Vakacava na bubului me tabu na veiyacovi?

ENA vica na yabaki tiko ga oqo, e takalevu sara vei ira na itabagone mera dau bubuluitaka mera kua ni veiyacovi, se mera kua ni taratagane se yalewa. E nodra ibole, “Tabu na veiyacovi ni bera na vakamau.” Na bubului vaka oqo e isausau dokai qai salavata kei na ivakaro ena iVolatabu. (1 Korinica 6:18, VV; Efeso 5:5, VV) Ia, e lomatarotarotaki na kena muri dina. Ena dua na vakadidike, e laurai ni rauta ni 60 na pasede na itabagone era vakatara tale na nodra vosa ni bubului ena loma ga ni dua na yabaki.

Kena ikuri, e kauaitaki sara vakalevu na sala era vakaibalebaletaka kina na itabagone na “tabu ni veiyacovi,” se na nodra “kua ni taratagane se yalewa.” Erau vola o Charlene C. Giannetti kei Margaret Sagarese ena ivola na Boy Crazy! (Mateci Ira na Gonetagane!): “Era kaya na dauvakadidike ni kena tubu ena kedra maliwa na itabagone na veiyacovi e vakayagataki kina na gusu ena yago tabu, vaka sara mada ga kina na veiyacovi ni vakayagataki na sala ni valelailai, e vu vakatabakidua mai na nodra vakatatabu na itabagone. Era kaya na itabagone ni mataqali veiyacovi vaka oqo e sega ni wili me veiyacovi dina.”

E laurai ni takalevu sara na rai vaka oqo. A kaya e dua na dauvolaivola ni vakatarogi ira oti e sivia e duanaudolu na itabagone: “Mai na veiyaduanadrau na itabagone, e kena irairai ni le dua ga se rua era okata me veiyacovi na kena vakayagataki na gusu ena yago tabu.” E kuria: “Mo kila tale ga ni rawa ni vaka oqo na ka era nanuma tu na luvemuni itabagone, se o ira mada ga era se lalai sara.”

Era kila o ira na muria na ivakatagedegede ni iVolatabu ni okati tale ga me veiyacovi na kena mataqali e vakayagataki kina na gusu kei na sala ni valelailai. Na ivakaro vakaivolatabu meda “kakua ni dau veibutakoci” (“dou . . . vakuai kemudou mai na itovo vakasisila,” Today’s English Version) e okati kina na ivalavala kece ni veiyacovi vakasisila.​—1 Cesalonaika 4:3, VV.