O Se Nanuma Tiko?
O bau wilika vinaka na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:
Gauna cava a ‘vunau kina o Jisu vei ira na kabula vakayalo era vesu tu’? (1 Pita 3:19)
Kena irairai ena gauna a vakaturi oti kina o Jisu, a tukuna vei ira na yalo velavela ni sa voleka mera na totogitaki.—15/6, tabana e 23.
Na cava e tolu na ituvaki e rawa ni vakadredretaka na rawati ni marau ena ikarua ni vakawati?
Kena imatai, nomu vakatauvatani watimu vua na watimu e liu, kena ikarua, nomu veimaliwai kei ira na nomu itokani makawa era sega ni veikilai kei na ikarua ni watimu; kena ikatolu, dredre mo nuitaki watimu ni a sega ni yalodina na watimu e liu.—1/7, tabana e 9-10.
Gauna cava ena lewai ira kina na tamata o Jisu mera sipi se me? (Maciu 25:32)
Ena gauna ena gole mai kina o Jisu me lewai ira na tamata ena veivakararawataki levu, ni sa vakarusai oti o lotu lasu.—15/7, tabana e 6.
Gauna cava era na tagi qai katibati kina o ira na daubeca na lawa ena vosavakatautauvata me baleta na witi kei na co ca? (Maciu 13:36, 41, 42)
Era na cakava qori ena veivakararawataki levu nira kila nira na sega ni drotaka na veivakarusai.—15/7, tabana e 13.
Gauna cava a vakayacori kina na vosa i Jisu me baleta na dauveiqaravi yalodina e vuku? (Maciu 24:45-47)
E tekivu ni oti na 1914, sega ni Penitiko 33 S.K. Ena 1919, sa lesi na dauveiqaravi me liutaki ira na tamata, era okati tiko ena tamata qori na lotu vaKarisito kece era vakani tiko vakayalo.—15/7, tabana e 21-23.
Gauna cava e lesia kina o Jisu na dauveiqaravi yalodina me lewa na nona iyau kece?
Qori ena dua na gauna se bera mai, donuya na veivakararawataki levu, na gauna era na taura kina na nodra icovi vakalomalagi na dauveiqaravi yalodina.—15/7, tabana e 25.
Na iVolatabu e sega ni vola na yacadra eso, kena ibalebale qori nira tamata ca se ra tawayaga?
E sega ni dodonu me va ya noda rai. Na iVolatabu e sega ni vola na yacadra eso na tamata era vinaka kei so era ca. (Ruci 4:1-3; Maciu 26:18) E tukuni mada ga vei keda e rua ga na yaca ni agilosi yalodina.—1/8, tabana e 10.
Na cava e vukei ira na 230 na iVakadinadina era bula mai na dua na taubale balavu mai na keba ni veivakararawataki na Sachsenhausen, dina ni a vukei ira tale ga na Kalou?
E vakamalumalumutaki ira na walokai kei na so na mate veitauvi, ia era sega ni cegu ni veiuqeti mera toso tiko ga.—15/8, tabana e 18.
Na cava e uqeti keda kina na italanoa ni nodra takosotaka na Isireli na Uciwai na Joritani mera yaco ena Vanua Yalataki?
A dave sara tu ga na uciwai, ia a tarova o Jiova na kena drodro me rawa nira takoso na nona tamata. Sa na bau vakaukauataka mada ga na nodra vakabauta kei na nodra nuitaki koya, ena uqeti keda tale ga na italanoa ya.—15/9, tabana e 16.
Na cava e laurai mai na kena dau cavuti wasoma ena iVolatabu na roka?
Na kena vakayagataki ena iVolatabu na roka e dusia ni kila vinaka tu na Kalou ni rawa ni uqeta na lomada na roka, ena vukei keda tale ga meda nanuma kina na ka.—1/10, tabana e 14-15.
E vakayacori vakacava nikua na parofisai ena Maika 5:5 me baleti ira na tamata turaga kei ira na ivakatawa?
Eda kila ni ‘vitu na ivakatawa kei na walu na tamata turaga’ era cavuti ena Maika 5:5 e vakaibalebaletaki vei ira na qase ni ivavakoso era lesi, era vakayaloqaqataki ira na tamata ni Kalou ena veivakacacani sa voleka e parofisaitaki tu.—15/11, tabana e 20.
Na cava eso na vuna eda gadreva kina na Kalou?
Eda vinakata na veidusimaki vinaka kei na iwali ni leqa, ia e vakarautaka ruarua qori na Kalou. E vukei keda meda bula mamarau, ena vakayacora tale ga na nona yalayala era tu ena nona Vosa.—1/12, tabana e 4-6.