Kplɔ́n nǔ bá má xá mɛ ɖěvo lɛ́

Nǔkplɔ́nkplɔ́n sixú fá kɔ nú mǐ, amɔ̌, nǔ e sixú lɛ́ fá kɔ nú mǐ hú gǎn é wɛ nyí dɔkun gbigbɔ tɔn wǔsyɛ́n dó lanmɛ nú mɛ tɔn e mǐ nɔ mɔ lɛ́ é mímá xá mɛ ɖěvo lɛ́. Nǔnywɛ́xó 11:25 ɖɔ: “Mɛ e nɔ ná sin mɛ ɔ, è nǎ ná é lɔmɔ̌, bɔ é ná nu bo ɖi kɔ.”

Ényí mǐ nɔ má nǔ e mǐ kplɔ́n lɛ́ é xá mɛ ɖěvo lɛ́ ɔ, é sixú bɔ wǔ nú mǐ hú gǎn bɔ mǐ ná nɔ flín nǔ e mǐ kplɔ́n lɛ́ é, bɔ nukúnnúmɔjɛnǔmɛ mǐtɔn ná lɛ́ gɔ́ngɔ́n d’é jí. Gɔ́ ná ɔ, ɖó dɔkun mɔ̌hun lɛ́ sixú hɛn le wá nú mɛ ɖěvo lɛ́ wútu ɔ, mǐmá xá yě nɔ dó awǎjijɛ nú mǐ.—Mɛ. 20:35.

Tɛ́n nǔ élɔ́ kpɔ́n: Ðo aklúnɔzángbla e ja é mɛ ɔ, ba ali e nu a ná má nǔ e a kplɔ́n é ɖé xá mɛɖé ɖe é. A sixú má xá mɛ e ɖo xwédo towe mɛ é ɖé, mɛ e ɖo agun towe mɛ é ɖé, azɔ̌watɔ́gbɛ́ ɖé, wěmaxɔmɛvígbɛ́ ɖé, nɔzo ɖé, alǒ mɛ e a xo go ɖo sinsɛnzɔ́ ɔ mɛ é ɖé. Tɛ́n kpɔ́n bo tín nǔ lɛ́ mɛ dó xógbe hwiɖésú tɔn mɛ, bónú é ní bɔkun, bo lɛ́ za wě.

Flín: Mǎ nǔ e a kplɔ́n é xá mɛ ɖěvo lɛ́ dó dó wǔsyɛ́n lanmɛ nú yě, é ní ma nyí bo ná dó hu ji nú yě ó.—1 Kɔ. 8:1.