Tɛwu Mawu Ma ka Nɔ Sè Ðɛ lɛ Bǐ À?

“Enyi mi ɖò ɖɛ xò wɛ hǔn, mi ma nɔ ɖò nǔ ɖokpo ɔ lɛ vɔ́ ɖɔ wɛ . . . ó.”—Matie 6:7.

Jehovah nɔ ba ɖɔ mǐ ni vɔ́ ɖɛ e mǐ ko kplɔ́n dó tamɛ lɛ é xò, alǒ, vɔ́ ɖɛ e ɖò wema ɖé mɛ lɛ é xà ǎ. É nyɔ́ wà ɔ, é nɔ jló ɖɔ mǐ ni ɖɔ xó sín ayi mɛ. Enyi xɔ́ntɔn ɖé nɔ ɖò nǔ ɖokpo ɔ lɛ ɖɔ nú we wɛ hwebǐnu ɔ, dó nukún lee nǔ na ko cí nú we é mɛ kpɔ́n! Xɔ́ntɔn jɔ xɔ́ntɔn lɛ nɔ nyɔ́ lyá, bo nɔ lɛ́ ɖɔ xomɛ nú yeɖée. Enyi mǐ nɔ zán xógbe mǐɖesunɔ tɔn lɛ dó xoɖɛ sɛ́dó Tɔ́ mǐtɔn jixwé tɔn ɔ ɔ, enɛ nɔ xlɛ́ ɖɔ mǐ nɔ sɔ́ ɛ dó mɔ xɔ́ntɔn.

“Mi na bo byɔ ɔ, mi nɔ mɔ ǎ, ɖó ayixa nyanya wɛ mi nɔ dó byɔ.”—Jaki 4:3.

Enyi mǐ nɔ byɔ nǔ ɖěɖee mǐ tuùn ɖɔ Mawu kún ba ɖɔ mǐ ni wà, alǒ, ɖó lɛ é ó ɔ, é ɖò wɛn ɖɔ mǐ kún sixu ɖó nukún ɖɔ é na na sinkɔn nú ɖɛ mǐtɔn lɛ ó. Ði kpɔ́ndéwú ɔ, enyi mɛɖé da akɔ, bo xoɖɛ sɛ́dó Mawu ɖɔ ni d’alɔ emi bonu emi ni ɖó ta nyínyɔ́ bá ɖu akwɛ ɔ ɔ, Mawu ka na na sinkɔn nú ɖɛ mɔ̌hun à? É ɖɔ nú mǐ tlɔlɔ ɖɔ mǐ ni ma nɔ dó nukúnkɛ́n ó; mǐ ni ma ka lɛ́ ɖi nǔ nú xɛxó lɛ ó, ɖi taɖagbe mɔ̌. (Ezayíi 65:11; Luki 12:15) É ɖò wɛn ɖɔ, mǐ kún sixu ɖó nukún ɖɔ Jehovah na na sinkɔn nú ɖɛ mɔ̌hun lɛ ó! Cobonu Mawu na na sinkɔn nú nǔ e byɔ ɛ wɛ mǐ ɖè lɛ é ɔ, mǐ ɖó na kúdeji ɖɔ nǔ e byɔ ɛ wɛ mǐ ɖè lɛ é sɔgbe xá nǔ e é ɖɔ nú mǐ ɖò Biblu mɛ lɛ é.

“Mɛ e nɔ dó tókúse sɛ́n ɔ mɛ ɔ, ɖɛ e é nɔ xò ɔ nɔ vɛ́ sè nú Mawu.”—Nǔnywɛxó 28:9.

Ðò Biblu sín táan mɛ ɔ, Mawu na sinkɔn nú ɖɛ mɛ ɖěɖee wɔn ya nú sɛ́n jlɔjlɔ tɔn lɛ é tɔn ǎ. (Ezayíi 1:15, 16) Mawu ko ɖyɔ ǎ. (Malacíi 3:6) Enyi mǐ ba ɖɔ Mawu ni na sinkɔn nú ɖɛ mǐtɔn lɛ ɔ, mǐ ɖó na wà nǔ e wu mǐ kpé é, bo setónú nú sɛ́n tɔn lɛ. Amɔ̌, bonu mǐ ka ko wà nǔ e ma sɔgbe ǎ lɛ é wá yì ɔ lo? Enɛ xlɛ́ ɖɔ Jehovah kún sɔ́ na ɖótó mǐ gbeɖé ó wɛ à? Cɛ́nnyícɛ́nnyí ɖé lɔ ǎ. Enyi mǐ nɔ xlɛ́ ɖɔ nǔ nyanya e mǐ wà wá yì lɛ é vɛ́ nú mǐ, bɔ mǐ nɔ wà nǔ e wu mǐ kpé é bǐ bo na dó nyɔ́ Mawu nukúnmɛ ɔ, é na sɔ́ hwɛ kɛ mǐ kpo wanyiyi kpo.—Mɛsɛ́dó 3:19.