Shɛ Tsuii Ahe Kɛtsa Biblia Mli Nikasemɔi Ni Mɔɔ Shi Nɔ
1 Yesu na e-Tsɛ suɔmɔnaa nifeemɔ he miishɛɛ, ni ena mɛi krokomɛi ni eeeye ebua amɛ ni amɛ hu amɛsɔmɔ Yehowa lɛ he miishɛɛ. (Lala 40:9; Mat. 9:37, 38; 11:28-30) Yesu tsui enyɔɔɔ emli yɛ eshɛɛ sane lɛ ni eeeha mɛi anu lɛ he kɛkɛ. Kɛji wɔ hu wɔɔye omanye yɛ mɛi krokomɛi ni wɔwoɔ amɛ hewalɛ ni amɛfata wɔhe yɛ sanekpakpa jajemɔ nitsumɔ lɛ mli lɛ gbɛfaŋ lɛ, no lɛ esa akɛ wɔshɛ wɔ Biblia nikaselɔi lɛ atsuii ahe. Enɛ biɔ babaoo fe sanebimɔ-kɛ-hetoi ni wɔkɛaasusu wolo ko he kɛkɛ. Kɛji wɔɔshɛ tsui lɛ he lɛ, no lɛ esa akɛ wɔsaa wɔhe ni wɔha wɔ nikaselɔ lɛ ahi wɔjwɛŋmɔ mli.
2 Yesu na mɛi krokomɛi ahe miishɛɛ diɛŋtsɛ. Esusu bɔ ni amɛsusuɔ nii ahe amɛhaa lɛ he. Ekɛ abɛbuai tsu nii ni ekɛha saji ni shishinumɔ wa lɛ fee mlɛo kwraa. (Mateo yitsei 5-7) Akɛni eyoo naagbai ni amɛkɛbaakpe lɛ hewɔ lɛ, Yesu kɛ ŋaawoo ni sa lɛ ha. (Marko 9:33-37) Beni etoibolɔi lɛ nyɛɛɛ amɛnu enitsɔɔmɔ lɛ mli oti lɛ shishi yɛ shishijee mli lɛ, ekɛ tsuishitoo fee nɔ ni ekɛɔ lɛ he mfoniri eha amɛ. (Mat. 16:5-12) Esa akɛ miishɛɛ kpele ni Yesu yɔɔ yɛ mɛi krokomɛi anibii ahe lɛ atsirɛ wɔ ni wɔbi akɛ, ‘Eji mi ji nikaselɔ lɛ kulɛ, mɛni ehe baahia ni male bɔni afee ni manu nibii ashishi koni nɔ ni atsɔɔ mi lɛ akanya mi?’—Kadimɔ 1971 Yearbook, baafai 246-7.
Maa Biblia Lɛ Nɔ Mi
3 Beni abi hefatalɔi komɛi nɔ ni ha amɛhere odase ni aye amɛ lɛ nɔ mra nakai lɛ, amɛha hetoo akɛ: “Eyɛ Biblia lɛ mli.” Hɛɛ. Nyɔŋmɔ Wiemɔ lɛ shɛɔ tsuii amli. (Heb. 4:12) Esa akɛ otsɛ yisɛɛ be fɛɛ be, ni okɛ ŋmalɛi ni atsɛ yɛ kukuji lɛ amli lɛ atsu nii babaoo. Ye Obua nikaselɔ lɛ ni ena nɔ hewɔ ni gbɛ pɔtɛɛ ko ni eeekɔ lɛ ji nilee gbɛ aloo kwashiai agbɛ lɛ. Okɛ lɛ asusu nii ahe yɛ bɔ ni toiboo ni eeefee eha Nyɔŋmɔ mlai lɛ he baaba sɛɛnamɔ aha lɛ lɛ he.—Kwɛmɔ Buu-Mɔɔ February 1, 1985, baafai 15-16.
4 Shiɛlɔi pii ena akɛ Reasoning wolo lɛ kɛ nitsumɔ mɔɔ shi ni ehaa amɛnyɛɔ amɛmaa Biblia lɛ nɔ mi. Akɛ nɔkwɛmɔ nɔ lɛ, beni nyɛsusua Obaanyɛ Ohi Shi Kɛya Naanɔ wolo lɛ baafa 124. kuku 18 he lɛ, ekolɛ shiatsɛ lɛ baanyɛ abi nɔ hewɔ ni amɛ osɔfo lɛ kɛɔ amɛ akɛ gbekɛbii gboiɔ ejaakɛ Nyɔŋmɔ miitao ni amɛbafata ehe yɛ ŋwɛi lɛ. Kɛji nyɛsusu sane ni yɔɔ Reasoning wolo lɛ baafa 99 lɛ he, yɛ yitso ni ji “Why do babies die!” (‘Mɛni hewɔ ni abifabii gboiɔ lɛ?’) shishi lɛ, emaa miishɛɛ ni Yehowa yɔɔ akɛ eeebaa weku gbɛjianɔtoo lɛ yi lɛ nɔ mi. Nɛkɛ mlitsɔɔmɔ nɛɛ baakɔne mɔ lɛ yiŋ yɛ suɔmɔ ni Yehowa yɔɔ kɛha adesai lɛ he.
Bi Saji
5 Sanebimɔi ni Yesu kɛtsu nii yɛ gbɛ ni mɔɔ shi nɔ lɛ ye ebua lɛ ni eha gbɔmɛi lɛ jwɛŋ ni amɛsusu nii ahe hu. (Mat. 17:24-27) Hetoi ni nikaselɔi lɛ baaha lɛ baanyɛ aye abua wɔ ni wɔkpɛ wɔyiŋ yɛ nɔ ni ekaseɔ lɛ kɛ agbɛnɛ shishinumɔi ni damɔɔɔ ŋmalɛ nɔ ni ekolɛ ehiɛ lolo lɛ he. Ekolɛ nikaselɔ lɛ miiwuu eeshi tawa shɛremɔ subaŋ. Nyɛti sane ni yɔɔ Obaanyɛ Ohi Shi Kɛya Naanɔ wolo lɛ yitso 27, kɛ sane ni yɔɔ Awake! ni je kpo July 8, 1989, yɛ baafai 13-16 lɛ mli. Ena akɛ ehe miihia ni ekpa. Shi kɛlɛ, ani enu shishi lɛlɛŋ akɛ esa akɛ etsi ehe kwraa kɛjɛ he? Ekolɛ obaakɛɛ: “Te onuɔ enɛ he ohaa tɛŋŋ? Susumɔ he akɛ okpa bianɛ, shi onanemɛi lɛ ateŋ mɛi komɛi baaye ohe fɛo. Mɛni obaafee?”
6 Shi kɛlɛ, ŋaawoo fioo ko nɛ. Bei komɛi lɛ hetoi ni abaaha yɛ sanebimɔi nɛɛ ekomɛi ahe lɛ baaha onaa akpɛ ohe loo onijiaŋ aje wui po. Mɛni obaafee yɛ he? Kɛ eji sane ko ni he hiaa waa lɛ, no lɛ ebaahi akɛ okafee shɛii yɛ sane lɛ he, shi moŋ okɛɛ lɛ akɛ: “Bo lɛ ha wɔya nɔ. Wɔbaanyɛ wɔba sane nɛɛ nɔ ekoŋŋ yɛ sɛɛ mli.” Aloo “Ojogbaŋŋ, ehe miihia ni wɔsusu he waa, aloo jeee nakai?” (Yoh. 16:12) Akɛni ole bɔ ni nikaselɔ lɛ susuɔ yɛ sane lɛ he hewɔ lɛ, obaanyɛ osaa saji ni kɔɔ sane lɛ he ni baaye abua lɛ bɔni afee ni eya ehia lolo. Esa akɛ wɔbɔ mɔdɛŋ ni wɔkanya mɔ lɛ tsui ni wɔsɔle ni Yehowa aye abuɔ lɛ ni eda yɛ mumɔ .—1 Kor. 3:5-9.
7 Kɛ oofee Biblia mli nikasemɔ lɛ, kaimɔ yɛ bei fɛɛ mli ni ohe be ni fa bɔ ni sa ni okɛ nikaselɔ lɛ asusu nii ni nyɛkaseɔ lɛ he. Tsakemɔ gbɛi ni otsɔɔ nɔ otsɔɔ nii lɛ mli ni esa ahiamɔ nii titrii lɛ ahe. Bɔɔ mɔdɛŋ ni oha ena suɔmɔ kɛ bulɛ ni mli kwɔ kɛha Yehowa. Biblia lɛ, kɛ Yehowa gbɛjianɔtoo lɛ yɛ etsui mli. Eba akɛ wɔɔtsu wɔ gbɛfaŋnɔ ni wɔkɛye wɔbua mɛi krokomɛi ni amɛbatsɔmɔ Kristo kaselɔi kɛtsɔ mɔdɛŋ ni wɔɔbɔ ni wɔtee Biblia mli nikasemɔi ni mɔɔ shi lɛ nɔ.—Bɔfɔi 2:41-46.