TÀN 38
Amɛ̌ 12 Lɛ
KPƆ́N atín sínsɛ́n e sunnu lɛ hɛn ɖò ɖiɖe ɔ mɛ é. A mɔ lee hwǐn viwun sínsɛ́n ɔ tɔn kló sɔ́ é à? Sunnu wè kpiɖikpiɖi wɛ hɛn ɖó kpò kɔ ɖò abɔta. Lɛ́ kpɔ́n atín sínsɛ́n ɖě lɛ lɔmɔ̌. Fitɛ ye ka hɛn atín sínsɛ́n ɖɛkpɛɖɛkpɛ enɛ lɛ sín? Kanaa wɛ. A ka flín ɖɔ Kanaa wɛ Ablaxamu, Izaki kpo Jakɔbu kpo nɔ à? Amɔ̌, ee adɔ tɔ́n é ɔ, Jakɔbu kpo xwédo tɔn kpo sɛ̀ tɛn yì Ejipu. Ðibla yì xwè 216 gudo ɔ, Mɔyizi kplá Izlayɛli-ví lɛ, bɔ ye lɛkɔ wá xwè Kanaa. Ye wá jɛ fí e è nɔ ylɔ ɖɔ Kadɛci é ɖò gbetótló ɔ mɛ.
Mɛ baɖabaɖa lɛ wɛ ɖò Kanaa. Enɛ wu ɔ, Mɔyizi sɛ́ amɛ̌ 12 dó bo ɖɔ nú ye ɖɔ: ‘Mi kpɔ́n lee mɛ e ɖò tò ɔ mɛ lɛ é sukpɔ́ gbɔn é, kpo lee ye ɖó hlɔnhlɔn gbɔn é kpo. Mi kpɔ́n ɖɔ ayikúngban ɔ sixu nyɔ́ jinukún à jí. Mi ja hǔn, mi hɛn atín sínsɛ́n ɖé lɛ wá.’
Ee amɛ̌ lɛ lɛkɔ wá Kadɛci é ɔ, ye ɖɔ nú Mɔyizi ɖɔ: ‘Tò ɔ nyɔ́ tawun.’ Ye xlɛ́ atín sínsɛ́n ɖé lɛ Mɔyizi, bo dó ɖexlɛ́ ɖɔ nugbǒ ɖɔ wɛ emi ɖè. Amɔ̌, amɛ̌ 10 ɖɔ: ‘Mɛ e ɖò tò ɔ mɛ lɛ é hwǎn, bo lɛ́ ɖó hlɔnhlɔn. Enyi mǐ tɛnkpɔn bo na yí tò ɔ ɔ, ye na hu mǐ.’
Ee Izlayɛli-ví lɛ sè mɔ̌ é ɔ, ado hu ye. Ye ɖɔ: ‘Enyi mǐ gbɔ ɔ kú ɖò Ejipu kabǐ ɖò gbetótló mɛ fí ɔ, é nyɔ́ hú. Ye na hu mǐ ɖò ahwangbenu, bo na wlí asì mǐtɔn kpo vǐ mǐtɔn lɛ kpo. Mi nú mǐ ni sɔ́ gǎn ɖevo ɖó Mɔyizi tɛnmɛ, bo lɛkɔ yì Ejipu!’
Amɔ̌, amɛ̌ wè ɖeji dó Jehovah wu, bo tɛnkpɔn bo na xò hwìhwɛ́ togun ɔ. Jozuwe kpo Kalɛbu kpo wɛ. Ye ɖɔ: ‘Mi ma ɖi xɛsi ó. Jehovah ɖò kpɔ́ xá mǐ. Tò ɔ yíyí na bɔwǔ nú mǐ.’ Amɔ̌, togun ɔ ɖótó ye ǎ. Ye lɛ́ jló na hu Jozuwe kpo Kalɛbu kpo.
Nǔ enɛ sìn xomɛ nú Jehovah ɖesu, bɔ é ɖɔ nú Mɔyizi ɖɔ: ‘Izlayɛli-ví e ɖó xwè bɛ́sín 20 lɛ é ɖebǔ na yì ayikúngban Kanaa tɔn jí ǎ. Ye mɔ nùjiwǔ e Un bló ɖò Ejipu kpo gbetótló mɛ kpo lɛ é, cobo ka ɖeji dó wutu ce ǎ. Enɛ wu ɔ, ye na ɖò lele sà wɛ ɖò gbetótló ɔ mɛ nú xwè 40 kaka jɛ hwenu e mɛ gudo tɔn ɔ na kú é. Jozuwe kpo Kalɛbu kpo kɛɖɛ wɛ na yì ayikúngban Kanaa tɔn jí.’
Nombres 13:1-33; 14:1-38.