Teokrase Sɔɔmɔ Skul Lɛ Kɛ Sɛɛnamɔi Baa
1 Kɛjɛ 1943 kɛbaa nɛɛ, Teokrase Sɔɔmɔ Skul lɛ efee jɔɔmɔi diɛŋtsɛ kɛha mɛi ni tsuɔ emli gbɛjianɔtoo kpakpai lɛ ahe nii lɛ. Hɛɛ, Teokrase Sɔɔmɔ Skul lɛ yaa nɔ etsuɔ eyiŋtoi titrii enyɔ lɛ ahe nii jogbaŋŋ: (1) ni eha wɔmɔdɛŋbɔɔ ni wɔkɛwieɔ Biblia mli anɔkwalei ahe lɛ aya hiɛ, kɛ (2) ni eha wɔle Nyɔŋmɔ Wiemɔ lɛ, etsɔɔmɔi lɛ, kɛ tɛi ni efolɔ eshwie shi lɛ jogbaŋŋ. Mɛi babaoo ejie hiɛsɔɔ ni mli kwɔ kpo yɛ sɛɛnamɔi ni amɛnine eshɛ nɔ kɛjɛ tsɔsemɔ ni akãa he akɛhaa kɛtsɔɔ Teokrase Sɔɔmɔ Skul lɛ nɔ lɛ he. Eye ebua nyɛmimɛi hii kɛ nyɛmimɛi yei fɛɛ ni ‘amɛja anɔkwale wiemɔ lɛ mli pɛpɛɛpɛ.’—2 Tim. 2:15.
Wɔhiɛ Ni Wɔɔya
2 Mɛi heei ni kpaako amɛŋmala amɛgbɛi kɛ mɛi ni amɛhi skul lɛ mli afii babaoo lɛ fɛɛ baanyɛ ana sɛɛnamɔ ni da fe fɛɛ kɛtsɔ amɛhe ni amɛbaasaa jogbaŋŋ kɛha emli nifeemɔi lɛ nɔ. Akpa shi ni ana akɛ mɛi komɛi kaneɔ amɛwiemɔi lɛ. Kɛji mɔ ko baanyɛ afee mɔ ni yeɔ odase ni mɔɔ shi lɛ ebiɔ ni mɔ lɛ anyɛ akane nii jogbaŋŋ ni enyɛ ewie kɛ shishinumɔ ni mli ka shi faŋŋ hu.
3 Reasoning wolo lɛ ji jwetri ko ni nɔ bɛ yɛ wɔnitsumɔ lɛ mli, ni Teokrase Sɔɔmɔ Skul lɛ ji kpee ni hi waa kɛmɔ shi ni wɔtsɔɔ nɔ wɔleɔ emli saji lɛ jogbaŋŋ. Kɛ wɔle nɛkɛ wolo nɛɛ mli saji lɛ jogbaŋŋ lɛ, ebaaye ebua wɔ ni wɔnyɛ wɔwie yɛ wɔdiɛŋtsɛ wɔwiemɔi amli ni wɔfee mɛi ni nyɛɔ amɛgbaa sane waa. Yɛ 1989 mli lɛ, wɔbaaya nɔ wɔna Reasoning wolo lɛ he susumɔ daa lɛ he sɛɛ kɛtsɔ skul wiemɔi ni baadamɔ emli saji anɔ lɛ nɔ.
Gbɛtsɔɔmɔi Kɛha 1989
4 Yɛ afi ni wɔyɔɔ mli nɛɛ mli lɛ, Skul Nifeemɔ ni ji 1 lɛ baadamɔ “All Scripture Is Inspired of God and Beneficial” lɛ nɔ. Eyɛ mli ákɛ akɛ minitii 15 baatsu enɛ he nii moŋ, shi afee tsakemɔ bibioo ko. Akɛ minitii kɛjɛ 10 kɛyashi 12 baaha wiemɔ lɛ, ni akɛ minitii 3 kɛyashi 5 baabi saji ni abaaha hetoo.
5 Biblia kanemɔ kɛha otsi lɛ mli otii ni atiɔ mli lɛ baaka he efee Teokrase Sɔɔmɔ Skul lɛ fai ni he hiaa waa lɛ ateŋ ekome. Nyɛmimɛi hii ni tsuɔ nɛkɛ fa nɛɛ he nii lɛ aye abua nyɛmimɛi lɛ ni amɛna nɔ hewɔ kɛ gbɛ nɔ ni emli saji lɛ he hiaa waa kɛha wɔ lɛ. Kɛ akɛ Ŋmalɛi ni ato naa (Scripture Index) ni yɔɔ Watch Tower Publications Index lɛ mli lɛ tsu nii lɛ, ebaanyɛ eye ebua. Kɛfata he lɛ, saji titrii ni damɔ Hebri Ŋmalɛi lɛ amli woji lɛ anɔ lɛ baaya nɔ aje kpo yɛ Buu-Mɔɔ lɛ mli, ni enɛɛmɛi kɛ saji ni yɔɔ sɛɛ lɛ shishinumɔ kɛ ŋaawoo ni abaanyɛ atsu he nii lɛ baaha. Kɛ atsuuu daa otsi Biblia kanemɔ lɛ mli otii lɛ amlitii lɛ he nii jogbaŋŋ lɛ, skul nɔkwɛlɔ lɛ kɛ ŋaawoo baaha yɛ teemɔ mli.
Niŋmaa Kaai
6 Kɛjɛ 1989 shishijee mli lɛ, abaafee tsakemɔ ko yɛ gbɛ ni atsɔɔ nɔ atsuɔ niŋmaa kaai ahe nii lɛ mli. Abaafee kaai lɛ shii etɛ yɛ afi lɛ mli—yɛ April, August kɛ December naagbee. Asafo lɛ kɛ niŋmaa kaa wolo ni akala haŋ dɔŋŋ, shi shiɛlɔ fɛɛ shiɛlɔ kɛ lɛ diɛŋtsɛ ewolo kɛ eniŋmaa tso baaba koni enyɛ ekɛ ehe awo kaa lɛ mli. Taakɛ afeɔ yɛ tsutsu lɛ, Asafo lɛ kɛ sanebimɔi kɛ amɛhetoi ni asaa ato momo lɛ baaha. Abaagbala jwɛŋmɔ kɛya saji ni asusu he yɛ Skul Nifeemɔ ni ji 1 lɛ kɛ Biblia mli otii lɛ amlitii lɛ anɔ waa yɛ niŋmaa kaai lɛ amli.
Biblia Kanemɔ
7 Ani wɔmiina Biblia kanemɔ ni akɛhaa wɔ lɛ he sɛɛ akɛ aŋkroaŋkroi? Yɛ be mli ni wɔkaneɔ lɛ, nyɛhaa wɔtaoa ŋmalɛi ni tswaa hiɛsɔɔ, ni ewoɔ sui ni ataoɔ yɛ wɔ aŋkroaŋkroi kɛ weku shihilɛ he lɛ mli hewalɛ, aloo nɔ ni yeɔ ebuaa wɔ ni wɔkɛ nɔkwɛmɔ nii ni jeɔ kpo yɛ mli lɛ atsu nii lɛ. Ani wɔka daa otsi Biblia kɔnemɔ lɛ wɔkwɛ da yɛ be mli ni wɔtswaa Asafo lɛ Biblia mli wiemɔi ni amɔmɔ awo kpaa anɔ lɛ? Kɛ wɔtsɔ nɛkɛ gbɛ nɔ wɔkɛ wɔ nikwɛmɔ kɛ wɔ ninumɔ hewalɛi lɛ tsu nii lɛ, wɔbaaha shishinumɔ ni wɔnaa yɛ emli saji ahe lɛ aya hiɛ. Nyɛkahaa wɔkua wɔhiɛ wɔshwiea yelikɛbuamɔ ni nɔ bɛ ni kpaai ni amɔmɔ wiemɔi awo nɔ nɛɛ kɛhaa nyɛmimɛi hii ni saa amɛhe kɛha Wiemɔ ni ji 2 lɛ anɔ. Kɛ wɔbo bɔ ni atsɛɔ wiemɔi ahaa, bɔ ni atsakeɔ gbee, kɛ bɔ ni amaa jwɛŋmɔ ni yɔɔ mli lɛ nɔ mi lɛ toi jogbaŋŋ lɛ, enɛ baaha nikanemɔ lɛ aŋɔɔ ni wɔbaanu shishi hu.
8 Yehowa eto mumɔŋ nibii babaoo ahe gbɛjianɔ koni eye ebua wɔ yɛ wɔshiɛmɔ—nitsumɔ ni he hiaa, nɛɛ mli. David jie nɔ ni eshweɔ lɛ kpo yɛ esɔlemɔ ni yɔɔ Lala 19:15 lɛ mli akɛ: “Ha midaaŋ wiemɔi kɛ mitsui mli jwɛŋmɔi asa ohiɛ, Yehowa, mi-Tɛsaa kɛ mi-Kpɔlɔ.” Kɛ suɔmɔ ni wɔyɔɔ kɛha Yehowa kɛ e-Bi lɛ yi wɔtsui mli obɔ taakɛ eji yɛ David gbɛfaŋ lɛ, Teokrase Sɔɔmɔ Skul lɛ baaye ebua wɔ ni wɔwie wiemɔi ni saa Yehowa hiɛ yɛ 1989 mli. Nyɛhaa wɔtswaa wɔfai shi amrɔ nɛɛ akɛ wɔbaana gbɛjianɔ ni wɔŋwɛi Tsɛ ni mli hi lɛ eto eha wɔ lɛ he sɛɛ.