XÓTA NǓKPLƆ́NKPLƆ́N TƆN 21
HAN 107 Jexóva, kpɔ́ndéwú wǎnyíyí tɔn
Lěe a ná mɔ mɛ e a sixú wá wlí alɔ xá é gbɔn é
“Nǔ nyɔ́ nú mɛ e mɔ nyɔ̌nu jɔ nyɔ̌nu é. Nyɔ̌nu jɔ nyɔ̌nu xɔ akwɛ́ hú jɛ̌ nana.”—NǓX. 31:10.
XÓNUSƆ́ÐÓTE
Nǔgbódodó Biblu tɔn ɖěɖěe ɖɔ xó dó lěe mɛɖé sixú mɔ mɛ ɖagbe e é ná wlí alɔ xá é gbɔn é wú lɛ́ é kpó lěe mɛ ɖěvo e ɖo agun ɔ mɛ lɛ́ é sixú nɔ gǔdo nú tlɛnnɔ e ɖo biba wɛ bo ná wlí alɔ lɛ́ é gbɔn é kpó.
1-2. (a) Étɛ́ lɛ́ klisánwun tlɛnnɔ lɛ́ ka ɖó ná gbéjé kpɔ́n cóbó ná byɔ́ xɔ́ntɔn mɛ xá mɛɖé? (b) Étɛ́ ka nyí tínmɛ “xɔ́ntɔnmɛninɔ” tɔn? (Kpɔ́n “Tínmɛ ɖé lɛ́.”)
A KA ɖo biba wɛ bo ná wlí alɔ wɛ a? Alɔwlíwlí ɖo dandan bónú è ná ɖó awǎjijɛ ǎ có, klisánwun tlɛnnɔ gěgé, mɛ wínnyáwínnyá, alǒ mɛxó nɔ ɖó nukún bá mɔ mɛɖé bo ná wlí alɔ xá. É ɖo wɛn ɖɔ, cóbónú a ná byɔ́ xɔ́ntɔn mɛ ɔ, a ɖó ná vɛ́ kpó Jexóva kpó ganjí, tuun hwiɖée céɖécéɖé lobo lɛ́ kpé wú bá kpé nukún dó akwɛ́zínzán e alɔwlíwlía nɔ byɔ́ lɛ́ é wú. (1 Kɔ. 7:36) Ényí xó ɖě ma sɔ́ ɖo wǔ we ɖo akpá énɛ́ lɛ́ xwé ǎ ɔ, a ná ɖibla ɖó awǎjijɛ hú gǎn ɖo alɔwlíwlí towe mɛ.
2 É ɖo mɔ̌ có, mɛ ɖagbe e è ná wlí alɔ xá é mimɔ nɔ bɔ wǔ hwebǐnu ǎ. (Nǔx. 31:10) Gɔ́ ná ɔ, ényí a tlɛ mɔ mɛɖé bo ba ná tuun i d’é jí ɔ, xɔ́ntɔn mɛb byɔ́byɔ́ xá ɛ sixú nɔ ma bɔ wǔ. Ðo xóta élɔ́ mɛ ɔ, mǐ ná ɖɔ xó dó nǔ e sixú d’alɔ klisánwun tlɛnnɔ lɛ́ bɔ yě ná mɔ mɛ e yě sixú wá wlí alɔ xá é ɖé, bo lɛ́ byɔ́ xɔ́ntɔn mɛ xá ɛ é jí. Mǐ ná lɛ́ kplɔ́n lěe mɛ ɖěvo e ɖo agun ɔ mɛ lɛ́ é sixú nɔ gǔdo nú mɛ ɖěɖěe ɖo biba wɛ bo ná wlí alɔ lɛ́ é gbɔn é jí.
MƐ ÐAGBE E A SIXÚ WLÍ ALƆ XÁ É BIBA
3. Étɛ́ klisánwun tlɛnnɔ ɖé ka ɖó ná hɛn dó ayi mɛ hwenu e é ɖo mɛ e é ná wlí alɔ xá é ba wɛ é?
3 Ényí a ɖo biba wɛ bo ná wlí alɔ ɔ, é ná nyɔ́ hú gǎn ɖɔ a ní tuun jijɔ ɖěɖěe a ba ɖɔ mɛ e a ná da é ní ɖó lɛ́ é hwɛ̌, cóbó byɔ́ xɔ́ntɔn mɛ xá ɛ. É ma nyí mɔ̌ ǎ ɔ, a sixú xo mɛ e a sixú wá da é ɖé kpo, alǒ byɔ́ xɔ́ntɔn mɛ xá mɛ e ma jɛxá we ǎ é ɖé. É ɖo wɛn ɖɔ, mɛ ɖěbǔ e a sixú wá da é ɖó ná ko bló batɛ́mu. (1 Kɔ. 7:39) Amɔ̌, nú mɛɖé vɛ́ ko bló batɛ́mu ɔ, énɛ́ wɛ xlɛ́ ɖɔ é ná nyí asú alǒ asi ɖagbe nú we ǎ. Énɛ́ wú ɔ, a sixú kanbyɔ́ hwiɖée ɖɔ: ‘Étɛ́ lɛ́ gbé nya wɛ un ka ɖe ɖo gbɛ mɛ? Jijɔ tɛ́ lɛ́ un ka nɔ mɔ ɖɔ é ɖo dandan ɖɔ asú alǒ asi e un ná da é ní ɖó? Nǔ e ɖó nukún wɛ un ɖe lɛ́ é ka ɖo jlɛ̌ jí a?’
4. Étɛ́ lɛ́ tamɛ mɛɖé lɛ́ ka nɔ xo ɖɛ dó?
4 Ényí a ɖo biba wɛ bo ná wlí alɔ ɔ, é ɖo wɛn ɖɔ a ko xo ɖɛ dó mɛ e a ná wlí alɔ xá é mimɔ takúnmɛ. (Filí. 4:6) É ɖo wɛn ɖɔ, Jexóva kún d’akpá ɖɔ émí ná mɔ mɛ e mɛ ɖokpó ɖokpó ná wlí alɔ xá é n’i ó. Amɔ̌, hudó towe lɛ́ kpó lěe nǔ nɔ cí nú we é kpó nɔ ɖu ayi mɛ n’i, bɔ é sixú d’alɔ we ɖo gǎn e dó wɛ a ɖe bo ná mɔ mɛ e a ná da é mɛ. Énɛ́ wú ɔ, kpo ɖo nǔ e nɔ jló we lɛ́ é kpó lěe nǔ nɔ cí nú we é kpó ɖɔ n’i wɛ. (Ðɛh. 62:9) Xo ɖɛ bo byɔ́ suúlu kpó nǔnywɛ́ kpó. (Ja. 1:5) Nɔví súnnu tlɛnnɔ ɖé nɔ nɔ États-Unis bo nɔ nyí John,c bo tínmɛ nǔ e é nɔ sɔ́ dó ɖɛ tɔn lɛ́ mɛ é gbɔn lě: “Un nɔ ɖɔ jijɔ ɖěɖěe un nɔ ba ɖɔ mɛ e un ná wlí alɔ xá é ní ɖó lɛ́ é nú Jexóva. Un nɔ xo ɖɛ sɛ́dó Jexóva ɖɔ é ní hun ali nú mì bónú má xo go mɛ e un ná wlí alɔ xá é. Un nɔ lɛ́ byɔ́ Jexóva ɖɔ é ní d’alɔ mì bónú má ɖó jijɔ ɖěɖěe ná zɔ́n bɔ un ná nyí asú ɖagbe lɛ́ é.” Nɔví nyɔ̌nu ɖé nɔ nɔ Sri Lanka bo nɔ nyí Tanya bo ɖɔ: “Ðó un ɖo asú ba wɛ wútu ɔ, un nɔ byɔ́ Jexóva ɖɔ é ní d’alɔ mì nú má nɔ gbejí, ɖó linlin ɖagbe, lobo lɛ́ ɖó awǎjijɛ.” Ényí a ma tlɛ mɔ mɛ e a ná wlí alɔ xá é tlóló ǎ ɔ, Jexóva d’akpá ɖɔ émí ná kpo ɖo nukún kpé dó wǔ we wɛ ɖo agbaza kpó lěe nǔ nɔ cí nú mɛ é kpó linu.—Ðɛh. 55:23.
5. Ali tɛ́ lɛ́ ka hun nú klisánwun tlɛnnɔ lɛ́ bɔ yě ná xo go mɛ e yí wǎn nú Jexóva é ɖé? (1 Kɔlɛ́ntinu lɛ́ 15:58) (Kpɔ́n fɔtóo ɔ lɔmɔ̌.)
5 Biblu dó wǔsyɛ́n lanmɛ nú mǐ ɖɔ mǐ ní ɖó “nǔ gěgé bo ná wa ɖo Aklúnɔ sín azɔ̌ ɔ” mɛ. (Xa 1 Kɔlɛ́ntinu lɛ́ 15:58.) Ényí alɔnu towe ján ɖo sinsɛnzɔ́ Jexóva tɔn mɛ, bɔ a nɔ lɛ́ zán hwenu ɖó kpɔ́ xá nɔví súnnu kpó nɔví nyɔ̌nu kpó vovo lɛ́ ɔ, a ná zun xɔ́ntɔn e nɔ dó wǔsyɛ́n lanmɛ nú mɛ lɛ́ é, lobɔ ali ná lɛ́ hun nú we bɔ a ná xo go tlɛnnɔ hwiɖɔhun, éé nɔ sɔ́ ayi ɖó Jexóva sinsɛn jí lɛ́ é. Gɔ́ ná ɔ, ényí a nɔ wa nǔ e wú a kpé é bǐ bá nyɔ́ Jexóva nukúnmɛ ɔ, a ná ɖó awǎjijɛ jɔ awǎjijɛ.
Ényí alɔnu towe ján ɖo sinsɛnzɔ́ Jexóva tɔn mɛ, bɔ a nɔ lɛ́ zán hwenu ɖó kpɔ́ xá klisánwun hǎtɔ́ vovo lɛ́ ɔ, a sixú xo go mɛ ɖěvo e ɖo biba wɛ bo ná wlí alɔ lɛ́ é (Kpɔ́n akpáxwé 5)
6. Ényí klisánwun tlɛnnɔ lɛ́ ɖo mɛ e yě ná wlí alɔ xá é ba wɛ ɔ, étɛ́ yě ka ɖó ná flín?
6 Amɔ̌, akpágbanúmɛ sín xó ɖé ɖíe: Ma lɔn nú mɛ e a ná wlí alɔ xá é biba ní wá húzú nǔ tají hú gǎn ɔ ɖo gbɛzán towe mɛ ó. (Filí. 1:10) Awǎjijɛ nǔgbó ɔ nɔ sín alɔwlíwlí alǒ tlɛnmɛninɔ wú ǎ, loɔ, vɛ̌ e è vɛ́ xá Jexóva é wú wɛ é nɔ sín. (Mat. 5:3) Gɔ́ ná ɔ, nú a ɖo tlɛnmɛ ɔ, a sixú vo hú gǎn bo gbló ada nú sinsɛnzɔ́ towe. (1 Kɔ. 7:32, 33) Zǎn hwenu énɛ́ ganjí. Jessica e nɔ nɔ États-Unis bo wlí alɔ hwenu e é ko ɖibla ɖó xwe 40 é ɖɔ: “Hwenu e un ɖo tlɛnmɛ é ɔ, un nɔ bló bɔ alɔnu ce nɔ ján tawun ɖo sinsɛnzɔ́ ɔ mɛ. Énɛ́ d’alɔ mì bɔ alɔwlíwlí ɖo jlǒjló mì wɛ có, un ɖ’awǎjijɛ.”
ZǍN HWENU DÓ BA DO NÚ NǓ DÓ MƐ Ɔ WÚ
7. Étɛ́wú é ka nyí nǔnywɛ́nú ɖɔ è ní kpɔ́n mɛ e è sixú wá wlí alɔ xá é nú hwenu ɖé cóbó ɖɔ n’i ɖɔ nǔ tɔn jɛ émítɔn jí? (Nǔnywɛ́xó 13:16)
7 Ényí a lin ɖɔ mɛɖé sixú nyí asú alǒ asi ɖagbe nú we ɔ ka lo? A ka ɖó ná ɖɔ n’i tlóló ɖɔ nǔ tɔn jɛ émítɔn jí wɛ a? Biblu ɖɔ ɖɔ mɛ e ɖó nǔnywɛ́ é nɔ mɔ nǔ jɛ nǔ mɛ cóbó nɔ wa nǔ. (Xa Nǔnywɛ́xó 13:16.) Énɛ́ wú ɔ, nǔnywɛ́nú wɛ é ná nyí ɖɔ a ní to kpɔ́n mɛ ɔ nú hwenu ɖé hwɛ̌, cóbó ɖɔ n’i ɖɔ nǔ tɔn jɛ émítɔn jí. Aschwin e nɔ nɔ Pays-Bas é ɖɔ: “Bléwún jɛ́n nǔ mɛɖé tɔn sixú jɛ mɛtɔn jí, amɔ̌, bléwún jɛ́n é sixú lɛ́ húzú. Énɛ́ wú ɔ, ényí a zán hwenu dó kpɔ́n mɛɖé ganjí ɔ, a ná zɔn dó jlǒ hwenu kléwún ɖé tɔn jí dó byɔ́ xɔ́ntɔn mɛ xá ɛ ǎ.” Gɔ́ ná ɔ, hwenu e a ná ɖo mɛɖé kpɔ́n wɛ é ɔ, a sixú wá ɖ’ayi wú ɖɔ é kún ná nyí asú alǒ asi ɖagbe nú émí ó.
8. Nɛ̌ tlɛnnɔ ɖé ka sixú kpɔ́n mɛ e é sixú wá wlí alɔ xá é ɖé gbɔn? (Kpɔ́n fɔtóo ɔ lɔmɔ̌.)
8 Nɛ̌ a ka sixú wa gbɔn bo kpɔ́n mɛ ɔ? Ðo kplé agun tɔn lɛ́ alǒ ɖo mɛkplékpɔ́mɛ núwiwa lɛ́ hwenu ɔ, a sixú nɔ ɖó ayi nǔɖé lɛ́ wú dó lěe mɛ ɔ kpó Jexóva kpó vɛ́ gbɔn é, mɛ alɔkpa e é nyí é kpó lěe é nɔ wa nǔ gbɔn é kpó wú. Mɛ̌ mɛ̌ e ka nyí xɔ́ntɔn tɔn lɛ́? Étɛ́ lɛ́ jí é ka nɔ ɖɔ xó dó? (Luk. 6:45) Nǔ e gbé nya wɛ mi ɖe lɛ́ é ka xo nǔ dó akpa ɖokpó ɔ mɛ a? A sixú ɖɔ xó xá mɛxó agun tɔn agun e mɛ é ɖe é tɔn lɛ́, alǒ klisánwun ɖěvo e zin bo tuun i ganjí lɛ́ é. (Nǔx. 20:18) A sixú kan nǔ byɔ́ dó nyǐkɔ e é ɖó ɖo ta é kpó jijɔ tɔn lɛ́ kpó wú. (Hwli. 2:11) Ée a ná ɖo mɛ ɔ kpɔ́n wɛ é ɔ, ɖǒ ayi te bónú é ní ma wá cí ɖě n’i ó. Ðǒ sísí nú lěe nǔ nɔ cí nú mɛ ɔ é kpó nǔ e kan éɖésúnɔ lɛ́ é kpó, bo ma nɔ ɖo gǒ mɛ n’i hwebǐnu ó.
Cóbónú a ná ɖɔ nú mɛɖé ɖɔ nǔ tɔn jɛ émítɔn jí hǔn, to kpɔ́n mɛ ɔ nú hwenu ɖé hwɛ̌ (Kpɔ́n akpáxwé 7-8)
9. Cóbónú a ná ɖɔ xó nú mɛ e a sixú wá wlí alɔ xá é ɔ, étɛ́ lɛ́ jí a ka ɖó ná kú dó hwɛ̌?
9 Táan nabí a ka ná kpɔ́n mɛ ɔ ná cóbó ɖɔ n’i ɖɔ nǔ tɔn jɛ émítɔn jí? Ényí a zɔn kplakpla jí bo ɖɔ xó nú mɛ ɔ ɔ, è sixú mɔ ɖɔ a kún nɔ lin tamɛ ganjí cóbó nɔ wá gbeta towe lɛ́ kɔn ó. (Nǔx. 29:20) Ðo alɔ ɖěvo mɛ ɔ, ényí a dán lɛjɛlɛjɛ dín ɔ, è sixú mɔ ɖɔ a nɔ xo nǔ kpɔ́n dó gbeta towe lɛ́ kɔn wíwá wú dín, tají ɔ, ényí mɛ ɔ ɖ’ayi wú ɖɔ nǔ émítɔn jɛ towe jí ɔ nɛ́. (Nǔt. 11:4) Flín ɖɔ é kún byɔ́ ɖɔ a ní kú d’é jí ɖɔ mɛ e émí ná da é nɛ́ cóbó ɖɔ xó nú mɛ ɔ ó. Amɔ̌, a ɖó ná kú d’é jí ɖɔ émí ɖo gbesisɔmɛ bo ná wlí alɔ, bo lɛ́ kú d’é jí ɖɔ mɛ ɖě ɔ sixú nyí asú alǒ asi ɖagbe nú émí.
10. Ényí a ɖó ayi wú ɖɔ nǔ émítɔn jɛ mɛɖé tɔn jí bɔ é ma ka nyí mɔ̌ nú hwɛ a ɔ, étɛ́ a ka ɖó ná wa?
10 Amɔ̌, ényí a ɖ’ayi wú ɖɔ nǔ émítɔn jɛ mɛɖé tɔn jí ɔ ka lo? Ényí nǔ ma cí mɔ̌ nú hwi lɔ ǎ hǔn, tɛ́n kpɔ́n bo ɖe xlɛ́ nyi wɛn ɖo nǔwiwa towe lɛ́ mɛ. Ényí a wa nǔ gbɔn ɖě b’ɛ zɔ́n bɔ mɛ ɖě ɔ lin ɖɔ a ná ɖo gbesisɔmɛ bo ná byɔ́ xɔ́ntɔn mɛ xá émí bɔ é ma ka nyí mɔ̌ ǎ ɔ, énɛ́ ná nyí nǔwiwa kpó xomɛnyínyɔ́ kpó ǎ.—1 Kɔ. 10:24; Efɛ́. 4:25.
11. Ðo ayǐ e jí mɛ ɖěvo lɛ́ nɔ d’alɔ mɛ bɔ è nɔ mɔ mɛ e è ná byɔ́ xɔ́ntɔn mɛ xá alǒ wlí alɔ xá é ɔ, étɛ́ lɛ́ è ka ɖó ná hɛn dó ayi mɛ?
11 Ðo ayǐ ɖé lɛ́ jí ɔ, è sixú nɔ ɖó nukún ɖɔ mɛjitɔ́ lɛ́ alǒ mɛxó ɖěvo lɛ́ ní ba mɛ e hɛ̌nnumɔ yětɔn tlɛnnɔ lɛ́ ná da é nú yě. Ðo ayǐ ɖěvo lɛ́ jí ɔ, tlɛnnɔ ɖé sín hɛ̌nnumɔ lɛ́ alǒ xɔ́ntɔn tɔn lɛ́ nɔ mɔ mɛ e é sixú wá wlí alɔ xá é ɖé, bɔ énɛ́ gúdo ɔ, yě nɔ bló tuto bɔ súnnu ɔ kpó nyɔ̌nu ɔ kpó nɔ mɔ yěɖée bo ná dó kpɔ́n ɖɔ yě ka ná jɛxá yěɖée a jí. Ényí è byɔ́ we ɖɔ a ní ba mɛ e mɛɖé ná byɔ́ xɔ́ntɔn mɛ xá é alǒ da é n’i hǔn, hɛn jlǒ súnnu ɔ kpó nyɔ̌nu ɔ kpó tɔn lɛ́, gɔ́ nú hudó yětɔn lɛ́ ayi mɛ. Ényí a lin ɖɔ mɛɖé sixú wá nyí asú alǒ asi ɖagbe nú xɔ́ntɔn ɖé alǒ hɛ̌nnumɔ ɖé hǔn, tɛ́n kpɔ́n bo tuun mɛ alɔkpa e mɛ ɔ nyí é, jijɔ tɔn lɛ́, bɔ ɖo tají hú gǎn ɔ, tɛ́n kpɔ́n bo tuun lě do é vɛ́ xá Jexóva sɔ é. Xɔ́ntɔn vívɛ́ zunzun xá Jexóva ɖo tají tawun hú akwɛ́, wěma kplɔ́nkplɔ́n alǒ tɛn e mɛ è ɖe ɖo gbɛ mɛ é. Amɔ̌, flín ɖɔ nɔví súnnu tlɛnnɔ ɔ kpó nɔví nyɔ̌nu tlɛnnɔ ɔ kpó ɖésúnɔ wɛ ɖó ná wá gbeta gǔdo gúdo tɔn ɔ kɔn ɖɔ yě ná da yěɖée lɛ́ alǒ gbɔ.—Ga. 6:5.
XƆ́NTƆN MƐ BYƆ́BYƆ́
12. Ényí a jló ná byɔ́ xɔ́ntɔn mɛ xá mɛɖé ɔ, nɛ̌ a ka sixú ɖɔ n’i gbɔn?
12 Ényí a jló ná byɔ́ xɔ́ntɔn mɛ xá mɛɖé ɔ, nɛ̌ a ka sixú ɖɔ n’i gbɔn?d A sixú bló tuto xá mɛ ɔ bónú mi ná ɖɔ xó ɖó kpɔ́ ɖo fí e ɖo agbawungba é ɖé alǒ gbɔn alǒkan jí. Ðɔ linlin towe lɛ́ nyi wɛn. (1 Kɔ. 14:9) Ényí é byɔ́ ɖó mɔ̌ hǔn, nǎ hwenu mɛ ɔ bónú é ná lin tamɛ dó xósin e é ná ná we é jí. (Nǔx. 15:28) Ényí xɔ́ntɔn mɛ byɔ́byɔ́ xá we ma ka jló mɛ ɔ ǎ hǔn, ɖǒ sísí nú lěe nǔ cí n’i é.
13. Ényí mɛɖé ɖɔ nú we ɖɔ nǔ towe jɛ émítɔn jí ɔ, étɛ́ a ka sixú wa? (Kolósinu lɛ́ 4:6)
13 Ényí mɛɖé ɖɔ nú we ɖɔ nǔ towe jɛ émítɔn jí ɔ ka lo? É ná ɖibla byɔ́ akɔ́nkpinkpan ɖo mɛ ɔ sí cóbɔ é ná ɖɔ xó nú we, énɛ́ wú ɔ, nyɔ̌ xomɛ dó wǔ tɔn bo lɛ́ ɖó sísí n’i. (Xa Kolósinu lɛ́ 4:6.) Ényí a ɖó hudó hwenu tɔn bo ná lin tamɛ dó xó ɔ wú bá kpɔ́n ɖɔ émí ná byɔ́ xɔ́ntɔn mɛ xá ɛ, alǒ gbɔ a jí hǔn, ɖɔ mɔ̌ n’i. Amɔ̌, tɛ́n kpɔ́n bo yá wǔ ná xósin ɔ lěe é nyɔ́ bló gbɔn é. (Nǔx. 13:12) Ényí é ma jló we ǎ hǔn, ɖɔ kpó xomɛnyínyɔ́ kpó bo lɛ́ ɖɔ nyi wɛn. Ð’ayi lěe nɔví súnnu e nɔ nɔ Autriche bo nɔ nyí Hans é wa nǔ gbɔn hwenu e nɔví nyɔ̌nu ɖé ɖɔ xó n’i é wú: “Un ɖɔ gbeta e kɔn un wá é n’i kpó xomɛnyínyɔ́ kpó bo ka lɛ́ ɖɔ nyi wɛn. Tɛn tɔn mɛ jɛ́n un wa mɔ̌ ɖe, ɖó un ba ɖɔ é ní ɖó nukún nǔ dó wǔvɔ́ ǎ. Énɛ́ gúdo ɔ, ɖó hwɛjijɔ ɖokpó énɛ́ wú ɔ, un nɔ lɛ́ nɔ acéjí dó lěe un nɔ wa nǔ xá ɛ gbɔn é wú.” Ðo alɔ ɖěvo mɛ ɔ, ényí xɔ́ntɔn mɛ byɔ́byɔ́ xá mɛ énɛ́ ɖ’é wú nú hwi lɔ hǔn, ɖɔ lěe nǔ cí nú we é n’i, énɛ́ gúdo hǔn, mi ɖɔ xó ɖó kpɔ́ dó lěe mi ba ɖɔ nǔ lɛ́ ní yi gbɔn ɖo xɔ́ntɔnmɛninɔ ɔ hwenu é jí. Xá e mɛ a su ɖe é, alǒ nǔ ɖěvo lɛ́ sixú zɔ́n bɔ lěe a ba ɖɔ nǔ lɛ́ ní yi gbɔn é sixú gbɔn vo nú lěe mɛ ɖě ɔ ba gbɔn é.
NƐ̌ MƐ ÐĚVO LƐ́ KA SIXÚ NƆ GǓDO NÚ KLISÁNWUN TLƐNNƆ LƐ́ GBƆN?
14. Nɛ̌ mǐ ka sixú nɔ gǔdo nú klisánwun tlɛnnɔ lɛ́ ɖo xóɖiɖɔ mɛ gbɔn?
14 Nɛ̌ mǐ mɛ ɖokpó ɖokpó ka sixú nɔ gǔdo nú klisánwun tlɛnnɔ e ɖo biba wɛ bá wlí alɔ lɛ́ é gbɔn? Ali e nu mǐ sixú wa mɔ̌ ɖe é ɖokpó wɛ nyí ɖɔ mǐ ní nɔ nɔ acéjí dó nǔ e mǐ nɔ ɖɔ lɛ́ é wú. (Efɛ́. 4:29) Mǐ sixú kanbyɔ́ mǐɖée ɖɔ: ‘Un ka nɔ ɖó alisá e sixú ɖó wǔvɛ́, alǒ dó cɔcɔ nú mɛ e ɖo biba wɛ bo ná wlí alɔ lɛ́ é wɛ a? Ényí un mɔ bɔ nɔví súnnu tlɛnnɔ ɖé kpó nɔví nyɔ̌nu tlɛnnɔ ɖé kpó ɖo xó ɖɔ wɛ ɔ, un nɔ lin ɖɔ kancícá wǎnyíyí tɔn ɖé jɛ́n ko ɖo yě mɛ we lɛ́ tɛ́ntin wɛ a?’ (1 Tim. 5:13) Gɔ́ ná ɔ, mǐ ɖó ná bló bɔ klisánwun tlɛnnɔ lɛ́ ná nɔ mɔ ɖɔ ɖo ali ɖé nu ɔ nǔɖé hwedó émí, ɖó émí kún ɖó asú alǒ asi ó wútu gbeɖé ǎ. Hans e xó mǐ ɖɔ wá yi é ɖɔ: “Nɔví ɖé lɛ́ nɔ ɖɔ: ‘Aniwú a ma ka ko wlí alɔ ǎ? A ma ka sɔ́ nyí yɔkpɔ́vú nɛ́.’ Xó mɔ̌hun lɛ́ ɖiɖɔ sixú zɔ́n bɔ tlɛnnɔ lɛ́ ná mɔ ɖɔ è kún yí wǎn nú émí ó, bɔ mɔ e yě sixú ko nɔ mɔ ɖɔ émí ɖó ná wlí alɔ é nɔ lɛ́ syɛ́n d’é jí.” É ná nyɔ́ hú gǎn tawun ɖɔ è ní nɔ ba ali e nu è ná kpa klisánwun tlɛnnɔ lɛ́ ɖe lɛ́ é!—1 Tɛ. 5:11.
15. (a) Sɔgbe xá nǔgbódodó e ɖo Hlɔ̌manu lɛ́ 15:2 mɛ é ɔ, étɛ́ jí mǐ ka ɖó ná lin tamɛ dó cóbó ná d’alɔ mɛɖé bɔ é ná mɔ mɛ e é ná wlí alɔ xá é? (b) Nǔ tají tɛ́ lɛ́ video ɔ ka kplɔ́n we?
15 Ényí mǐ lin ɖɔ nɔví súnnu ɖé kpó nɔví nyɔ̌nu ɖé kpó ná jɛxá yěɖée ɔ ka lo? Biblu ɖɔ nú mǐ ɖɔ lěe nǔ nɔ cí nú mɛ ɖěvo lɛ́ é ní nɔ ɖu ayi mɛ nú mǐ. (Xa Hlɔ̌manu lɛ́ 15:2.) Tlɛnnɔ gěgé nɔ ba ɖɔ mɛ ɖěvo lɛ́ ní dó gesí mɛɖé nú émí ɖɔ é sixú nyí asú alǒ asi ɖagbe nú émí ǎ, bɔ mǐ ɖó ná ɖó sísí nú jlǒ yětɔn. (2 Tɛ. 3:11) Yě mɛ ɖé lɛ́ sixú ba ɖɔ mǐ ní dó alɔ émí, amɔ̌, ényí yě ma byɔ́ alɔdó mǐtɔn ǎ ɔ, mǐ ɖó ná d’afɔ mɛ ǎ.e (Nǔx. 3:27) Ényí alɔdó ɔ ma ɖo tlɔlɔ mɔ̌ ǎ ɔ, é nɔ nyɔ́ tlɛnnɔ ɖé lɛ́ nukúnmɛ hú gǎn. Lydia e nyí nɔví nyɔ̌nu tlɛnnɔ e gosín Allemagne é ɖé ɖɔ: “A sixú ylɔ́ nɔví súnnu ɔ kpó nɔví nyɔ̌nu ɔ kpó wá mɛkplékpɔ́mɛ núwiwa ɖé domɛ. Vɛ̌ ko hun ali ɖé nú nɔví súnnu ɔ kpó nɔví nyɔ̌nu ɔ kpó bónú yě ná xo go yěɖée lɛ́ kpowun, bo jó éé kpo é dó nyi alɔ mɛ nú yě.”
Mɛkplékpɔ́mɛ núwiwa lɛ́ nɔ hun ali nú klisánwun tlɛnnɔ lɛ́ bɔ yě nɔ xo go yěɖée (Kpɔ́n akpáxwé 15)
16. Étɛ́ klisánwun tlɛnnɔ lɛ́ ka ɖó ná hɛn dó ayi mɛ?
16 Mǐ bǐ sixú ɖó gbɛzán awǎjijɛnɔ e jɛmɛ nú mɛ é ɖé, ényí mǐ nyí tlɛnnɔ, alǒ ko wlí alɔ ɔ nɛ́! (Ðɛh. 128:1) Énɛ́ wú ɔ, ényí a ɖo biba wɛ bo ná wlí alɔ bo ma ka ko mɔ mɛɖé ǎ hǔn, kpo ɖo ayi sɔ́ ɖó sinsɛnzɔ́ e wa nú Jexóva wɛ a ɖe é jí wɛ. Nɔví nyɔ̌nu ɖé nɔ nɔ Macao bo nɔ nyí Sin Yi bo ɖɔ: “Ényí è sɔ́ hwenu e a ná nɔ kpɔ́ xá asú towe, alǒ asi towe ná ɖo palaɖísi mɛ é jlɛ́ dó hwenu e a ná nɔ tlɛnmɛ ná é wú ɔ, hwenu e a ná nɔ tlɛnmɛ ná é ná sukpɔ́ káká ɖé ǎ. Ðu hwenu énɛ́ sín vǐví, bo lɛ́ zán ganjí.” Amɔ̌, ényí a ko mɔ mɛ e a sixú wá da é ɖé bo ko byɔ́ xɔ́ntɔn mɛ xá ɛ ɔ ka lo? Ðo xóta e bɔ d’é wú é mɛ ɔ, mǐ ná ɖɔ xó dó nǔ e a sixú wa bɔ xɔ́ntɔnmɛninɔ ɔ ná kpa we é jí.
HAN 137 Nyɔ̌nu gbejínɔtɔ́ lɛ́
a Bónú a ná tuun nú a ɖo gbesisɔmɛ bo ná wlí alɔ, alǒ gbɔ ɔ, kpɔ́n xóta “Xɔ́ntɔnmɛninɔ: Akpáxwé 1: Un ko ɖo gbesisɔmɛ bo ná byɔ́ xɔ́ntɔn mɛ wɛ a?” ɖo jw.org jí.
b TÍNMƐ ÐÉ LƐ́: Ðo xóta élɔ́ kpó éé bɔ d’é wú é kpó mɛ ɔ, “xɔ́ntɔnmɛninɔ” nɔ dó gesí avla e mɛ súnnu ɖé kpó nyɔ̌nu ɖé kpó nɔ kplɔ́n bo nɔ tuun yěɖée hú gǎn, bo ná dó kpɔ́n nú yě ná nyí asú kpó asi kpó ɖagbe nú yěɖée lɛ́ a jí é. Súnnu ɖé kpó nyɔ̌nu ɖé kpó nɔ byɔ́ xɔ́ntɔn mɛ hwenu e yě ɖe xlɛ́ yěɖée lɛ́ nyi wɛn ɖɔ nǔ yěɖée lɛ́ tɔn jɛ yěɖée lɛ́ tɔn jí é. Xɔ́ntɔnmɛninɔ ɔ nɔ ɖo yiyi wɛ káká jɛ hwenu e yě wá gbeta ɔ kɔn ɖó kpɔ́ ɖɔ yě ná da yěɖée, alǒ ɖó nǔ xɔ́ntɔnmɛninɔ ɔ nu é.
c È ɖyɔ̌ nyǐkɔ ɖé lɛ́.
d Ðo ayǐ ɖé lɛ́ jí ɔ, hwɛhwɛ ɔ, nɔví súnnu ɖé wɛ nɔ ɖɔ xó nú nɔví nyɔ̌nu ɖé, bɔ yě nɔ byɔ́ xɔ́ntɔn mɛ. É ɖo mɔ̌ có, nɔví nyɔ̌nu ɖé sixú wá gbeta ɔ kɔn bo ɖɔ xó nú nɔví súnnu ɖé, bɔ énɛ́ ka sɔgbe. (Hwlí. 3:1-13) Bónú a ná mɔ mɔjɛmɛ ɖěvo lɛ́ hǔn, kpɔ́n xóta “Les jeunes s’interrogent . . . Comment lui dire ce que je ressens pour lui?” ɖo Réveillez-Vous! 22 octobre 2004 mɛ.
e Kpɔ́n video Mɛ e fun ahwan nú nǔɖiɖi bɔ é kpa yě lɛ́ é: Klisánwun tlɛnnɔ lɛ́ ɖo jw.org jí.