Sanekpakpa Lɛ Kɛhamɔ—Kɛ Woji Tɛtrɛbii Lɛ
1 Woji krokomɛi bɛ yinɔsane fɛɛ mli ni ena hewalɛ kpakpa yɛ gbɔmɛi ashihilɛ nɔ taakɛ bɔ ni Buu-Mɔɔ kɛ Awake! lɛ efee lɛ. Eko fɛɛ eko ni baa lɛ eyi obɔ kɛ mumɔŋ niyenii ni haa mɔ naa wala. Nɔ ni jɛɔ niiamlitaomɔ babaoo ni akɛhaa kɛ Ŋmalɛ naa sɛɛfimɔ lɛ mlibaa lɛ haa anɔkwale shɛɛ sane lɛ kaa wɔtsuii kɛ wɔjwɛŋmɔi amli.
2 Buu-Mɔɔ lɛ tsɔɔ Biblia mli tsɔɔmɔi ashishi yɛ ebaafai lɛ amli ni egbalaa wɔjwɛŋmɔ kɛyaa Biblia mli gbalɛi amlibaa nɔ. Ewoɔ mɛi fɛɛ ni hɔmɔ yeɔ amɛ yɛ mumɔŋ lɛ hewalɛ ni amɛtsake amɛjwɛŋmɔ ni amɛwo gbɔmɔtso hee lɛ. (Rom. 12:2; Efes. 4:22-24) Awake! lɛ haa ekanelɔi lɛ hɛleɔ shi yɛ nibii ni he hiaa ni yaa nɔ yɛ je lɛŋ lɛ ahe. Emli mfonirii ni yɔɔ fɛo waa ni feɔ adebɔɔ mli naakpɛɛ nibii ahe mfoniri lɛ kanyaa miishɛɛ ni wɔnaa yɛ jeŋ hee lɛ he lɛ, ni ehaa hiɛsɔɔ ni wɔyɔɔ kɛha Bɔlɔ ni yɔɔ suɔmɔ lɛ yaa hiɛ.
AMƐTAMƆƆƆ JE LƐŊ WOJI TƐTRƐBII LƐ
3 Je lɛŋ woji tɛtrɛbii lɛ etsɔɔɔ gbɔmɛi lɛ bɔ ni amɛaafee ni amɛna shihilɛ ni haa mɔ tsui nyɔɔ emli yɛ je nɛɛ mli. Amɛkɛ hiɛnɔkamɔ ko haaa kɛha wɔsɛɛ ni amɛtsɔɔɔ gbɔmɛi lɛ bɔ ni amɛaafee amɛna naanɔ wala. Ato nakai je lɛŋ woji tɛtrɛbii lɛ ahe gbɛjianɔ koni amɛha je lɛŋ nibii aya hiɛ. Kwɛ bɔ ni Buu-Mɔɔ kɛ Awake! lɛ yɔɔ sɔrɔto kwraa ha.—1 Yoh. 2:15-17.
4 Ŋwanejee ko bɛ he akɛ onaa henumɔ ko ni tsɔɔ hiɛsɔɔ ni mli kwɔ ni oyɔɔ kɛha Buu-Mɔɔ kɛ Awake!—ni ji woji tɛtrɛbii ni hiɛ anɔkwale lɛ he ŋmajee ni jɛ “tsulɔ nukpa kɛ nilelɔ” lɛ ŋɔɔ lɛ eko fɛɛ eko ni baa lɛ. (Luka 12:42) Mɛni wɔbaanyɛ wɔfee ni wɔha bɔ ni wɔkɛ woji tɛtrɛbii lɛ haa lɛ aya hiɛ koni wɔtsɔ nɔ wɔkɛye wɔbua mɛi pii ni amɛna wɔwoji lɛ ahe sɛɛ?
WƆGBƐFAŊNƆ NI WƆƆFEE
5 Dani wɔɔnyɛ wɔye wɔbua mɛi ni hiɛ tsui krɔŋŋ lɛ jogbaŋŋ ni amɛkane wɔwoji tɛtrɛbii lɛ, ehe miihia ni wɔle nɔ ni yɔɔ eko fɛɛ eko mli. Enɛ biɔ ni wɔkane sɔrɔtoi ni baa lɛ fɛɛ dani wɔkɛtsu nii yɛ sɔɔmɔ nitsumɔ lɛ mli. Kɛ wɔle amɛmli saji jogbaŋŋ lɛ wɔbaanyɛ wɔkɛ hegbɛi ni wɔnaa yɛ shia-kɛ-shia nitsumɔ lɛ kɛ trukaa odaseyeli mli lɛ atsu nii ni wɔkɛja woji tɛtrɛbii lɛ babaoo.
6 Eyɛ mli akɛ ekolɛ wɔsanegbaa lɛ baafee kuku yɛ be mli ni wɔkɛ woji tɛtrɛbii lɛ haa lɛ moŋ, shi ehe ehiaaa ni wɔkɛ miniti kome loo enyɔ pɛ awie wɔsane lɛ he. Wɔmiisumɔ ni wɔhe be koni wɔkɛkwɛ kɛji mɔ lɛ yɛ emli shɛɛ sane lɛ he miishɛɛ lɛlɛŋ ni ebaakane wolo tɛtrɛɛ lɛ hu lo. Kɛji sanebimɔi te shi lɛ, esa akɛ wɔbɔ mɔdɛŋ be fɛɛ be akɛ wɔɔha sanebimɔi lɛ ahetoo kɛtsɔ wɔ-Biblia lɛ aloo Reasoning wolo lɛ ni wɔkɛaatsu nii kwraa kɛmɔ shi lɛ nɔ. Kɛ wɔfee klalo akɛ wɔɔfa wɔhemɔkɛyeli lɛ he be fɛɛ be lɛ, no lɛ wɔɔna jɔɔmɔi ni yɔɔ naakpɛɛ.—1 Pet. 3:15.
7 Kɛji mɔ lɛ kpɛlɛ nɔ akɛ ebaakane woji tɛtrɛbii lɛ, no lɛ wɔbaanyɛ wɔwie bɔ ni wɔnitsumɔ lɛ ji lɛ he kɛ bɔ ni akalaa nɛkɛ woji tɛtrɛbii nɛɛ shii enyɔ yɛ nyɔŋ kome mli akɛ jeŋ muu fɛɛ Biblia mli tsɔsemɔ nitsumɔ lɛ fa lɛ hu he. Akɛni atsɔɔ nɔ ni baanyiɛ sɛɛ lɛ mli saji be fɛɛ be hewɔ lɛ, wɔbaanyɛ wɔbibii saji ni kɔɔ nomɛi ahe aloo wɔgbala ejwɛŋmɔ kɛba nɔ ni baanyiɛ sɛɛ aba lɛ nɔ. Enɛ baatee mɔ lɛ miishɛɛ shi ni ebaatsirɛ lɛ ni ebatsɔɔ akɛ ebaasumɔ ni ena nakai wolo tɛtrɛɛ lɛ eko kɛ eba. Enɛ baanyɛ afee shishijee gbɛ kɛha mɛi ni heɔ woji tɛtrɛbii lɛ daa lɛ namɔ.
8 Yɛ be mli ni nibii agbɛjianɔtoo nɛɛ naagbee lɛ bɛŋkɛɔ lɛ, eba akɛ wɔhe aaafee oya ni wɔye wɔbua mɛi ni hiɛ tsui krɔŋŋ lɛ ni amɛje Babilon kpeteŋkpele lɛ mli ni amɛba anɔkwale lɛ mli. (Kpoj. 18:4) Buu-Mɔɔ kɛ Awake! lɛ tsuɔ babaoo yɛ wɔ jeŋ muu fɛɛ Biblia mli tsɔsemɔ nitsumɔ lɛ mli. Wɔdaa shi waa akɛ Yehowa kɛha wɔ koni wɔkɛtsu nii yɛ wɔsɔɔmɔ nitsumɔ lɛ mli. Eba akɛ Yehowa aaaya nɔ ajɔɔ nilee gbɛ ni wɔtsɔɔ nɔ wɔkɛ woji nɛɛ tsuɔ nii jogbaŋŋ kɛmɔɔ shi lɛ nɔ babaoo!