Jeŋ Ekomefeemɔ—Ani Ebaaba Lɛɛlɛŋ Be Ko? — Buu-Mɔɔ INTANƐT NƆ WOJIATOOHE

Jeŋ Ekomefeemɔ—Ani Ebaaba Lɛɛlɛŋ Be Ko?

“KƐJI wɔɔye omanye yɛ yinɔi fioo ni baa lɛ amli koni wɔkɛtsake shihilɛ mli ni maji ni eye amɛhe ni wɔyɔɔ amɛ mli lɛ yɔɔ lɛ kɛya majimaji ateŋ akutso ni yeɔ anɔkwa ko mli lɛ, . . . no lɛ, wɔbaanyɛ wɔfo blema gbɛjianɔtoo ni ji tawuu lɛ hu sɛɛ kɛmɔ shi . . . Shi kɛlɛ, kɛ wɔyeee omanye lɛ, ekolɛ . . . hiŋmɛigbelemɔ ko ehiŋ shi.” Nakai asraafoi ayinɔsane ŋmalɔ, Gwynne Dyer kɛɔ yɛ ewolo ni ji War lɛ mli.

Dyer kɛɔ akɛ, yinɔsane he woji amli eyi obɔ kɛ saji ni kɔɔ maji kɛ kui krokomɛi ni yɔɔ hewalɛ ni yaa ta be fɛɛ be kɛtsuɔ amɛ naagbai ahe nii lɛ ahe. Ekomefeemɔ ni amɛbɛ lɛ ekpata gbɔmɛi akpekpei abɔ ni esaa amɛhe lɛ awala hiɛ. Bɔ ni maŋtsɛ Salomo tsɔɔ bɔ ni gbɔmɛi ni esaa amɛhe lɛ ashihilɛ yɔɔ ha yɛ egbii lɛ amli lɛ mli lɛ tamɔ bɔ ni eji ŋmɛnɛ lɛ nɔŋŋ. Eŋma akɛ: “Kɛkɛ ni misaa mina yiwalɛi fɛɛ ni awaa mɛi ayi yɛ hulu shishi nɛɛ: ni naa, mɛi ni awaa amɛ yi lɛ ayaafonui, ni amɛbɛ miishɛjelɔ ko, ni amɛyiwalɔi lɛ anineshi wa yɛ amɛnɔ, shi amɛbɛ miishɛjelɔ ko.”—Jajelɔ 4:1.

Yɛ gbii nɛɛ amli lɛ, taakɛ yinɔsane ŋmalɔ ni yɔɔ yiteŋgbɛ lɛ tsĩ tã lɛ, kɛfata mɔbɔnalɛ ni esa akɛ aná aha “mɛi ni awaa amɛ yi lɛ ayaafonui” lɛ ahe lɛ, yiŋtoo kroko hu yɛ hewɔ ni esa akɛ ataoɔ gbɛ ko ni aaatsɔ nɔ koni atsake shihilɛ mli ni maji ni eye amɛhe lɛ yɔɔ lɛ mli kɛya anɔkwa majimaji ateŋ akutso ko mli lɛ: Aleee kɛji hiŋmɛigbelemɔ baahi shi aloo ehiŋ shi! Ŋmɛnɛŋmɛnɛ ta ni awuɔ lɛ maa nɔ mi akɛ ebaakpata maŋ fɛɛ maŋ ni fɔɔ tawuu lɛ hiɛ ni eshiŋ maŋ ko kwraa akɛ kunimyelɔ.

Ani Jeŋ Ekomefeemɔ Ebɛŋkɛ?

Mɛɛ gbɛkpamɔi yɔɔ kɛha jeŋ ekomefeemɔ? Ani adesai ashihilɛ baanyɛ aye hewalɛi ni kɛ mligbalamɔ baa, ni woɔ shikpɔŋ lɛ yibaamɔ he gbeyei lɛ anɔ kunim? Gbɔmɛi komɛi susuɔ nakai. John Keegan, ni ŋmalaa hefamɔ kɛ asraafoi ahe saji ewoɔ Britania Daily Telegraph lɛ mli lɛ ŋma akɛ: “Yɛ sakasakafeemɔ kɛ ŋwanejee ni yɔɔ lɛ fɛɛ sɛɛ lɛ, etamɔ nɔ ni aana bɔ ni jeŋ ko ni ta bɛ mli lɛ baa mli fiofio lɛ henɔ okadi.”

Mɛni ha esusu akɛ ebaahi lɛ? Mɛni hewɔ yɛ adesa yinɔsane be kakadaŋŋ ni ákɛwuu ta, kɛ bɔ ni etamɔ nɔ ni gbɔmɔ bɛ nyɛmɔ ni ekɛaaye lɛ diɛŋtsɛ ehe nɔ yɛ omanyeyeli mli lɛ fɛɛ sɛɛ lɛ, etamɔ nɔ ni gbɔmɛi pii yɛ hiɛnɔkamɔ lolo lɛ? (Yeremia 10:23) Mɛi komɛi wie yɛ be ko mli akɛ, ‘Adesai miiya amɛhiɛ. Yinɔsane tsɔɔ gbɛ ko ni tsɔɔ hiɛyaa ni tsara nɔ.’ Ŋmɛnɛ po, gbɔmɛi babaoo heɔ amɛyeɔ akɛ, yɛ gbɛ ko nɔ lɛ, gbɔmɔ ekpakpafeemɔ su baaye efɔŋfeemɔ nɔ kunim. Ani hiɛnɔkamɔ ni baanyɛ aba mli lɛɛlɛŋ ji enɛ? Aloo eji lakamɔ ko kɛkɛ ni kɛ nijiaŋwujee babaoo moŋ baaba? Yinɔsane ŋmalɔ J. M. Roberts ŋma yɛ anɔkwale mli yɛ ewolo ni ji, Shorter History of the World lɛ mli akɛ: “Anyɛŋ atsɔɔ akɛ je lɛ wɔsɛɛ be yɛ shweshweeshwe. Asaŋ anako adesai apiŋmɔi ni yɔɔ bianɛ lɛ anaagbee he nɔ ko, loo nɔ ko ni aaadamɔ nɔ koni ahe aye akɛ ebaanyɛ eba mli.”

Ani yiŋtoi kpakpai yɛ ni baaha ahe aye akɛ gbɔmɛi kɛ maji baaye amɛhe ni amɛheee amɛyeee, kɛ nibii ni kɛ mligbalamɔ baa lɛ ahe naagbai lɛ anɔ kunim? Aloo ani eebi nɔ ko ni fe adesai amɔdɛŋbɔi kwraa? Sane ni nyiɛ sɛɛ lɛ baasusu sanebimɔi nɛɛ ahe.

[He ni Mfoniri ni yɔɔ baafa 2 lɛ Jɛ]