Na Cava Eda Vulica ena Nodra Talaidredre na Isireli?
ENA gauna ra lako yani kina ina Vanua Yalataki na Isireli, era sa kila vinaka tu na veika e vinakata vei ira o Jiova. A vakaroti ira o Jiova ena gusu i Mosese: “Dou na qai vakasavi ira tani kecega e matamudou na lewe ni vanua ko ya, ka vakaotia na nodra matakau ceuti kecega, ka vakaotia na nodra veimatakau vakawaicalataki, ka vakarusa na nodra veitikina cecere.”—Tiko 33:52.
Mera kua ni veiyalayalati kei ira na lewenivanua e kea, se mera vakawatitaki ira. (Vkru. 7:2, 3) Era a vakasalataki sara ga na tamata digitaki ni Kalou: “Mo qarauni iko, de ko ia na veiyalayalati kei ira na lewe ni vanua ko sa lako kina, de sa dua nai cori e na kemudou maliwa.” (Lako 34:12) Ia era talaidredre vei Jiova na Isireli, ra qai coriti kina. Na cava e vakavuna mera sikalutu? Na cava eda vulica ena nodra talaidredre kei na nodra totogitaki?—1 Kor. 10:11.
Tini ina Sokalou Lasu na Nodra Veitokani
Nira se qai curu yani ina Vanua Yalataki na Isireli, era ravuti ira na matanitu era tiko e kea. Ia, era a sega ga ni muria na ivakaro kece ni Kalou baleta nira sega ni vakasavi ira na meca. (Dvei. 1:1–2:10) Kena veibasai ga, sa ra tekivu veitokani kei ira na lewe ni “matanitu e vitu,” baleta nira sa mai tiko veitikivi. (Vkru. 7:1) Na cava e qai yacovi ira na Isireli? E kaya na iVolatabu: “Ka ra sa vakawati kei ira na nodra goneyalewa, ka ra musuki ira na nodra goneyalewa kivei ira na luvedra, a ra sa qarava na nodra kalou. Ia era sa kitaka na ka ca e na mata i Jiova ko ira na Isireli, ka guilecavi Jiova na nodra Kalou, ka qaravi ira na Peali kei ira na kalouyalewa ni veikau.” (Dvei. 3:5-7) Nodra veitokani na Isireli kei ira na lewenivanua e tini ina vakawati kei na sokalou lasu. Na nodra veidinadinati gona ena vakawati oqori sa dredre kina mera vakasavi o ira na qaravi kalou lasu tiko. Sa vakadukadukalitaki na sokalou dina, ra qai qaravi kalou lasu na Isireli.
A sega ni leqataki na kedra ituvaki vakayalo na Isireli ena gauna era veimecaki kina kei ira na tiko ena vanua yalataki, ia sa qai leqataki ga vakalevu nira sa veimaliwai voleka sara. Dikeva mada e dua tale na ka a rairai vakavuna nodra vukitani na Isireli mai na sokalou dina.
Tini ina Qaravi Peali na Teitei
Nira curu yani na Isireli ina Vanua Yalataki, era sa tekivu teitei e levu ra qai sega ni vakataki ira na yavusa dau veitokiyaki. Kena irairai nira vakamuria ga na ivakarau ni teitei era sa dau matau tu kina o ira ena vanua oya. Ia era sega ni vakamuria wale ga na Isireli na nodra ivakarau ni teitei na kai Kenani. Nodra veitokani kei ira e vakavuna mera ciqoma tale ga na vakabauta e so kei na ivakarau ni sokalou e vauci tu ena teitei.
E levu na Peali era qarava na kai Kenani, qai nanumi ni o ira na kalou oqo era dau vakabulabulataka na qele me vuavuaivinaka. Era sega wale ga ni cukita na qele qai tamusuka na vuana o ira na Isireli, toso na gauna era sa sokaloutaki ira tale ga na kalou ni Kenani e nanumi nira dau solia tiko vakalevu vei ira na ka. Era sa lotu vakarairai gona e levu na Isireli, ra sa vukitani, ra qai sega ni sokalou dina vei Jiova.
Meda Vuli Kina ena Gauna Oqo
Kena irairai ni a sega sara ga ni nodra inaki na Isireli mera lai qaravi Peali, se mera vakaitavi ena ivalavala torosobu ni sokalou ena gauna ra tekivu veimaliwai voleka kina kei ira na tiko ena Vanua Yalataki. Ia oqori sara ga na ka era tini cakava ena vuku ni nodra veitokani. Sega li ni na yaco oqori nida veitokani voleka kei ira e vinaka na nodra itovo ia ra sega ga ni qarava na Kalou dina, ra sega ni muria na nona ivakatagedegede savasava, ra sega tale ga ni bulataka na ivakavuvuli vakarisito? E macala ni so na gauna eda na veimaliwai kei ira na tawavakabauta ena vanua ni cakacaka, e koronivuli, se o ira ena loma sara ga ni noda vale. Meda vuli gona mai na leqa e yaco vei ira na Isireli, oya meda kua ni via veitokani kei ira na sega ni qaravi Jiova nida na vakaleqai kina. E sega ni lasu na ka e kaya na iVolatabu: “Sa vakacala nai valavala vinaka na dautiko vata kei ira era sa ca.”—1 Kor. 15:33.
Nikua eda sotava e levu na ka ni bolebole vata ga era a sotava na Isireli. Levu nikua era raica tu e so na tamata se so tale na ka mera kalou. Era vakalou ina ilavo, vei ira na rogo ena buturara ni veivakamarautaki, ira na dauqito, na isoqosoqo vakapolitiki, kei na so sara mada ga na wekadra. E rawa tale ga nida lai vakabibitaka ena noda bula e dua vei ira na ka oqori. Noda saga meda veitokani voleka kei ira na sega ni lomani Jiova ena vakaleqai keda vakayalo.
A vakabibitaki na veiyacovi vakasisila ena qaravi Peali, era taleitaka ra qai vecei kina e levu na Isireli. Levu era qarava na Kalou nikua era se sikalutu tiko ga ena ivadi vaka oqori. Kena ivakaraitaki, na kompiuta e vale e rawa ni vakayagataki me raica kina e dua na iyaloyalo vakasisila ena Internet. Na nona via sarava ena vakaleqa nona lewaeloma savasava. Ia e so era a sega ga ni qaqarauni nira vakayagataka tiko na Internet. Sa bau rarawataki dina me dua na lotu Vakarisito e vecei ena iyaloyalo ca ena sala oya!
“Sa Kalougata ko Ira Era Vakabauta na Nona Vosa”
Eda na dui vakatulewataka meda talairawarawa vei Jiova ena noda digitaki ira na noda itokani. (Vkru. 30:19, 20) Koya gona, e bibi meda taroga: ‘Au dau maliwai cei niu gade se lakova na ka ni veivakamarautaki? Na cava na nodra rai me baleta na ivakatagedegede i Jiova? E vakacava tu na nodra itovo? Era qaravi Jiova beka? Ena uqeti au beka meu lotu Vakarisito vinaka na noqu veimaliwai voleka kei ira?’
E lagata na daunisame: “Sa kalougata ko ira era sa dodonu sara e na sala, era muria na vunau i Jiova. Sa kalougata ko ira era vakabauta na nona vosa, era qarai koya ena lomadra taucoko.” (Same 119:1, 2) Io, “sa kalougata ko ira kecega era sa rerevaki Jiova; ko ira era sa lako voli e na nona sala.” (Same 128:1) Meda vuli mada ga mai na nodra talaidredre na Isireli nida dau digi ira na noda itokani, da qai talairawarawa vei Jiova ena ka kece ga.—Vkai. 13:20.
[iYaloyalo ena tabana e 26]
Noda veitokani kei ira na sega ni lomani Jiova ena rawa ni uqeti keda meda sokalou lasu