Amɛ Jeŋ Muu Fɛɛ Gbɛjianɔtoo kɛ Nitsumɔ Lɛ
AYƐ nɔkwɛmɔ hegbɛi pii ní akɛtsuɔ nii ní akɛkudɔɔ odaseyeli nitsumɔ lɛ yɛ shikpɔji ní fa fe 230 ní atsuɔ nii yɛ mli lɛ amli. Gbɛtsɔɔmɔ ní fe fɛɛ lɛ baa kɛjɛɔ Nɔyeli Kuu lɛ ŋɔɔ yɛ jeŋ muu fɛɛ nitsumɔhe yitso lɛ yɛ Brooklyn, New York. Nɔyeli Kuu lɛ tsuɔ najiaŋdamɔlɔi daa afi kɛyaa shikpɔji wuji srɔtoi anɔ yɛ je lɛŋ fɛɛ ni amɛkɛ nitsumɔhe nine najiaŋdamɔlɔi ní yɔɔ nakai shikpɔji wuji lɛ anɔ lɛ kpeɔ. Ayɛ Nitsumɔhe Nine Ajinafoi Akui ní mɛi aaashɛ etɛ kɛyashi kpawo yɔɔ mli yɛ nitsumɔhe niji lɛ amli, ni amɛkwɛɔ nitsumɔ lɛ nɔ yɛ shikpɔji ní akɛ amɛnɔkwɛmɔ ewo amɛshishi lɛ amli. Nitsumɔhe niji lɛ ekomɛi yɛ tsɔnei ní akɛkalaa woji, ekomɛi yɛ woji akalamɔ tsɔnei ní kalaa nii oyayaayai waa lɛ eko. Ajara maŋ loo shikpɔŋ ní nitsumɔhe nine fɛɛ nitsumɔhe nine kwɛɔ nɔ lɛ mli awo kpokpai wuji amli, ni ajara kpokpai wuji lɛ hu amli awo kpokpai bibii amli. Kpokpaa fɛɛ kpokpaa hiɛ aaafee asafoi 20 yɛ mli. Kpokpaa wulu nɔkwɛlɔ toɔ naa ni eyasaraa kpokpai ni yɔɔ ekpokpaa wulu lɛ mli lɛ fɛɛ kɛbɔleɔ. Afeɔ kpeei enyɔ daa afi kɛha kpokpaa fɛɛ kpokpaa. Agbɛnɛ hu, ayɛ kpokpaa nɔkwɛlɔ, ni eyasaraa asafo fɛɛ asafo ní yɔɔ ekpokpaa lɛ mli lɛ, bei pii lɛ, shii enyɔ yɛ afi mli, ni eyeɔ ebuaa Odasefoi lɛ ni amɛtoɔ shiɛmɔ nitsumɔ lɛ he gbɛjianɔ ni amɛtsuɔ yɛ shikpɔŋkuku ní akɛha asafo lɛ akɛ etsu nii yɛ mli lɛ mli.
Asafo ni yɔɔ maŋ lɛ mli kɛ e-Maŋtsɛyeli Asa lɛ ji hé tuuntu ní ajɛɔ ashiɛɔ sanekpakpa lɛ yɛ nyɛ akutso lɛ mli. Ajara hei ní yɔɔ asafo fɛɛ asafo shishi lɛ amli awo shikpɔŋkukuji bibii amli. Ajaraa enɛɛmɛi ahaa Odasefoi aŋkroaŋkroi, ni amɛbɔɔ mɔdɛŋ akɛ amɛaaya gbɔmɛi fɛɛ ní yɔɔ shiai lɛ amli lɛ aŋɔɔ ní amɛkɛ amɛ awie. Asafo fɛɛ asafo, ní Odasefoi aaashɛ mɛi fioo ko kɛyashi aaafee mɛi 200 yɔɔ mli lɛ, yɛ onukpai ní ahala amɛ koni amɛkwɛ nitsumɔi srɔtoi anɔ. Mɔ aŋkro ni ji sanekpakpa jajelɔ lɛ ji mɔ ni he hiaa waa yɛ Yehowa Odasefoi agbɛjianɔtoo lɛ mli. Odasefoi lɛ ateŋ mɔ fɛɛ mɔ diɛŋtsɛ tsuɔ maŋ shiɛmɔ nitsumɔ ni ji Nyɔŋmɔ Maŋtsɛyeli lɛ he sane ní egbaa mɛi krokomɛi lɛ he nii, ekɔɔɔ he eko akɛ eesɔmɔ yɛ jeŋ muu fɛɛ nitsumɔhe yitso lɛ, loo yɛ nitsumɔhe niji lɛ eko mli, loo yɛ asafoi lɛ amli.
Yɛ naagbee lɛ, nitsumɔ nɛɛ he akɔntaabuu yashɛɔ jeŋ muu fɛɛ nitsumɔhe yitso lɛ, ni abuaa Yearbook lɛ mli saji anaa ni akalaa daa afi. Agbɛnɛ hu akalaa tao awoɔ Buu-Mɔɔ ní jeɔ kpo yɛ January 1 lɛ mli daa afi. Nɛkɛ woji enyɔ nɛɛ kɛ afi fɛɛ afi mli nitsumɔi ní anyɛ atsu yɛ Yehowa kɛ e-Maŋtsɛyeli ni yɔɔ Kristo Yesu shishi lɛ he odaseyeli mli lɛ mlitsɔɔmɔ fitsofitso haa. Yɛ nyɛsɛɛ afii nɛɛ amli lɛ, Odasefoi kɛ mɛi ni yɔɔ wiemɔ lɛ he miishɛɛ aaashɛ 14,000,000 eba Yesu gbele lɛ Kaimɔ lɛ shishi daa afi. Yehowa Odasefoi kɛ ŋmɛlɛtswai ni fá fe 1,000,000,000 tsuɔ nii yɛ afi mli ni amɛkɛjajeɔ sanekpakpa lɛ, ni abaptisiɔ mɛi heei ní fá fe 300,000. Woji abɔ ní amɛkɛhaa lɛ falɛ shɛɔ ekomekomei akpekpei ohai abɔ.