli: O Esera e dau masu vagumatua me vakarautaka na lomana me ciqoma na vosa ni Kalou. (Esera 7:10) E vagolea na lomana ina veivakavulici i Jiova. (Vkai. 2:2) Eda rawa tale ga ni vakarautaka na lomada ina soqo ni tikina oqo ena noda vakasamataka vakatitobu na usutu ni soqo da qai veivosakitaka vata kei ira na lewe ni noda vuvale nida se bera mada ga ni biubiu mai vale.
8. Na cava e rawa ni vukei keda me dei tiko ga kina na noda vakasama ena porokaramu? (Raica na kato.)
8 E rawa ni dreta noda vakasama e vuqa na ka e yaco se rorogo nida tiko ena soqo ni tikina levu vaka oqo. E rawarawa sara ga kina ni vagolei tani noda vakarorogo vei koya na tacida e vunau tiko. Ena rawa ni yali tale ga kina na veika bibi e dodonu meda rogoca. E yaga na vakatutu e tiko ena kato meda vakavinakataka kina na noda vakarorogo.
9, 10. Eda na vakaraitaka vakacava nida nanumi ira na vakarorogo, ia eda na vakacaucautaki Jiova vakacava?
9 Dau Veinanumi: E rawa ni vakayagataki na itaba kei na camcorder ena gauna e caka tiko kina na vunau, ia mera kua ni vakasosataki na vakarorogo, e vinaka mo na veitaba ga mai na vanua o dabe tiko kina. Me qarauni na mobile phone me kua tale ga ni veivakasosataki. Me kua tale ga ni dua na noda iyaya vakalivaliva me sucu mai na ivurevure ni livaliva e vakayagataki tiko ena soqo ni tikina.
10 Eda sa vakanamata dina tu ena noda vakasoqoni vata me vakacaucautaki kina o Jiova! Da vakadeitaka mada ga noda vakacaucautaki koya nida tiko ena siga ni soqo kece, da vakarorogo matua da qai vakaitovotaka sara ga na veika eda sa vulica mai kina.—Vkru. 31:12.
[Kato ena tabana e 3]
Ni O Vakarorogo Tiko ena Soqo ni Tikina
▪ Vakasamataka na ulutaga ni vosa
▪ Dikeva na veitikinivolatabu
▪ Vola e so na tikina bibi
▪ Toqa na tikina mo na vakayagataka
▪ Railesuva na veika o a vulica