Watchtower LAIBRI ENA INTERNET

LAIBRI ENA INTERNET

ijwbq ulutaga 157
Cava e Kaya na iVolatabu me Baleta na Leqa Tubukoso?

Saumi na Taro Vakaivolatabu

ijwbq ulutaga 157

Raica toka e dua na vuvale na vanua e vakacacani ena leqa tubukoso

Cava e Kaya na iVolatabu me Baleta na Leqa Tubukoso?

Kena isau vakaivolatabu

E sega ni vakavuna na Kalou na leqa tubukoso sa yaco tu nikua. Ia e kauaitaki ira ga na vakaleqai kina. Na Matanitu ni Kalou ena vakaotia vakadua na veika e vakavuna tiko na rarawa, okati kina na leqa tubukoso. Ena gauna qo na Kalou e vakacegui ira na vakaleqai kina.—2 Korinica 1:3.

Eda na vakadeitaka vakacava ni sega ni itotogi ni Kalou na leqa tubukoso?

E duidui na leqa tubukoso kei na kaukaua e vakayagataka na Kalou, me vaka e tukuni ena iVolatabu.

Veivakaleqai qai veivakamatei. E tukuni ena iVolatabu ni vakayagataka na Kalou na kaukaua me vakatau itotogi kina. Ia e vakadeitaka mera vakarusai kina na daucaka ca. Kena ivakaraitaki, nona vakarusa na koro o Sotoma kei Komora, a vakabulai Loti ga kei na rua na luvena yalewa. (Vakatekivu 19:29, 30) E kila na Kalou na loma ni tamata yadua ena gauna ya, qai vakarusai ira ga na daucaka ca.—Vakatekivu 18:23-32; 1 Samuela 16:7.
Sega ni kilai na gauna e yaco kina se lailai sara na ivakaro e soli. Na Kalou e solia rawa na ivakaro vei ira na daucaka ca ni bera ni veivakarusai. Era vakabulai ga o ira na muria na ivakaro.—Vakatekivu 7:1-5; Maciu 24:38, 39.
Veika era cakava na tamata. Ena sala cava? Era vakacacana na veika bula, ra qai taravale ena vanua e yaco kina vakalevu na uneune, waluvu, kei na veiveisau ni draki. (Vakatakila 11:18) E sega ni dodonu me beitaki na Kalou ena veika era cakava qori.—Vosa Vakaibalebale 19:3.

E ivakatakilakila ni iotioti ni veisiga na leqa tubukoso?

Io, e parofisaitaka na iVolatabu ni na yaco na leqa tubukoso ena “ivakataotioti ni veika vakavuravura,” se “na iotioti ni veisiga.” (Maciu 24:3; 2 Timoci 3:1) Kena ivakaraitaki, e kaya o Jisu me baleta na gauna qo: “Ena vakilai na leqa ni kakana qai yaco tale ga na uneune ena levu na vanua.” (Maciu 24:7) Sa voleka sara na gauna me vakaotia kina na Kalou na veika kece e vakavuna tiko na mosi kei na rarawa, okati kina na leqa tubukoso.—Vakatakila 21:3, 4.

E vukei ira vakacava na vakaleqai kina na Kalou?

Vakacegui ira ena nona Vosa na iVolatabu. E vakadeitaka vei keda na iVolatabu ni kauaitaki keda na Kalou, e vakila tale ga na noda rarawa. (Aisea 63:9; 1 Pita 5:6, 7) E yalataka tale ga ni na yaco na gauna sa na sega kina na leqa tubukoso.—Raica na “Tikinivolatabu e vakacegui ira na vakaleqai ena leqa tubukoso.”
Vakayagataki ira nona dauveiqaravi mera veivuke. Na Kalou e vakayagataki ira nona dauveiqaravi e vuravura mera vakatotomuria na ivakaraitaki i Jisu. E parofisaitaki ni na vakacegui ira e “vusolo na lomadra,” kei “ira kece na tagi.” (Aisea 61:1, 2) Era saga tale ga na dauveiqaravi ni Kalou mera cakava qori.—Joni 13:15.

E vakayagataki ira tale ga nona dauveiqaravi na Kalou, mera vakarautaka na veika vakayago vei ira na vakaleqai.—Cakacaka 11:28-30; Kalatia 6:10.

Era vakavinakataka tiko na iVakadinadina i Jiova e dua na vale e Puerto Rico — Vakarautaka tiko na iVakadinadina i Jiova na veika vakayago vei ira na vakaleqai ena cagilaba mai Puerto Rico

E rawa ni veivuke na ivakavuvuli vakaivolatabu meda vakavakarau ena leqa tubukoso?

Io. Na iVolatabu e sega ni idusidusi me baleta na leqa tubukoso, ia e tiko kina na ivakavuvuli e rawa ni vukei keda. Kena ivakaraitaki:

Lalawataka rawa na ka me caka ni yaco na leqa tubukoso. E kaya na iVolatabu: “O koya e yalomatua e raica na ca qai vunitaki koya.” (Vosa Vakaibalebale 22:3) E ka vakayalomatua meda vakaraica rawa na vanua ena rawarawa kina noda dro ni bera na leqa tubukoso. Vakarautaki rawa tu na iyaya ena vinakati, dou vakatovotovotaka tale ga vakavuvale na vanua dou na sota kina ena gauna qori.
E bibi nomu bula. E kaya na iVolatabu: “Nida sega ni kauta mai vuravura e dua na ka, ena sega tale ga ni dua na ka eda kauta tani yani.” (1 Timoci 6:7, 8) Meda yalorawarawa ni biuta noda vale kei na noda iyau ni yaco na leqa tubukoso. Meda nanuma tiko ni bibi cake noda bula, sega ni iyau.—Maciu 6:25.

Tikinivolatabu ena vakacegui ira na vakaleqai ena leqa tubukoso

Vakatekivu 18:25: “Ena sega sara ni votu mai na nomuni vakasama [na Kalou] moni vakamatea na tamata yalododonu kei na daucaka ca . . . Vakacava ena sega ni cakava na ka e dodonu na Turaganilewa ni vuravura taucoko?”

Kena ibalebale: E dau dodonu tu ga na ka e cakava na Kalou, sega gona ni dodonu me beitaki ena nodra mate na tamata ena leqa tubukoso.

Same 46:1, 2: “Na Kalou e noda ivakaruru kei na kaukaua, e dau tu vakarau me vukei keda ena gauna ni rarawa. Qori na vuna eda na sega kina ni rere, se mani yaco e vuravura na veisau.”

Kena ibalebale: Se mani cava e yaco wavoliti keda, eda nuidei ni na vukei keda na Kalou.

Aisea 63:9: “Ena gauna kece era rarawa kina e rarawa o koya.”

Kena ibalebale: E dau nanumi keda na Kalou, e vakila talega na noda rarawa.

Joni 5:28, 29: ‘Sa voleka mai na gauna mera rogoca kina na domo i [Jisu] o ira kece na tu ena ibulubulu nanumi mera tucake mai.’

Kena ibalebale: Eda na raici ira tale na wekada lomani era sa mate, ni na solia na Kalou vei Jisu na kaukaua me vakaturi ira.

1 Pita 5:6, 7: “Moni vakamalumalumutaki kemuni ena liga kaukaua ni Kalou,. . . moni biuta vua na nomuni lomaocaoca kece, ni kauaitaki kemuni o koya.”

Kena ibalebale: E kauaitaki keda vakalevu na Kalou, e vinakata tale ga meda tukuna vua na ka eda lomabibitaka.

Vakatakila 21:4: “Ena qusia tani tale ga na wainimata kece mai na matadra [na Kalou], sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”

Kena ibalebale: Ena vakaotia na Kalou na ka kece e vakavuna tiko noda rarawa, wili kina na leqa tubukoso.