Na Cakacaka e Tokona na Kalou
1 E sega ni levu vei ira na dauveiqaravi ni Kalou edaidai era vuli vinaka, vutuniyau, se ra vakaitutu lelevu. E vakavuna na nodra vakawalena kina e so na noda cakacaka vakavunau me vaka ga e sega tu na betena. (Aisea 53:3) Ia, na cakacaka ni veivakavulici ena iVolatabu eda cakava tiko oqo e sa vakacegui ira e vica vata na milioni na tamata e vuravura raraba qai solia tale ga vei ira e dua na inuinui. Eda rawata vakacava oqori? Ena veitokoni ga ni Kalou. (Maciu 28:19, 20; Caka. 1:8) E vakamacalataka na yapositolo o Paula: “Ia na veika sa malumalumu e vuravura sa digitaka na Kalou me vakamaduataka na veika sa kaukauwa.”—1 Kor. 1:26-29.
2 O iratou na yapositolo ena imatai ni senitiuri kei ira e so tale na lotu Vakarisito ena gauna oya era “sega so ni vuku, se tamata vuli.” (Caka. 4:13) Ia, era doudou ga ni vakayacora na nodra ilesilesi mera vunautaka na itukutuku vinaka, qai vakalougatataka na Kalou na nodra sasaga. Dina ni dau sotavi na veika dredre kei na veitusaqati, ia ‘sa tete tiko ga yani na vosa ni Turaga ka sega ni tarovi rawa.’ Ena sega ni tarovi rawa na cakacaka oqo baleta ni tokona sara tiko ga na Kalou. (Caka. 5:38, 39; 19:20, VV) E tautauvata vinaka sara ga kei na noda gauna nikua. E sega vakadua ni bau dua na veitusaqati kaukaua e vu mai vei ira na veiliutaki me tarova na kena tukuni kei na tete ni itukutuku vinaka.—Aisea 54:17.
3 Vakacaucautaki ga na Kalou: Meda dokadokataka beka nida italatala ni Kalou? E sega sara ga. E kaya o Paula me baleta na cakacaka vakaitalatala: “Sa waqa qele sa tu kina vei keitou nai yau oqo, me sa taka mai vua na Kalou na kaukauwa mana levu, ka me segai maivei keitou.” (2 Kor. 4:7) E kila o Paula ni rawata ga vakavinaka na nona cakacaka vakavunau ena kaukaua e vu vakalou.—Efeso 6:19, 20; Fpai. 4:13.
4 Eda kila tale ga ni ‘vukei keda tiko na Kalou’ me vakayacori vinaka kina na cakacaka vakavunau. (Caka. 26:22) Na kena vunautaki gona e vuravura raraba na itukutuku oqori, e sa vakayagataki keda sara tiko ga o Jiova meda vakaroti ira kece na lewe i vuravura—ena veilewai levu e sa vakarau yaco. (Akeai 2:7) Sa dua dina na itavi dokai meda “daucakacaka vata kei koya na Kalou” ena tatamusuki levu vakayalo oqo!—1 Kor. 3:6-9.