Nɔ ba nǔ xɔ akwɛ́ e a sixú zán lɛ́ é

Ényí mǐ ɖo Biblu xa wɛ ɔ, mǐ sixú ba nǔ xɔ akwɛ́ lɛ́ gbɔn do biba nú nǔ gblamɛ. Amɔ̌, nɛ̌ mǐ ka sixú ɖu le tɔn bǐ mlɛ́mlɛ́ gbɔn?

Nɔ kíjé tan Biblu tɔn lɛ́ sín gǒflɛ́mɛ lɛ́ kpɔ́n. Ði kpɔ́ndéwú ɔ, nɔ ba do nú mɛ e wlán tan ɔ é, mɛ e wú é wlán é kpó hwenu e é wlán é kpó. Ninɔmɛ tɛ́ lɛ́ mɛ é ka wlán tan ɔ ɖe? Étɛ́ ka jɛ jɛ nukɔn ná? Étɛ́ ka jɛ bɔ d’é wú?

Nɔ ba nǔkplɔ́nmɛ lɛ́ gbɔn xósin biba nú nǔkanbyɔ́ lěhun lɛ́ gblamɛ: ‘Nɛ̌ nǔ ka cí nú mɛ e xó tan ɔ ɖɔ lɛ́ é? Jijɔ tɛ́ lɛ́ yě ka ɖe xlɛ́? Étɛ́wú un ka ɖó ná ɖe jijɔ énɛ́ lɛ́ xlɛ́, alǒ nyi alɔ nú yě?’

Nɔ zán nǔ e a kplɔ́n lɛ́ é, bóyá ɖo sinsɛnzɔ́ ɔ mɛ, alǒ hwenu e a ɖo nǔ wa xá mɛ ɖěvo lɛ́ wɛ é. Ényí a wa mɔ̌ ɔ, a ná mɔ ɖɔ nǔgbó wɛ nyí xó élɔ́ e Jezu ɖɔ é: “Ðó mi tuun nǔ énɛ́ lɛ́ wútu ɔ, awǎjijɛnɔ wɛ nú mi, ényí mi bló ɖ’é jí ɔ nɛ́.”—Jaan 13:17.

• Wěɖexámɛ: Nɔ ɖ’ayi lěe azɔ̌wanú e ɖo akpáxwé Dɔkun Mawuxó ɔ tɔn ɖé lɛ́, éé nɔ tɔ́n ɖo kplé aklúnɔzángbla tɛ́ntin tɔn mɛ é nɔ d’alɔ mǐ bɔ mǐ nɔ zán nǔ e mǐ kplɔ́n lɛ́ é gbɔn é wú. Hwɛhwɛ ɔ, nǔ e mǐ sixú nɔ kanbyɔ́ mǐɖée lɛ́ é, nǔ e jí mǐ sixú lin tamɛ dó lɛ́ é kpó nǔjlɛ́dónǔwú e mǐ sixú gbéjé kpɔ́n lɛ́ é kpó nɔ ɖo akpáxwé énɛ́ mɛ.