Blǒ bónú lěe a nɔ xo ɖɛ gbɔn é ní kpɔ́n te d’é jí

1. Étɛ́ Jexóva ka byɔ́ mɛsɛntɔ́ tɔn lɛ́ ɖɔ yě ní nɔ wa? (Lɛ̌ kpɔ́n fɔtóo ɔ.)

ÉNYÍ mǐ ɖó hudó gbɔdónúmɛ kpó wěɖexámɛ kpó tɔn ɔ, mɛ̌ gɔ́n mǐ ka sixú yi? Mǐ tuun xósin nǔkanbyɔ́ énɛ́ tɔn. Mǐ sixú xo ɖɛ sɛ́dó Jexóva Mawu. Nǔ e Jexóva ba ɖɔ mǐ ní nɔ wa é pɛ́ɛ́ nɛ́. É ba ɖɔ mǐ ní nɔ xo ɖɛ hwɛhwɛ, énɛ́ wɛ nyí ɖɔ mǐ ní nɔ “xo ɖɛ hwebǐnu.” (1 Tɛ. 5:17) Mǐ sixú vo bo xo ɖɛ sɛ́dó è, bo lɛ́ byɔ́ ɛ ɖɔ é ní xlɛ́ ali mǐ ɖo akpáxwé gbɛzán mǐtɔn tɔn lɛ́ bǐ mɛ. (Nǔx. 3:5, 6) Ðó Jexóva nɔ hun alɔ dó ná nǔ mɛ tawun wútu ɔ, é ɖɔ ɖɔ mǐ sixú xo ɖɛ sɛ́dó émí azɔn gěgé, lěe é jló mǐ gbɔn é.

2. Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

² Ali e Jexóva hun nú mǐ bɔ mǐ nɔ xo ɖɛ sɛ́dó è é nɔ su nukún mǐtɔn mɛ tawun. É ɖo mɔ̌ có, ɖó nǔ gěgé wɛ mǐ ɖó bo ná wa wútu ɔ, é sixú vɛ́ wǔ nú mǐ bɔ mǐ ná mɔ hwenu bo xo ɖɛ. Mǐ sixú lɛ́ mɔ ɖɔ é byɔ́ ɖɔ mǐ ní bló bónú ɖɛ mǐtɔn lɛ́ ní kpɔ́n te d’é jí. É su nukún mǐtɔn mɛ ɖɔ mǐ sixú mɔ nǔ e dó wǔsyɛ́n lanmɛ nú mɛ lɛ́ é kpó wěɖexámɛ kpó gěgé ɖo Biblu mɛ. Jezu nɔ ba hwenu bo nɔ xo ɖɛ; ɖo xóta élɔ́ mɛ ɔ, mǐ ná ɖɔ xó dó nǔ e kpɔ́ndéwú tɔn sixú kplɔ́n mǐ é jí. Mǐ ná lɛ́ ɖɔ xó dó nǔ tají ɖěɖěe mǐ sixú bló bɔ ɖɛ mǐtɔn lɛ́ ná lɛ́ kpɔ́n te d’é jí é atɔ́ɔ́n wú.

JEZU NƆ ÐE HWENU ÐÓ VO BÁ DÓ XO ÐƐ

3. Étɛ́ Jezu ka tuun dó ɖɛ mǐtɔn lɛ́ wú?

³ Jezu tuun ɖɔ ɖɛ mǐtɔn lɛ́ nɔ xɔ akwɛ́ nú Jexóva. Cóbónú é ná wá ayǐkúngban jí ɔ, é mɔ bɔ Tɔ́ tɔn ná xósin nú ɖɛ e súnnu kpó nyɔ̌nu kpó gbejínɔtɔ́ lɛ́ xo sɛ́dó Tɔ́ tɔn lɛ́ é. Ði kpɔ́ndéwú ɔ, Jezu ɖo Tɔ́ tɔn kpá hwenu e É ná xósin nú ɖɛ vívɛ́ e Ana, Davídi, Elíi kpó gbejínɔtɔ́ gěgé ɖěvo lɛ́ kpó xo sɛ́dó è lɛ́ é é. (1 Sam. 1:10, 11, 20; 1 Axɔ́. 19:4-6; Ðɛh. 32:5) Énɛ́ wú wɛ Jezu ɖɔ nú ahwanvú tɔn lɛ́ ɖɔ yě ní nɔ xo ɖɛ hwɛhwɛ kpó jiɖiɖe kpó!—Mat. 7:7-11.

4. Étɛ́ ɖɛ e Jezu xo lɛ́ é ka kplɔ́n mǐ?

⁴ Gbɔn ɖɛ e Jezu ɖésúnɔ xo sɛ́dó Jexóva lɛ́ é gblamɛ ɔ, é sɔ́ kpɔ́ndéwú ɖé ɖ’ayǐ nú ahwanvú tɔn lɛ́ bɔ yě ná xwedó. Jezu nɔ xo ɖɛ hwɛhwɛ ɖo sinsɛnzɔ́ tɔn hwenu. É ɖó ná ba hwenu dó xo ɖɛ, ɖó hwɛhwɛ ɔ, alɔnu tɔn nɔ ján tawun, bɔ mɛ gěgé nɔ lɛ́vɔ́ lɛ́ lɛ̌ dó è. (Mak. 6:31, 45, 46) É nɔ fɔ́n zǎn, mɔ̌ mɛ ɔ, é sixú mɔ hwenu bá dó xo ɖɛ éɖokpónɔ. (Mak. 1:35) É hwe bǐ ɔ, ɖo ninɔmɛ ɖokpó mɛ ɔ, é xo ɖɛ nú zǎn ɖokpó blěbú cóbó wá gbeta tají ɖé kɔn. (Luk. 6:12, 13) Gɔ́ ná ɔ, ɖo zǎn e jɛ nukɔn nú kú Jezu tɔn é mɛ ɔ, é xo ɖɛ azɔn mɔ̌kpán bo sɔ́ ayi tɔn bǐ ɖó lěe é ná fó azɔ̌ e wú é wá ayǐkúngban jí é sín akpáxwé e vɛ́ wǔ hú gǎn bǐ é gbɔn é jí.—Mat. 26:39, 42, 44.

5. Nɛ̌ mǐ ka sixú xwedó kpɔ́ndéwú Jezu tɔn hwenu e mǐ ɖo ɖɛ xo wɛ é gbɔn?

⁵ Kpɔ́ndéwú Jezu tɔn kplɔ́n mǐ ɖɔ alɔnu mǐtɔn ná bo tlɛ nɔ ján gbɔn ɖěbǔ ɔ, mǐ ɖó ná nɔ ba hwenu dó xo ɖɛ. Jezu ɖɔhun ɔ, é sixú nɔ byɔ́ ɖɔ mǐ ní nɔ ɖe hwenu ɖó vo dó xo ɖɛ; mǐ sixú nɔ fɔ́n zǎn bo nɔ xo ɖɛ, alǒ nɔ wa mɔ̌ ɖo gbadanu bǐ. Ényí mǐ nɔ wa mɔ̌ hǔn, xlɛ́xlɛ́ Jexóva wɛ mǐ ɖe ɖɔ nǔníná bǔnɔ énɛ́ xɔ akwɛ́ ɖo nukún mǐtɔn mɛ nɛ́. Nɔví nyɔ̌nu e nɔ nyí Lynne é flín lěe é su nukún tɔn mɛ sɔ hwenu e é se wǔ e è jɔ mɛ bɔ è ná nɔ xo ɖɛ é sín xó azɔn nukɔntɔn ɔ é. É ɖɔ: “Hwenu e un kplɔ́n ɖɔ un sixú ɖɔ xó nú Jexóva hweɖébǔnu é ɔ, énɛ́ d’alɔ mì, bɔ un nɔ mɔ ɛ dó mɔ Xɔ́ntɔn vívɛ́ ce, bo jló ná bló bɔ ɖɛ ce lɛ́ ná kpɔ́n te d’é jí.” É ɖo wɛn ɖɔ, nǔ nɔ cí mɔ̌ nú mǐ mɛ gěgé. Énɛ́ wú ɔ, mi nú mǐ ní gbéjé nǔ tají e jí mǐ sixú ɖɔ xó dó ɖo ɖɛ mǐtɔn lɛ́ mɛ lɛ́ é atɔ́ɔ́n kpɔ́n.

NǓ TAJÍ E JÍ MǏ SIXÚ ÐƆ XÓ DÓ ÐO ÐƐ MǏTƆN LƐ́ MƐ LƐ́ É ATƆ́Ɔ́N

6. Sɔgbe xá Nǔɖexlɛ́mɛ 4:10, 11 ɔ, étɛ́ lɛ́ Jexóva ka jɛxá?

⁶ Nɔ kpa susu nú Jexóva. Ðo nǔmimɔ jí wǔ ɖé mɛ ɔ, mɛsɛ́dó Jaan mɔ mɛxó 24 lɛ́ ɖo jǐxwé, bɔ yě ɖo Jexóva sɛn wɛ. Yě kpa susu nú Mawu, bo ɖɔ ɖɔ “susu, yɛ̌yi kpó hlɔ̌nhlɔ́n kpó” jɛxá ɛ. (Xa Nǔɖexlɛ́mɛ 4:10, 11.) Wɛnsagun gbejínɔtɔ́ lɛ́ lɔ ɖó hwɛjijɔ e wú yě ná kpa susu nú Jexóva, bo lɛ́ wlí yɛ̌yi n’i é maxamaxa. Yě ɖo jǐxwé xá ɛ, bo kplɔ́n lobo tuun i ganjí. Yě nɔ mɔ jijɔ tɔn lɛ́ ɖo nǔ ɖěɖěe é bló lɛ́ é mɛ. Ényí yě ɖo lěe Jexóva nɔ wa nǔ gbɔn é kpɔ́n wɛ ɔ, énɛ́ nɔ sísɛ́ yě bɔ yě nɔ kpa susu n’i.—Jɔb. 38:4-7.

7. Ðɔ nǔ e wú mǐ sixú kpa susu nú Jexóva é ɖé lɛ́.

⁷ Mǐ lɔmɔ̌ nɔ ba ná kpa susu nú Jexóva ɖo ɖɛ mǐtɔn lɛ́ mɛ, gbɔn nǔ e mǐ yí wǎn ná ɖo gɔ̌n tɔn lɛ́ é kpó nǔ e wú mǐ nɔ ɖó sísí n’i é kpó ɖiɖɔ n’i gblamɛ. Ényí a ɖo Biblu xa wɛ, bo lɛ́ ɖo kplɔ́nkplɔ́n wɛ hǔn, tɛ́n kpɔ́n bo nɔ ɖ’ayi jijɔ Jexóva tɔn ɖěɖěe dɔn we hú gǎn lɛ́ é wú. (Jɔb. 37:23; Hlɔ̌. 11:33) Énɛ́ gúdo hǔn, nɔ ɖɔ lěe nǔ cí nú we dó jijɔ énɛ́ lɛ́ wú é nú Jexóva. Mǐ sixú lɛ́ kpa susu nú Jexóva, ɖó é nɔ d’alɔ mǐ, bo nɔ lɛ́ d’alɔ xwédo gbigbɔ tɔn mǐtɔn blěbú. É nɔ ɖo nukún kpé dó mǐ wú wɛ, bo nɔ lɛ́ ɖo xɛ nya ɖo mǐ jí wɛ hwebǐnu.—1 Sam. 1:27; 2:1, 2.

8. Ðɔ hwɛjijɔ e wú mǐ nɔ dó kú nú Jexóva é ɖé lɛ́. (1 Tɛsaloníkinu lɛ́ 5:18)

⁸ Nɔ dó kú nú Jexóva. Mǐ ɖó hwɛjijɔ e wú mǐ ná nɔ dó kú nú Jexóva ɖo ɖɛ mɛ é gěgé. (Xa 1 Tɛsaloníkinu lɛ́ 5:18.) Mǐ sixú nɔ dó kú n’i ɖó nǔ ɖagbe e mǐ ɖó lɛ́ é bǐ wú, ɖó gɔ̌n tɔn wɛ nǔníná ɖaaɖagbe bǐ nɔ gosín. (Ja. 1:17) Ði kpɔ́ndéwú ɔ, mǐ sixú nɔ ɖɔ lěe ɖɛkpɛ ayǐkúngban ɔ tɔn kpó nǔɖíɖó jí wǔ tɔn lɛ́ kpó su nukún mǐtɔn mɛ sɔ é n’i. Mǐ sixú nɔ lɛ́ ɖɔ n’i ɖɔ gbɛ mǐtɔn, xwédo mǐtɔn, xɔ́ntɔn mǐtɔn lɛ́ kpó nukúnɖíɖó mǐtɔn kpó su nukún mǐtɔn mɛ. Gɔ́ ná ɔ, mǐ nɔ ba ná dó kú nú Jexóva ɖó ali e é hun nú mǐ bɔ mǐ zun xɔ́ntɔn vívɛ́ xá ɛ é wú.

9. Étɛ́wú é ka sixú byɔ́ ɖɔ mǐ ní nɔ dó gǎn bo nɔ ɖe xlɛ́ Jexóva ɖɔ nǔ e é nɔ wa nú mǐ lɛ́ é nɔ su nukún mǐtɔn mɛ?

⁹ É sixú byɔ́ ɖɔ mǐ ní dó gǎn bǔnɔ ɖé, cóbá lin tamɛ dó hwɛjijɔ ɖěɖěe wú mǐɖésúnɔ ná nɔ dó kú nú Jexóva lɛ́ é wú. Ðo égbé ɔ, mɛ gěgé sɔ́ nɔ tuun nǔ e è wa nú yě é nú mɛ ǎ. Hwɛhwɛ ɔ, mɛ lɛ́ nɔ sɔ́ ayi ɖó nǔ e ba wɛ yě ɖe é jí, é nɔ nyí ɖó nǔ e yě sixú wa dó xlɛ́ ɖɔ nǔ e yě ɖó é su nukún yětɔn mɛ é jí ǎ. Ényí mǐ jɛ nǔ wa gbɔn mɔ̌ jí ɔ, mǐ sixú kpo nú nǔbyɔ́byɔ́ kɛ́ɖɛ́ ɖo ɖɛ mǐtɔn lɛ́ mɛ. Nú nǔ mɔ̌hun ma ná jɛ ǎ ɔ, é ná byɔ́ ɖɔ mǐ ní kpo ɖo nǔ sɔ́ nú ayi mǐtɔn wɛ, bónú nǔ e Jexóva nɔ wa nú mǐ lɛ́ é bǐ ná nɔ su nukún mǐtɔn mɛ, bɔ mǐ ná nɔ lɛ́ ɖe xlɛ́.—Luk. 6:45.

10. Nɛ̌ nǔsumɛnukúnmɛ ɖiɖexlɛ́ ka d’alɔ nɔví nyɔ̌nu ɖokpó, bɔ é dɛ gbɔn? (Lɛ̌ kpɔ́n fɔtóo ɔ.)

¹⁰ Ényí nǔ nɔ su nukún mǐtɔn mɛ ɔ, énɛ́ sixú d’alɔ mǐ bɔ mǐ ná nɔ dɛ ɖo wǔvɛ́ lɛ́ hwenu. Mǐ ní ɖɔ xó dó kpɔ́ndéwú Kyung-sook tɔn jí; tan tɔn ɖo Atɔxwɛ (Gungbe) 15 janvier 2015 mɛ. È mɔ kansɛ́ɛ fíjó tɔn e ko yi nukɔn tawun é n’i. É ɖɔ: “Azɔn énɛ́ zɔ́n bɔ awakanmɛ kú mì tawun. É cí nú mì ɖɔ un kún sɔ́ ɖó nǔ ɖěbǔ ó ɖɔhun, bɔ xɛsi nɔ ɖi mì tawun.” Étɛ́ ka d’alɔ ɛ bɔ é dɛ? É ɖɔ ɖɔ ɖo zǎn ɖokpó ɖokpó mɛ, cóbónú émí ná yi mlɔ́ ayǐ ɔ, émí nɔ xá xɔ émítɔn ta bo nɔ xo ɖɛ dó jǐ, dó nǔ e su nukún émítɔn mɛ ɖo azǎn énɛ́ jí lɛ́ é atɔ́ɔ́n takúnmɛ. Mɔ̌ e é nɔ wa é nɔ vɔ́ gǎnjɛwú ná ɛ, bo nɔ sísɛ́ ɛ, bɔ é nɔ ɖe xlɛ́ Jexóva ɖɔ émí yí wǎn n’i. É mɔ lěe Jexóva nɔ d’alɔ mɛsɛntɔ́ tɔn gbejínɔtɔ́ lɛ́ ɖo hwenu vɛ́ wǔ lɛ́ mɛ gbɔn é, bo wá mɔ nǔ jɛ wú ɖɔ nyɔ̌ná e mǐ nɔ mɔ ɖo gbɛzán mǐtɔn mɛ lɛ́ é nɔ hú gǎn wǔvɛ́ e mǐ nɔ mɔ lɛ́ é flaflá tɔn. Kyung-sook ɖɔhun ɔ, mǐ ɖó hwɛjijɔ e wú mǐ ná nɔ dó kú nú Jexóva lɛ́ é gěgé, ényí wǔvɛ́ lɛ́ ná bo tlɛ ɖi bú mǐ ɔ nɛ́. Ðiɖɔ nú Jexóva ɖo ɖɛ mǐtɔn lɛ́ mɛ ɖɔ nǔ e é nɔ wa nú mǐ lɛ́ é nɔ su nukún mǐtɔn mɛ sixú d’alɔ mǐ bɔ mǐ ná nɔ dɛ, bo ná nɔ lɛ́ kpo ɖo awǎjijɛ ɖó wɛ.

11. Ée Jezu lɛ́ kɔ yi jǐxwé gúdo é ɔ, aniwú ahwanvú tɔn lɛ́ ka ɖó hudó akɔ́nkpinkpan tɔn?

¹¹ Nɔ byɔ́ Jexóva ɖɔ é ní d’alɔ we nú a ná nɔ kpankɔ́n ɖo sinsɛnzɔ́ ɔ mɛ. Táan kpɛɖé jɛ nukɔn nú hwenu e Jezu ná yi jǐxwé é ɔ, é flín ahwanvú tɔn lɛ́ azɔ̌ e yě ɖó bo ná nyí kúnnuɖetɔ́ tɔn “ɖo Jeluzalɛ́mu, Judée kpó Samalíi kpó, káká yi fí e lín hú gǎn ɖo ayǐkúngban jí é” é. (Mɛ. 1:8; Luk. 24:46-48) Hwenu kpɛɖé gúdo ɔ, sinsɛngán Jwifu lɛ́ wlí mɛsɛ́dó Piyɛ́ɛ kpó Jaan kpó, bo dɔn yě yi Hwɛɖɔxɔsá ɖaxó Jwifu lɛ́ tɔn, lobo byɔ́ súnnu gbejínɔtɔ́ énɛ́ lɛ́ ɖɔ yě ní ɖó mawuxóɖiɖɔ te, bo tlɛ gblɔ́n adǎn nú yě. (Mɛ. 4:18, 21) Nɛ̌ Piyɛ́ɛ kpó Jaan kpó ka wa nǔ gbɔn?

12. Sɔgbe xá Mɛsɛ́dó 4:29, 31 ɔ, étɛ́ ahwanvú lɛ́ ka wa?

¹² Xósin e Piyɛ́ɛ kpó Jaan kpó ná sinsɛngán Jwifu lɛ́ nú adǎn e yě gblɔ́n nú yě é ɖíe: “Ényí é sɔgbe ɖo Mawu nukúnmɛ ɖɔ è ní se tónú nú mi bo gɔn tónú se nú Mawu hǔn, miɖésúnɔ ní yi da kpɔ́n. Amɔ̌, mǐdɛɛ lɛ́ ɔ, mǐ sixú gɔn xó ɖɔ dó nǔ e mǐ mɔ bo se lɛ́ é wú ǎ.” (Mɛ. 4:19, 20) Ée è ɖe Piyɛ́ɛ kpó Jaan kpó nyi te gúdo é ɔ, ahwanvú lɛ́ xo ɖɛ sɛ́dó Jexóva ɖɔ é ní d’alɔ émí bónú émí ní wa jlǒ tɔn. Yě xo ɖɛ ɖɔ: “D’alɔ mǐ mɛ mɛsɛntɔ́ towe lɛ́ bónú mǐ ná kpo ɖo xó towe ɖɔ wɛ kpó adɔgbígbó kpó.” Jexóva ná xósin nú ɖɛ énɛ́ e yě xo kpó ayi bǐ kpó é.—Xa Mɛsɛ́dó 4:29, 31.

13. Étɛ́ kpɔ́ndéwú Jin-hyuk tɔn ka sixú kplɔ́n mǐ?

¹³ Ényí acɛkpikpa e ɖo to nu lɛ́ é ɖe gbe ɖɔ mǐ ní ɖó mawuxóɖiɖɔ te ɔ, mǐ sixú kpo ɖo wɛn ɖagbe ɔ jlá wɛ, dó xlɛ́ ɖɔ mǐ ɖo nǔ wa wɛ ahwanvú lɛ́ ɖɔhun. Mǐ ní ɖɔ xó dó kpɔ́ndéwú nɔví súnnu Jin-hyuk tɔn jí; è wlí i dó gan mɛ ɖó é gbɛ́ ɖɔ émí kún ná byɔ́ ahwan mɛ ó wútu. Ðo gankpá ɔ mɛ ɔ, è byɔ́ ɛ ɖɔ é ní nɔ kpé nukún dó mɛ ɖěɖěe ɖo gankpá mɛɖokpónɔ tɔn mɛ lɛ́ é wú, amɔ̌, nǔ ɖěɖěe hudó yě lɛ́ é kɛ́ɖɛ́ wú wɛ è ná ɛ gbe bónú é ní nɔ ɖɔ xó nú yě dó. È ná ɛ gbe ɖɔ é ní nɔ ɖɔ xó nú yě dó Biblu wú ǎ. É xo ɖɛ bo byɔ́ akɔ́nkpinkpan kpó ayiɖote kpó bá dó ɖɔ xó nú yě dó nǔgbó ɔ wú hweɖébǔnu e ali tɔn ná nɔ hun n’i é. (Mɛ. 5:29) É ɖɔ: “Jexóva se ɖɛ ce, bo ná mì akɔ́nkpinkpan kpó nǔnywɛ́ kpó bɔ un jɛ Biblu kplɔ́n xá yě mɛ gěgé jí; mǐ nɔ kplɔ́n nǔ nú cɛ́jú atɔ́ɔ́n ɖo gankpá yětɔn lɛ́ sín hɔn nukɔn. Énɛ́ gúdo ɔ, gbadanu ɔ, un nɔ wlán wěma ɖěɖěe ayǐ hɔ́n ɔ, un ná sɔ́ nú gantɔ́ gbɛ̌ ce lɛ́ é.” Mǐ lɔ sixú kú d’é jí ɖɔ Jexóva ná d’alɔ mǐ, bɔ mǐ ná wa sinsɛnzɔ́ mǐtɔn. Jin-hyuk ɖɔhun ɔ, mǐ sixú xo ɖɛ, bo byɔ́ akɔ́nkpinkpan kpó nǔnywɛ́ kpó.

14. Ényí mǐ ɖo wǔvɛ́ lɛ́ ɖí xwi xá wɛ ɔ, étɛ́ ka sixú d’alɔ mǐ? (Ðɛhan 37:3, 5)

¹⁴ Nɔ byɔ́ Jexóva ɖɔ é ní d’alɔ we bónú a ná ɖí xwi xá tagba lɛ́. Mǐ mɛ gěgé wɛ ɖo wǔvɛ́ se wɛ ɖo agbaza, alǒ lěe nǔ nɔ cí nú mɛ é linu; nǔ élɔ́ lɛ́ ɖo nǔ e nɔ zɔ́n nǔ mɔ̌hun lɛ́ é mɛ: Kú mɛvívɛ́ ɖé tɔn, tagba xwédo tɔn, yadónúmɛ, alǒ tagba ɖěvo lɛ́. Gɔ́ ná ɔ, jɛmɛjí kpó ahwan kpó zɔ́n bɔ wǔvɛ́ mɔ̌hun lɛ́ gěgé nu didɛ ɖe lɛ́ vɛ́ wǔ d’é jí. Nɔ ɖɔ lěe nǔ cí nú we é nyi wɛn nú Jexóva. Nɔ ɖɔ ninɔmɛ towe n’i lěe a ná ɖɔ nú xɔ́ntɔn vívɛ́ ɖé gbɔn é. Ðeji ɖɔ Jexóva “ná wa azɔ̌ tɔn.”—Xa Ðɛhan 37:3, 5.

15. Ðɔ lěe ɖɛxixo sixú d’alɔ mǐ, bɔ mǐ ná “nɔ dɛ ɖo wǔvɛ́ lɛ́ nu” gbɔn é. Nǎ kpɔ́ndéwú ɖokpó.

¹⁵ Ényí mǐ nɔ ɖó kan dó ɖɛxixo wú ɔ, é ná d’alɔ mǐ bɔ mǐ ná “dɛ ɖo wǔvɛ́ lɛ́ nu.” (Hlɔ̌. 12:12) Jexóva tuun wǔvɛ́ e nu dɛ ɖe wɛ mɛsɛntɔ́ tɔn lɛ́ ɖe lɛ́ é; “yě sú xó ɔ, é nɔ se.” (Ðɛh. 145:18, 19) Nɔví nyɔ̌nu gběxosín-alijítɔ́ e nɔ nyí Kristie, bo ɖó xwe 29 é mɔ ɖɔ nǔgbó wɛ nyí xó énɛ́ lɛ́. É jɛ azɔn syɛ́nsyɛ́n ɖé lɛ́ maɖónukún tɔn. Wǎgbɔ tɔn ɔ, é jɛ linkpɔ́nzɔn syɛ́nsyɛ́n ɖé jɛ jí. Nukɔnmɛ ɔ, é se ɖɔ è mɔ azɔn ɖé nú nɔ émítɔn, bɔ énɛ́ ná zɔ́n bɔ é ná kú. Kristie ɖɔ: “Un nɔ xo ɖɛ sɛ́dó Jexóva dó nǔjɔnǔ mɛ, bo nɔ byɔ́ ɛ ɖɔ é ní ná mì hlɔ̌nhlɔ́n e sín hudó un ɖó ɖo azǎn ɖokpó ɖokpó jí é. Un tɛ́n kpɔ́n bo tɛ́ dó nǔ gbigbɔ tɔn lɛ́ wú; énɛ́ wɛ nyí ɖɔ un nɔ yi kplé lɛ́ bo nɔ lɛ́ kplɔ́n nǔ nyiɖésúnɔ.” É ɖɔ gɔ́ ná ɖɔ: “Ðɛxixo d’alɔ mì bɔ un dɛ ɖo hwenu vɛ́ wǔ lɛ́ mɛ. Un tuun ɖɔ Jexóva ɖo kpɔ́ xá mì hwebǐnu, bɔ énɛ́ tuuntuun nyí jɔtɛn gbɔdónúmɛ tɔn ɖé nú mì. Azɔn ce lɛ́ gbɔ afɔjíafɔjí ǎ có, Jexóva se ɖɛ ce lɛ́, bo ná mì fífá ayi mɛ tɔn, lobo xo hwihwɛ́ ayi ce.” Mi nú mǐ ní nɔ flín hwebǐnu ɖɔ “Jexóva tuun lěe é nɔ hwlɛ́n mɛ e nɔ nɔ gbejí n’i lɛ́ é sín mɛtɛ́nkpɔ́n mɛ gbɔn é.”—2 Pi. 2:9.

16. Aniwú mǐ ka ɖó hudó alɔdó Jexóva tɔn tɔn cóbá gbí dɔn ɖo mɛtɛ́nkpɔ́n lɛ́ nukɔn?

¹⁶ Nɔ byɔ́ Jexóva ɖɔ é ní d’alɔ we bónú a ná gbí dɔn ɖo mɛtɛ́nkpɔ́n nukɔn. Ðó mǐ nyí hwɛhutɔ́ wútu ɔ, é nɔ byɔ́ ɖɔ mǐ ní nɔ ɖo za li xá jlǒ nǔnyanyawiwa tɔn wɛ hwebǐnu. Satáan nɔ ɖo nǔ e wú é kpé é bǐ wa wɛ bónú mɔ̌ wiwa ná vɛ́ wǔ nú mǐ tawun. Ali e nu é nɔ tɛ́n kpɔ́n bá wa nǔ dó linlin mǐtɔn lɛ́ wú ɖe é ɖokpó wɛ nyí ayiɖeɖayǐ blíblí lɛ́. Ayiɖeɖayǐ mɔ̌hun lɛ́ sixú bló bɔ linlin blíblí lɛ́ ná gɔ́ ayi mǐtɔn mɛ; linlin énɛ́ lɛ́ nɔ bló bɔ mǐ sixú húzú mɛ blíblí ɖo Jexóva nukúnmɛ, bo lɛ́ sísɛ́ mǐ bɔ mǐ ná hu hwɛ syɛ́nsyɛ́n lɛ́.—Mak. 7:21-23; Ja. 1:14, 15.

17. Ényí mǐ xo ɖɛ bo byɔ́ alɔdó gúdo ɔ, étɛ́ mǐ ka ɖó ná wa bá dó nyi alɔ nú mɛtɛ́nkpɔ́n? (Lɛ̌ kpɔ́n fɔtóo ɔ.)

¹⁷ Ényí mǐ ba ná ɖu ɖo jlǒ nǔnyanyawiwa tɔn e mǐ nɔ ɖó é jí ɔ, mǐ ɖó hudó alɔdó Jexóva tɔn tɔn. Nǔ élɔ́ lɔ ɖo nǔ ɖěɖěe Jezu byɔ́ ɖo ɖɛ kpɔ́ndéwú tɔn ɔ mɛ lɛ́ é mɛ: “Ma lɔn nú mǐ ní jɛ tɛ́nkpɔ́n mɛ ó, loɔ, hwlɛ̌n mǐ ɖo mɛ nyanya ɔ sí.” (Mat. 6:13) Jexóva nɔ ba ná d’alɔ mǐ, amɔ̌, mǐ ɖó ná tó byɔ́ alɔdó tɔn hwɛ̌. Mǐ ɖó ná nɔ lɛ́ wa nǔ sɔgbe xá ɖɛ mǐtɔn lɛ́. Mǐ sixú wa nǔ e wú mǐ kpé é bǐ, bo nyi alɔ nú nǔ ɖěɖěe nɔ sɔ́ linlin nyanya gbɛ Satáan tɔn tɔn ɖ’ajo lɛ́ é xixa alǒ ɖíɖótó. (Ðɛh. 97:10) Mǐ sixú bló bɔ linlin mímɛ́ lɛ́ ná nɔ gɔ́ ayi mǐtɔn mɛ, gbɔn Biblu xixa kpó Biblu kplɔ́nkplɔ́n kpó gblamɛ. Kplé lɛ́ yiyi kpó alɔ ɖíɖó ɖo sinsɛnzɔ́ ɔ mɛ kpó lɔ ná d’alɔ mǐ bɔ mǐ ná cyɔ́n alɔ linlin mǐtɔn jí. Gɔ́ ná ɔ, Jexóva d’akpá ɖɔ émí kún ná lɔn bónú tɛ́nkpɔ́n ɖé ná wá nú mǐ bo hú gǎn hlɔ̌nhlɔ́n e mǐ ɖó é ó.—1 Kɔ. 10:12, 13.

18. Nú nǔ e kan ɖɛxixo é ɔ, étɛ́ mǐ mɛ bǐ ka ɖó ná nɔ wa?

¹⁸ Mǐ mɛ bǐ wɛ ɖó hudó ɖɛxixo tɔn din hú ɖ’ayǐ tɔn, bá dó kpo ɖo gbejí nɔ nú Jexóva wɛ ɖo azǎn gǔdo gúdo tɔn élɔ́ lɛ́ e vɛ́ wǔ lɛ́ é mɛ. Nɔ ba hwenu ɖo azǎn ɖokpó ɖokpó jí, bo nɔ xo ɖɛ vívɛ́ sɛ́dó Jexóva. Jexóva ba ɖɔ mǐ ní nɔ ‘ɖɔ nǔ e ɖo ayi mǐtɔn mɛ lɛ́ é bǐ nú émí’ ɖo ɖɛ mɛ. (Ðɛh. 62:9) Nɔ kpa susu nú Jexóva, bo nɔ dó kú n’i ɖó nǔ e é nɔ wa lɛ́ é bǐ wú. Nɔ byɔ́ ɛ ɖɔ é ní nɔ d’alɔ we, bónú a ná nɔ kpankɔ́n ɖo sinsɛnzɔ́ ɔ mɛ. Nɔ sa vo n’i ɖɔ é ní d’alɔ we bónú a ná ɖí xwi xá tagba ɖěbǔ e a ná mɔ é, bo ná gbí dɔn ɖo mɛtɛ́nkpɔ́n ɖěbǔ e ná wá kpan nukɔn we é nukɔn. Ma lɔn nú nǔ ɖěbǔ alǒ mɛ ɖěbǔ glɔ́n ali nú we bónú a gɔn ɖɛ xo sɛ́dó Jexóva ɖo gbesisɔmɛ ó. Amɔ̌, nɛ̌ Jexóva ka nɔ ná xósin nú ɖɛ mǐtɔn lɛ́ gbɔn? Mǐ ná ɖɔ xó dó nǔkanbyɔ́ tají énɛ́ wú ɖo xóta e bɔ d’é wú é mɛ.