Lěe Jexóva nɔ ná xósin nú ɖɛ mǐtɔn lɛ́ gbɔn é

1-2. Étɛ́ lɛ́ mǐ ka sixú nɔ kanbyɔ́ mǐɖée dó ɖɛ e mǐ nɔ xo lɛ́ é wú?

A KO kanbyɔ́ hwiɖée ɖɔ Jexóva ka ɖo xósin ná nú ɖɛ émítɔn lɛ́ wɛ a jí kpɔ́n a? Nú mɔ̌ wɛ ɔ, é nyí hwiɖokpó ǎ. Nɔví súnnu kpó nɔví nyɔ̌nu kpó gěgé ɖɔ ɖɔ émí ko kan nǔ énɛ́ byɔ́ émíɖée kpɔ́n, tají ɔ, hwenu e émí ɖo hwenu vɛ́ wǔ lɛ́ mɛ gbɔn wɛ é. Ényí mǐ ɖo wǔvɛ́ se wɛ ɔ, é sixú vɛ́ wǔ nú mǐ lɔ tawun bɔ mǐ ná ɖó ayi lěe Jexóva ɖo xósin ná nú ɖɛ mǐtɔn lɛ́ wɛ gbɔn é wú.

² Mi nú mǐ ní vɔ́ nǔ e wú mǐ sixú ɖeji ɖɔ Jexóva nɔ ná xósin nú mɛsɛntɔ́ tɔn lɛ́ sín ɖɛ lɛ́ é jí gbɔn. (1 Jaan 5:15) Mǐ ná lɛ́ mɔ xósin nú nǔkanbyɔ́ élɔ́ lɛ́: Étɛ́wú é ka sixú cí nú mǐ hweɖélɛ́nu ɖɔ Jexóva kún ɖo xósin ná nú ɖɛ mǐtɔn lɛ́ wɛ ó? Ali tɛ́ lɛ́ nu Jexóva ka nɔ ná xósin nú ɖɛ lɛ́ ɖe ɖo égbé?

JEXÓVA SIXÚ GƆN XÓSIN NÁ NÚ ÐƐ MǏTƆN LƐ́ LĚE MǏ BA GBƆN É

3. Étɛ́wú Jexóva ka ba ɖɔ mǐ ní nɔ xo ɖɛ sɛ́dó émí?

³ Biblu ná gǎnjɛwú mǐ ɖɔ Jexóva yí wǎn nú mǐ tawun, bɔ mǐ lɛ́ xɔ akwɛ́ n’i. (Ajée 2:7; 1 Jaan 4:10) Énɛ́ wɛ zɔ́n bɔ é byɔ́ mǐ ɖɔ mǐ ní nɔ xo ɖɛ bo byɔ́ alɔdó émítɔn. (1 Pi. 5:6, 7) É ba ná d’alɔ mǐ bɔ mǐ ná vɛ́ kpó è kpó, bo lɛ́ ɖí xwi xá tagba e mɔ wɛ mǐ ɖe lɛ́ é bɔ é ná kpa mǐ.

4. Nɛ̌ mǐ ka wa gbɔn bo tuun ɖɔ Jexóva nɔ ná xósin nú ɖɛ ɖěɖěe mɛsɛntɔ́ tɔn lɛ́ nɔ xo sɛ́dó è lɛ́ é? (Lɛ̌ kpɔ́n ɖiɖe ɔ.)

⁴ Hwɛhwɛ wɛ mǐ nɔ xa ɖo Biblu mɛ ɖɔ Jexóva ná xósin nú mɛsɛntɔ́ tɔn lɛ́ sín ɖɛ lɛ́. Kpɔ́ndéwú tɛ́ ka wá ayi mɛ nú we? Axɔ́sú Davídi tɔn wɛ a? É ɖó kɛntɔ́ syɛ́nsyɛ́n gěgé ɖo gbɛhwenu tɔn, bo ba alɔdó Jexóva tɔn hwɛhwɛ ɖo ɖɛ mɛ. Gbe ɖokpó ɔ, é sa vo nú Jexóva bo ɖɔ: ‘Jexóva, se ɖɛ ce, ɖǒtó vo e sa nú we wɛ un ɖe é. Hwɛjijɔnɔ wɛ a nyí, bo nyí gbejínɔtɔ́; bo se ɖɛ ce!’ (Ðɛh. 143:1) Jexóva ná xósin nú ɖɛ e Davídi xo sɛ́dó è, bo byɔ́ ɛ ɖɔ é ní hwlɛ́n émí gán lɛ́ é. (1 Sam. 19:10, 18-20; 2 Sam. 5:17-25) Énɛ́ wú ɔ, Davídi sixú ɖɔ kpó jiɖiɖe kpó ɖɔ: ‘Jexóva ɖo kpɔ́ xá mɛ e nɔ sú xó ylɔ́ ɛ lɛ́ é bǐ.’ Mǐ lɔ sixú ɖó jiɖiɖe ɖokpó ɔ.—Ðɛh. 145:18.

5. Jexóva ka ná xósin nú mɛsɛntɔ́ tɔn hwexónu tɔn lɛ́ sín ɖɛ lɛ́ lěe yě ba gbɔn é hwebǐnu a? Nǎ kpɔ́ndéwú ɖokpó. (Lɛ̌ kpɔ́n ɖiɖe ɔ.)

⁵ Jexóva sixú gɔn xósin ná nú ɖɛ mǐtɔn lɛ́ lěe mǐ ba gbɔn é. Mɔ̌ wɛ é nyí gbɔn nú mɛsɛ́dó Pɔ́lu. É byɔ́ Mawu ɖɔ é ní ɖe ‘wun e ɖo lanmɛ nú émí é’ síin. Azɔn atɔn wɛ Pɔ́lu xo ɖɛ dó tagba syɛ́nsyɛ́n énɛ́ tamɛ. Jexóva ka ná xósin nú ɖɛ énɛ́ lɛ́ e é xo lɛ́ é a? Ganjí, amɔ̌, é nyí lěe Pɔ́lu ba gbɔn é ǎ. Jexóva ɖe tagba ɔ síin ǎ, é nyɔ́ wa ɔ, é ná ɛ hlɔ̌nhlɔ́n e sín hudó é ɖó bo ná kpo ɖo sinsɛn ɛ wɛ kpó gbejíninɔ kpó é.—2 Kɔ. 12:7-10.

6. Aniwú é ka sixú cí nú mǐ hweɖélɛ́nu ɖɔ Jexóva kún ɖo xósin ná nú ɖɛ mǐtɔn lɛ́ wɛ ó?

⁶ Mǐ lɔ sixú wá mɔ hweɖélɛ́nu ɖɔ xósin e Jexóva ná nú ɖɛ mǐtɔn lɛ́ é gbɔn vo nú ée mǐ ba é. Mǐ sixú ɖeji ɖɔ Jexóva tuun lěe é ná dó alɔ mǐ bɔ é ná nyɔ́ hú gǎn gbɔn é pɛ́pɛ́pɛ́. É tlɛ “sixú wa nǔ zɛ nǔ ɖěɖěe mǐ byɔ́, alǒ sixú lin lɛ́ é bǐ wú flaflá tɔn.” (Efɛ́. 3:20) Énɛ́ wú ɔ, xósin e é nɔ ná nú ɖɛ mǐtɔn lɛ́ é, alǒ lěe é nɔ ná yě gbɔn é sixú gbɔn vo nú nǔ e mǐ lin é hweɖélɛ́nu.

7. Étɛ́wú é ka sixú byɔ́ ɖɔ mǐ ní húzú nǔ e takúnmɛ xo ɖɛ dó wɛ mǐ ɖe é? Nǎ kpɔ́ndéwú ɖokpó.

⁷ Ényí jlǒ Jexóva tɔn wá za wě nú mǐ hú gǎn ɔ, é sixú byɔ́ ɖɔ mǐ ní húzú nǔ e takúnmɛ mǐ nɔ xo ɖɛ dó é. Mǐ ní ɖɔ xó dó kpɔ́ndéwú nɔví Martin Poetzinger tɔn jí. É wlí alɔ bɔ é ná nɔ zaan é ɔ, è wlí i dó yadónúmɛkpá Nazi tɔn ɖé mɛ. Jɛ nukɔn hwɛ̌ ɔ, é byɔ́ Jexóva ɖɔ é ní bló bónú émí ní tɔ́n sín yadónúmɛkpá ɔ mɛ, énɛ́ ɔ, émí ná kpé wú bo kpé nukún dó asi émítɔn wú, bo lɛ́ gbɛ kan dó wɛnɖagbejíjlázɔ́ ɔ nu. É ɖo mɔ̌ có, aklúnɔzángbla we gúdo ɔ, é ɖó ayi nǔ ɖěbǔ wú bónú é xlɛ́ ɖɔ Jexóva ɖo ali hun n’i wɛ bónú é ná tɔ́n ǎ. Énɛ́ wú ɔ, é jɛ ɖɛ xo sɛ́dó Jexóva jí ɖɔ: “Jexóva, kɛnklɛ́n xlɛ́ mì nǔ e a ba ɖɔ má wa é.” Énɛ́ gúdo ɔ, é jɛ tamɛ lin dó wǔvɛ́ e mɔ wɛ nɔví ɖěvo e ɖo yadónúmɛkpá ɔ mɛ lɛ́ é ɖe lɛ́ é jí jí. Yě mɛ gěgé wɛ ɖo linkpɔ́n mɛ ɖó asi yětɔn lɛ́ kpó vǐ yětɔn lɛ́ kpó wú. Énɛ́ gúdo ɔ, Nɔví súnnu Poetzinger xo ɖɛ bo ɖɔ: “É ná cɛ nú we Jexóva, nú azɔ̌ ce yɔ̌yɔ́ ɔ. D’alɔ mì nú má ná hlɔ̌nhlɔ́n nɔví ce lɛ́, bo lɛ́ dó wǔsyɛ́n lanmɛ nú yě.” Nǔ e é wa ɖo yadónúmɛkpá ɔ mɛ ɖo xwe tɛ́nnɛ e bɔ d’é wú lɛ́ é mɛ é pɛ́pɛ́pɛ́ nɛ́.

8. Nǔ tají tɛ́ mǐ ka ɖó ná nɔ hɛn d’ayi mɛ hwenu e mǐ ɖo ɖɛ xo wɛ é?

⁸ Mǐ ɖó ná nɔ flín ɖɔ Jexóva ɖó linlin ɖé, bo ka ná bló bɔ é ná jɛnu hwenu e é ba dó é. Tagba ɖěɖěe zɔ́n bɔ wǔvɛ́ sise dó syɛ́n sɔmɔ̌ ɖo égbé lɛ́ é ɖiɖeɖɛ bǐ mlɛ́mlɛ́ ɖo linlin énɛ́ mɛ; tagba énɛ́ lɛ́ ɖé lɛ́ wɛ nyí adla lɛ́, azɔn kpó kú kpó. Jexóva ná zán Axɔ́súɖuto tɔn dó bló bɔ linlin tɔn ná jɛnu. (Dan. 2:44; Nǔɖe. 21:3, 4) Amɔ̌, din hwɛ̌ ɔ, Jexóva jó Satáan dó bɔ é ɖo acɛ kpa dó gbɛ ɔ jí wɛ.b (Jaan 12:31; Nǔɖe. 12:9) Ényí Jexóva ɖe ɖɛ tagba gbɛtɔ́ lɛ́ tɔn ɖo din ɔ, é sixú cí ɖɔ Satáan ɖo acɛ kpa dó gbɛ ɔ jí wɛ ganjí ɖɔhun. Hǔn, ényí é ná bo tlɛ byɔ́ ɖɔ mǐ ní nɔ te kpɔ́n Jexóva nú é ná ɖe akpá e é dó é ɖé lɛ́ ɔ, xlɛ́xlɛ́ wɛ énɛ́ ɖe ɖɔ é wɔn ya nú mǐ ǎ. Mi nú mǐ ní ɖɔ xó dó nǔ e Jexóva nɔ wa dó d’alɔ mǐ lɛ́ é ɖé lɛ́ jí.

LĚE JEXÓVA NƆ NÁ XÓSIN NÚ ÐƐ LƐ́ GBƆN ÐO ÉGBÉ É

9. Ényí é byɔ́ ɖɔ mǐ ní wá gbeta ɖé lɛ́ kɔn ɔ, nɛ̌ Jexóva ka sixú d’alɔ mǐ gbɔn? Nǎ kpɔ́ndéwú ɖé.

⁹ É nɔ ná mǐ nǔnywɛ́. Jexóva d’akpá ɖɔ émí ná ná mǐ nǔnywɛ́ e sín hudó mǐ ɖó bá wá gbeta ɖagbe lɛ́ kɔn é. Mǐ ɖó hudó nǔnywɛ́ Mawu tɔn tɔn, ɖo tají ɔ, hwenu e mǐ ɖo gbeta e sixú wa nǔ dó gbɛhwenu mǐtɔn e kpo é bǐ wú lɛ́ é kɔn wá wɛ é, ɖi mǐ ná nɔ tlɛnmɛ, alǒ wlí alɔ. (Ja. 1:5) Mǐ ní ɖɔ xó dó kpɔ́ndéwú nɔví nyɔ̌nu tlɛnnɔ e nɔ nyí Mariac é tɔn jí. Gběxosín-alijítɔ́ hwebǐnu tɔn e ɖó awǎjijɛ é ɖé wɛ n’i, bɔ é wá mɔ nɔví súnnu ɖé. É ɖɔ: “Ée xɔ́ntɔn e mǐ zun é ɖo dǒ lí wɛ é ɔ, wǎn e mǐ yí nú mǐɖée é ɖo jijɛjí wɛ. Un tuun ɖɔ un ɖó ná wá gbeta ɖé kɔn. Un xo ɖɛ vívɛ́ nú hwenu línlín dó énɛ́ takúnmɛ. Un ɖó hudó wěɖexámɛ Jexóva tɔn tɔn, amɔ̌, un lɛ́ tuun ɖɔ Jexóva kún ná wá gbeta ɔ kɔn nú mì ó.” É mɔ ɖɔ Jexóva ná xósin nú ɖɛ ɖěɖěe émí xo bo byɔ́ ɛ nǔnywɛ́ lɛ́ é. Gbɔn nɛ̌ é? É ba do nú nǔ ɖo wěma mǐtɔn lɛ́ mɛ, bo mɔ xóta tawun tawun ɖé lɛ́ bɔ yě d’alɔ ɛ bɔ é mɔ xósin nú nǔkanbyɔ́ e é ɖó lɛ́ é. Gɔ́ ná ɔ, nɔ tɔn nɔ sɛn Jexóva, bo ɖe wě e nǔnywɛ́ kpé lɛ́ é xá ɛ, bɔ é ɖótó. Wěɖexámɛ énɛ́ lɛ́ d’alɔ Maria bɔ é gbéjé lěe nǔ cí n’i é kpɔ́n. Wǎgbɔ tɔn ɔ, é kpé wú bo wá gbeta e nǔnywɛ́ kpé é ɖé kɔn.

10. Sɔgbe xá Filípunu lɛ́ 4:13 ɔ, étɛ́ Jexóva ka ná wa dó d’alɔ mɛsɛntɔ́ tɔn lɛ́? Nǎ kpɔ́ndéwú ɖokpó. (Lɛ̌ kpɔ́n fɔtóo ɔ.)

¹⁰ É nɔ ná mǐ hlɔ̌nhlɔ́n bɔ mǐ nɔ dɛ. Lěe é nyí gbɔn nú mɛsɛ́dó Pɔ́lu é ɔ, Jexóva ná ná mǐ hlɔ̌nhlɔ́n e sín hudó mǐ ɖó bá dɛ ɖo mɛtɛ́nkpɔ́n lɛ́ nu é. (Xa Filípunu lɛ́ 4:13.) Mǐ ní ɖɔ xó dó lěe Jexóva d’alɔ nɔví súnnu e nɔ nyí Benjamin é, bɔ é dɛ ɖo ninɔmɛ syɛ́nsyɛ́n lɛ́ nu gbɔn é jí. Wǐnnyáwínnyá hwenu tɔn bǐ wɛ é kpó mɛ tɔn lɛ́ kpó ɖibla zán ɖo slǎ bibɛtɛn tɔn lɛ́ mɛ, ɖo Aflíka. Benjamin ɖɔ: “Un xo ɖɛ sɛ́dó Jexóva ɔ, un nɔ lɛ́ xo, bo nɔ byɔ́ ɛ ɖɔ é ní ná mì hlɔ̌nhlɔ́n bónú má wa jlǒ tɔn. Jexóva ná xósin nú ɖɛ ce lɛ́, bo ná mì fífá ayi mɛ tɔn, akɔ́nkpinkpan e sín hudó un ɖó bo ná kpo ɖo wɛn ɔ jlá wɛ é kpó nǔɖuɖu gbigbɔ tɔn e ná zɔ́n bɔ xɔ́ntɔn e mǐ zun é ná kpo ɖo dǒ lí wɛ é kpó.” É ɖɔ gɔ́ ná ɖɔ: “Tan gbɛzán tɔn Kúnnuɖetɔ́ gbɛ̌ ce lɛ́ tɔn xixa kpó lěe Jexóva d’alɔ yě bɔ yě dɛ ɖo wǔvɛ́ yětɔn lɛ́ nu gbɔn é kpó tuuntuun ná hlɔ̌nhlɔ́n kán e un kán ɖ’é jí bá kpo ɖo gbejí é.”

11-12. Nɛ̌ Jexóva ka sixú zán nɔví mǐtɔn gbigbɔ tɔn lɛ́ dó ná xósin nú ɖɛ mǐtɔn lɛ́ gbɔn? (Lɛ̌ kpɔ́n fɔtóo ɔ.)

¹¹ É nɔ zán xwédo gbigbɔ tɔn mǐtɔn. Ðo zǎn e jɛ nukɔn nú gbe e gbe Jezu ná sɔ́ gbɛ tɔn dó sá vɔ̌ ná é mɛ ɔ, é xo ɖɛ kpó ayi bǐ kpó. É sa vo nú Jexóva ɖɔ é ní bló bónú mɛ ɖěvo lɛ́ ní ma lin ɖɔ nunyládómawuwútɔ́ wɛ émí nyí wú wɛ è ɖó kúhwɛ nú émí ó. Jexóva ka wa mɔ̌ ǎ, é nyɔ́ wa ɔ, é sɛ́ nɔví tɔn wɛnsagun ɖokpó dó è bɔ é dó wǔsyɛ́n lanmɛ n’i. (Luk. 22:42, 43) Jexóva sixú d’alɔ mǐ lɔmɔ̌ gbɔn nɔví mǐtɔn ɖé zínzán gblamɛ, bɔ é ná ylɔ́ mǐ, alǒ wá ba mǐ kpɔ́n dó dó wǔsyɛ́n lanmɛ nú mǐ. Mǐ mɛ bǐ wɛ sixú ba ali e nu mǐ ná nɔ ɖɔ “xó ɖagbe” lɛ́ nú nǔɖitɔ́ hǎtɔ́ mǐtɔn lɛ́ ɖe lɛ́ é.—Nǔx. 12:25.

¹² Mǐ ní ɖɔ xó dó nǔ e jɛ dó nɔví nyɔ̌nu e nɔ nyí Miriam é jí é jí. Asú Miriam tɔn kú bɔ é ɖó aklúnɔzángbla yɔywɛ ɖé é ɔ, é ɖo xwégbe éɖokpónɔ, wǔbláwúblá. É ɖo avǐ ya wɛ magbokɔ, bo ɖó hudó mɛ e é ná ɖɔ xó ná é tɔn. É ɖɔ: “Un ɖó hlɔ̌nhlɔ́n bá ylɔ́ mɛ ɖěbǔ ǎ, énɛ́ wú ɔ, un xo ɖɛ sɛ́dó Jexóva. Un kpo ɖo ɖɛ xo wɛ kpó avǐ kpó cóbɔ alǒkan ce ɖɔ nǔ. Mɛxó agun tɔn e nyí xɔ́ntɔn vívɛ́ ce é ɖokpó wɛ ylɔ́.” Mɛxó agun tɔn énɛ́ kpó asi tɔn kpó dó gbɔ nú Miriam. Miriam kú d’é jí ɖɔ Jexóva wɛ sísɛ́ nɔví súnnu énɛ́ bɔ é ylɔ́ ɛ.

13. Nǎ kpɔ́ndéwú e xlɛ́ ɖɔ Jexóva sixú zán mɛ e ma nɔ sɛn ɛ ǎ lɛ́ é dó ná xósin nú ɖɛ mǐtɔn lɛ́ é ɖokpó.

¹³ É sixú zán mɛ e ma nɔ sɛn ɛ ǎ lɛ́ é. (Nǔx. 21:1) Hweɖélɛ́nu ɔ, Jexóva nɔ zán mɛ e ma nɔ sɛn ɛ ǎ lɛ́ é dó ná xósin nú ɖɛ e togun tɔn nɔ xo sɛ́dó è lɛ́ é. Ði kpɔ́ndéwú ɔ, Jexóva sísɛ́ axɔ́sú Aatazɛɛzɛ́si bɔ é ná gbe Nɛɛmíi, lobɔ é lɛ́ kɔ yi Jeluzalɛ́mu, mɔ̌ mɛ ɔ, é d’alɔ bɔ è vɔ́ toxo Jeluzalɛ́mu tɔn ɔ gbá. (Nɛɛ. 2:3-6) Égbé ɖésú ɔ, Jexóva tlɛ sixú lɛ́ zán mɛ ɖěɖěe ma nɔ sɛn ɛ ǎ lɛ́ é bɔ yě ná d’alɔ mǐ hwenu e mǐ ɖó hudó tɔn é.

14. Nɛ̌ nǔ e jɛ dó Soo Hing jí é ka dó wǔsyɛ́n lanmɛ nú we gbɔn? (Lɛ̌ kpɔ́n fɔtóo ɔ.)

¹⁴ Nɔví nyɔ̌nu e nɔ nyí Soo Hing é mɔ ɖɔ Jexóva d’alɔ émí gbɔn dotóo émítɔn jí. Vǐ súnnu tɔn ɖo taglomɛzɔn gěgé jɛ wɛ. Hwenu e vǐ ɔ j’ayǐ sín nǔ e yi aga tawun é ɖé jí, bo gblé wǔ vantankánnyá é ɔ, é kpó asú tɔn kpó jó azɔ̌ yětɔn dó bá dó kpé nukún wǔ tɔn. Wǎgbɔ tɔn ɔ, akwɛ́yózo vun blá yě. Soo Hing mɔ ɖɔ agbɔ̌n émítɔn vɔ, bɔ émí kún sɔ́ sixú dɛ hú mɔ̌ ó. É xo ɖɛ sɛ́dó Jexóva sín ayi mɛ, bo byɔ́ alɔdó tɔn. Dotóo e ɖo azɔ̌ wa nú vǐ ɔ wɛ é wá gbeta ɔ kɔn bá d’alɔ Soo Hing kpó xwédo tɔn kpó. Ðó dotóo ɔ d’alɔ yě wútu ɔ, yě mɔ alɔdó acɛkpikpa ɔ tɔn, bo lɛ́ mɔ fí ɖagbe e yě ná nɔ é. Énɛ́ gúdo ɔ, Soo Hing ɖɔ: “Mǐ mɔ ɖɔ Jexóva d’alɔ mǐ. É wɛ nyí ‘mɛ e nɔ se ɖɛ é’ nǔgbó.”—Ðɛh. 65:3.

É NƆ BYƆ́ NǓÐIÐI CÓBƆ È NÁ Ð’AYI XÓSINE JEXÓVA NƆ NÁ NÚ ÐƐ LƐ́ É WÚ, BO LƐ́ YÍ GBE NÚ YĚ

15. Étɛ́ ka d’alɔ nɔví nyɔ̌nu ɖokpó bɔ é ɖ’ayi wú ɖɔ Jexóva ɖo xósin ná nú ɖɛ émítɔn lɛ́ wɛ?

¹⁵ Ðo kpaa mɛ ɔ, mǐ nɔ mɔ xósin ɖɛ mǐtɔn lɛ́ tɔn ɖo ali e jí wǔ lɛ́ é nu ǎ. Amɔ̌, xósin e mǐ nɔ mɔ lɛ́ é nɔ nyí nǔ e sín hudó mǐ ɖó bá dó kpo ɖo gbejí nú Tɔ́ mǐtɔn jǐxwé tɔn ɔ é pɛ́ɛ́. Hǔn, nɔ ɖó ayi te dó lěe Jexóva nɔ ná xósin nú ɖɛ towe lɛ́ gbɔn é wú. Nɔví nyɔ̌nu ɖé nɔ nyí Yoko, bo mɔ ɖɔ Jexóva kún ɖo xósin ná nú ɖɛ émítɔn lɛ́ wɛ ó, amɔ̌, énɛ́ gúdo ɔ, é jɛ nǔ e é byɔ́ Jexóva lɛ́ é sín kɛ́n sɔ́ jí dó wěma ɖé mɛ. Táan kpɛɖé gúdo ɔ, é nyi nukún kpɔ́n nǔ e é wlán ɖ’ayǐ lɛ́ é, bo ɖ’ayi wú ɖɔ Jexóva ko ná xósin nú ɖɛ émítɔn lɛ́ gěgé, káká jɛ ɖěɖěe émí ma tlɛ sɔ́ flín ǎ lɛ́ é ɖé lɛ́ jí. Sín hweɖénu jɛ hweɖénu ɔ, é nyɔ́ ɖɔ mǐ ní nɔ yi agbɔ̌n jí, bo nɔ lin tamɛ dó lěe Jexóva ɖo xósin ná nú ɖɛ mǐtɔn lɛ́ wɛ gbɔn é jí.—Ðɛh. 66:19, 20.

16. Ðo ɖɛxixo kpáxwé ɔ, nɛ̌ mǐ ka sixú ɖe xlɛ́ ɖɔ mǐ ɖó nǔɖiɖi gbɔn? (Eblée lɛ́ 11:6)

¹⁶ Mǐ nɔ ɖe xlɛ́ Jexóva ɖɔ mǐ ɖó nǔɖiɖi n’i gbɔn ɖɛ xixo sɛ́dó è kɛ́ɖɛ́ gblamɛ ǎ; mǐ nɔ lɛ́ wa mɔ̌ gbɔn gbe yíyí nú xósin e é ná nú ɖɛ mǐtɔn lɛ́ é gblamɛ, ényí é ná bo ná xósin ɔ gbɔn ɖěbǔ ɔ nɛ́. (Xa Eblée lɛ́ 11:6.) Mǐ ní ɖɔ xó dó nǔ e jɛ dó Mike kpó asi tɔn Chrissy kpó wú é jí. Sinsɛnzɔ́wiwa ɖo Betɛ́li wɛ nyí nǔ e gbé nya wɛ yě ɖe é. Mike ɖɔ: “Nyi kpó asi ce kpó d’alɔ wěma mɛ azɔn mɔ̌kpán bá wa sinsɛnzɔ́ ɖo Betɛ́li, bɔ nú mǐ xo ɖɛ sɛ́dó Jexóva dó énɛ́ takúnmɛ ɔ, mǐ nɔ lɛ́ xo, amɔ̌, è ylɔ́ mǐ gbeɖé ǎ.” Mike kpó Chrissy kpó kpo ɖo jiɖe ɖó dó Jexóva wú wɛ ɖɔ é tuun lěe é ná zán émí gbɔn ɖo sinsɛnzɔ́ tɔn mɛ bɔ é ná nyɔ́ hú gǎn é. Yě kpo ɖo nǔ e wú yě kpé é bǐ wa wɛ bo nyí gběxosín-alijítɔ́ hwebǐnu tɔn ɖo fí e hudó sukpɔ́ ɖe é, lobo nɔ lɛ́ ɖ’alɔ ɖo xɔ e tutoblónúnǔ Jexóva tɔn nɔ gbá lɛ́ é mɛ. Égbé din ɔ, nukúnkpénǔwútɔ́ lɛ̌dó tɔn wɛ nú yě. Mike ɖɔ: “Hwebǐnu wɛ Jexóva ná xósin nú ɖɛ mǐtɔn lɛ́ lěe mǐ ba gbɔn é ǎ, amɔ̌, é ná xósin nú yě ɖo ali e tlɛ nyɔ́ hú gǎn bɔ mǐ ma lin ǎ lɛ́ é nu.”

17-18. Sɔgbe xá Ðɛhan 86:6, 7 ɔ, gǎnjɛwú tɛ́ mǐ ka sixú ɖó?

¹⁷ Xa Ðɛhan 86:6, 7. Ðɛhanwlántɔ́ Davídi kú d’é jí ɖɔ Jexóva se ɖɛ émítɔn lɛ́, bo lɛ́ ná xósin nú yě. A sixú ɖeji éɖɔhun. Kpɔ́ndéwú e jí mǐ ɖɔ xó dó ɖo xóta élɔ́ mɛ lɛ́ é ná gǎnjɛwú mǐ ɖɔ Jexóva sixú ná mǐ nǔnywɛ́ kpó hlɔ̌nhlɔ́n kpó e sín hudó mǐ ɖó bá dɛ é. É sixú zán xwédo gbigbɔ tɔn mǐtɔn, alǒ tlɛ sixú gbɔn mɛ ɖěɖěe ma ɖo sinsɛn ɛ wɛ ɖo alɔnu din ǎ lɛ́ é jí dó d’alɔ mǐ ɖo ali ɖé lɛ́ nu.

¹⁸ Jexóva sixú gɔn xósin ná nú ɖɛ mǐtɔn lɛ́ lěe mǐ ba gbɔn é hwebǐnu, amɔ̌, mǐ tuun ɖɔ é ná ná xósin nú yě. É ná ná mǐ nǔ e sín hudó mǐ ɖó é pɛ́ɛ́ ɖo hwenu e mǐ ɖó hudó tɔn dó é pɛ́ɛ́. Hǔn, kpo ɖo ɖɛ xo wɛ kpó nǔɖiɖi kpó, bo ɖeji ɖɔ Jexóva ná kpé nukún dó wǔ we din, lobo ná “ná nǔ e ɖo hǔn mɛ nú we lɛ́ [é] we,” ɖo gbɛ yɔ̌yɔ́ e ja é mɛ.—Ðɛh. 37:4.