Na Rai ni iVolatabu
Vakayagataka na iVakavuvuli Vakalou ena Veisusu
“iWalewale ni Kotori ni Lawa Era na Sega ni Beca na Luvemu”
“Lima na iTovo Kilikili Mo Vakavulica Vei Luvemu ni Bera ni Yabaki Lima”
“Lima na iVakarau ni Yalo me Kune Vei Ira Kece na Gone”
“Lima na Ka e Vakavotuya ke O Dau Veivakademeni”
“Mataqali Veivakavulici e Mana”
KE RAWARAWA na vakavulici ira na gone, ena sega ni kauaitaki na mataqali ulutaga e koto e cake, e tauri mai na so na ivola. Ena mudu tale ga na kedra tabaki vakayauyau na veivola e baleta na veisusu. Ia, na kena dina, ni sega ni ka rawarawa na veisusu. A se tukuni sara ena vica na udolu na yabaki sa oti: “Sa ka ni rarawa vei tamana na gone sesewa; kei na ka gaga vua ka vakasucuma.”—Vosa Vakaibalebale 17:25.
Nikua, dina ga ni binikasauru na ivakasala me baleta na veivakavulici, ia e levu na itubutubu era sega ni kila vinaka na sala mera cakava kina. Na veivuke cava e vakarautaka na iVolatabu?
Na iBalebale Dina ni Veivakavulici
E vakamatatataka sara ga na iVolatabu na nodra itavi na itubutubu ena veivakavulici. Me kena ivakaraitaki, e kaya na Efeso 6:4 (NW): “Kemuni na tama, ni kua ni vakacudrui ira na luvemuni, ia ni vakavulici ira ena ivakavuvuli kei na ivakarau ni vakasama i Jiova.” E vakabibitaka tiko na tikinivolatabu oqo vua na tama me dau vakaliuliu sara ga ena nodra tuberi na luvena. Macala ni dodonu me tu vakarau o tinanigone me vukei watina tale ga vakavoleka.
E tukuna na Interpreter’s Dictionary of the Bible me baleta na tikina oqo: “Ena dua na yasana, na veivakavulici ena iVolatabu e veisemati voleka kei na veituberi, veivakadreti, kei na kilaka, ia ena dua tale na yasana, e sema tale ga kei na veivunauci, veivakadodonutaki, kei na soli itotogi. Ia, e dau vakayagataki ga vakalevu ena nodra tuberi na gone.” O koya gona, na veivakavulici e sega ni veivunauci wale ga; e okati kece kina na veituberi era gadreva na gone mera vinaka kina. Ia, era na qarauna vakacava na itubutubu me kua tale ni veivakacudrui na ivakarau ni nodra veivakavulici?
Dau Veinanumi
Na cava e rawa ni vakacudruya na gone? Vakasamataka mada vaka oqo. O cakacaka vata kei na dua e dau cudrucudru qai yalototolo. O votivoti vua. Kena irairai ni dau vaqara cala ena ka o kaya se cakava. Sega ni dua na ka o cakava me na donu vua, o lai tini nanuma ga kina ni ka kece o cakava e cala. Sega li ni na vakacudrui iko oya, o qai yalolailai kina?
E rawa ni yaco tale ga oqo vua e dua na gone ke wasoma nodrau vosataki koya se vakadodonutaki koya nona itubutubu ena yalokatakata. Io, e dina ni gadrevi mera vakadodonutaki na gone ena so na gauna, e solia tale ga na dodonu na iVolatabu vei rau na itubutubu me rau cakava vaka kina. Ia, ke ra togoraki na gone ra qai sega ni lomani, ena vakacudrui ira, ena rawa ni vakacaraki kina na lomadra, nodra bula vakayalo, vakayago tale ga.
E Dodonu Mo Kauaitaki Ira na Luvemu
E dodonu mera tikica na gauna na itubutubu mera vakayagataka vata kei ira na luvedra. Me baleta na ivakaro ni Kalou, e kaya na Vakarua 6:7 vei ira na tama: “Mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.” Era sucukaya mai na gone na gagadre mera vakila ni o ira na itubutubu era kauaitaki ira vakalevu. Ke o dau vosa gona vakamalua vei ira na luvemu e veisiga, o rawa ni na kila vinaka na lomadra. Ena rawarawa kina me bucini e lomadra na ivakavuvuli vakaivolatabu, era na uqeti tale ga kina mera “rerevaka na Kalou, ka muria na nona vunau.” (Dauvunau 12:13) Oqo e tiki ni veivakavulici vakalou.
Kevaka meda vakatauvatana na veisusu kei na taravale, ena vaka tiko na iyaya ni taravale na veivakavulici. Nira vakayagataka vinaka na itubutubu, era rawa sara ga ni tara kina e so na itovo talei vei ira na luvedra, ra qai vakarautaki ira vinaka ena so na ituvaki dredre era na sotava ena nodra bula. E vakamacalataka na kena cakayaco na Vosa Vakaibalebale 23:24, 25: “Ena reki vakalevu na tamana na yalododonu: ko koya erau veitamani dina kei na gone vuku ena levu kina na nona marau: erau na reki ko tamamu kei tinamu, io ena ladelade ko koya ka vakasucumi iko.”
[Kato/iYaloyalo ena tabana e 27]
“NA IVAKARAU NI VAKASAMA I JIOVA”
E cavuti ena Efeso 6:4 (NW) na “ivakarau ni vakasama i Jiova.” Ena vosa taumada vakirisi ni ivosavosa “ivakarau ni vakasama” e vakadewataki ena so na iVolatabu me “dau nanuma,” “ivakasala,” kei na “veivakadreti.” E dusia tiko na veivosa oqo, ni sega ni vinakati me wiliki wale tu ga na iVolatabu se me caka ga me rawa na kena kovuti na ulutaga ni vuli ena gauna ni vuli iVolatabu. Mera vakadeitaka na itubutubu nira sa kila vinaka na luvedra na ibalebale ni Vosa ni Kalou, na bibi ni talairawarawa, nona lomani ira o Jiova, kei na veitaqomaki e dulaka tu vei ira.
E rawati vakacava oqo? O Judy, e dua na marama e tolu na luvena, e dikeva ni sega ni rauta me taleva ga vakawasoma na ivakavuvuli vakalou kei ratou na luvena. “Au raica ni ratou sega ni taleitaka ke dua tu ga na ivakarau ni noqu taleva wasoma na ka. Au mani tekivu vaqara e so tale na sala meu rawa ni veivakavulici kina. Dua na sala, oya noqu vakaraica e so na ulutaga e ganiti ratou era tabaki tu ena Yadra!, ia e duidui ga na sala e vakamacalataki kina. Au mani vulica kina na iwalewale meu taleva kina kei ratou na luvequ na ivakavuvuli e ganiti ratou, ia meu kua ga ni veivakacudrui.”
O Angelo, e dua na turaga a sotava na ituvaki dredre na nona vuvale, e tukuna na sala e vakavulici iratou kina na luvena yalewa me ratou vakasamataka vakatitobu na Vosa ni Kalou: “Keitou dau wilika vata e vica na tikinivolatabu, au sa qai digia ga e so na matavosa qai vakamacalataka na sala ena yaga kina ena kedratou dui ituvaki na luvequ. E muri, ni ratou sa wilika ga vakataki ratou na iVolatabu, au dau raica ni ratou vakasamataka sara tu vakatitobu, me ratou kila se cava na kena ibalebale vei ratou.”