iTukutuku Vinaka ina Kawatamata
Na nona vakaturi o Jisu e vakayaloqaqataki ratou na nona tisaipeli, ratou gumatua tale ga na vunau. Kena ivakaraitaki, a gole na yapositolo o Paula ena veivanua vakaEsia lailai kei na Mediterranean me tauyavutaka na ivavakoso qai vakayaloqaqataki ira na lotu vaKarisito mera dei ena veika e vauca na itovo savasava, mera vosota tale ga na veivakacacani. Dina ni yaco tu na veitusaqati, ia e levu era sa mai lotu vaKarisito.
A bala i valeniveivesu o Paula, ia se volavola ga vei ira na ivavakoso lotu vaKarisito me veivakasalataki se veivakayaloqaqataki. E vakasalataki ira mera qarauni ira na vukitani. Ena veiuqeti ni yalo tabu ni Kalou, e parofisaitaka o Paula ni na basika ena kedra maliwa na “olifa dau veivakasaurarataki” ra qai “vakatanitaka na ivakavuvuli dina mera vakacalai ira kina na tisaipeli mera muri ira.”—Cakacaka 20:29, 30.
Era basika na vukitani ni cava na imatai ni senitiuri. Ena gauna qori a vakaraitaka o Jisu vua na yapositolo o Joni na raivotu me baleta na gauna se bera mai. Sa qai vola o Joni, ni na sega ni dua na dauveitusaqati se qasenivuli lasu me tarova na nona vakayacora na Kalou na nona inaki taumada me baleta na vuravura kei na kawatamata. Era na rogoca na itukutuku vinaka ni Matanitu ni Kalou na “veimatanitu, na veiyavusa, na duivosavosa, kei na tamata kece.” (Vakatakila 14:6) Ena vukici tale na vuravura me Parataisi, era na bula ga kina o ira era vinakata mera cakava na loma ni Kalou!
Vakacava e “itukutuku vinaka” qori? Ke vakakina, e vinaka mo vulica na itukutuku ni Kalou ena iVolatabu kei na sala ena yaga kina vei iko ena gauna qo kei na gauna se bera mai.
O rawa ni wilika na iVolatabu ena Web site na www.pr2711.com. O na raica tale ga kina na brochure The Bible—What Is Its Message? kei na iTukutuku Vinaka Mai Vua na Kalou! wili kina na ivola Na Cava Sara Mada e Kaya na iVolatabu? kei na so tale na ivola e vakamacalataka na vuna meda nuitaka kina na iVolatabu kei na sala ena yaga kina na kena ivakavuvuli ena noda vuvale kei na noda bula. Se taroga e dua na iVakadinadina i Jiova ke o via kila e levu tale na ka.
—Yavutaki ena Cakacaka, Efeso, Filipai, Kolosa, Filimoni, 1 Joni, Vakatakila.
[iYaloyalo ena tabana e 7]
[iYaloyalo ena tabana e 7]