Wɔ Maŋtsɛyeli Sɔɔmɔ lɛ He Nitsumɔ kɛ lndex lɛ Yelikɛbuamɔ
1 Akɛ Kristofoi ni wɔjɔɔ wɔhe nɔ lɛ, wɔbɔɔ mɔdɛŋ ni wɔtsu wɔsɔɔmɔ lɛ he nii. Bɔni afee ni eye ebua wɔ ni wɔfee nakai lɛ. Yehowa kɛ gbɛtsɔɔmɔ kɛ hewalɛwoo babaoo eha wɔ yɛ woji atoohe ko kɛ emli woji babaoo ni sɛɛnamɔ yɔɔ he lɛ mli. Ani wɔbaanyɛ ni wɔkɛtsu nii jogbaŋŋ? Shishijee yelikɛbuamɔ nɔ̃ kɛha nakai feemɔ ji Watch Tower Publications Index ni ayaa nɔ akalaa yɛ wiemɔi sɔrɔtoi amli kɛjɛ 1961 lɛ.
2 Mɛɛ gbɛ nɔ Index lɛ baatsɔ aye abuɔ bo ni otsu osɔɔmɔ lɛ he nii yɛ? Efeɔ nakai kɛtsɔɔ ŋaawoi kɛ sane mlitsɔɔmɔi ni nɔ bɛ ni akɛha momo ni etsɔɔ gbɛ kɛyaa he lɛ nɔ. Afee Index lɛ yɛ nyɛmimɛi anaanyobɔɔ muu lɛ fɛɛ ni yɔɔ jeŋ fɛɛ lɛ he jwɛŋmɔ ni ayɔɔ hewɔ. Mɔ fɛɛ mɔ baanyɛ ana he ni atsɔɔ akɛ ebaana nɔ ni he hiaa lɛ kɛha yiŋtoo ko ni sɛɛnamɔ yɔɔ he lɛ kɛjɛ gbekɛbii anɔ aahu kɛmiiya niimɛi kɛ naamɛi anɔ, kɛjɛ Biblia kaselɔi heei kɛmiiya onukpai anɔ.
Bɔ Ni Ooofee Ona Nɔ Ni He Hiaa Bo
3 Kɛ nɔ ni osumɔɔ ni ole ji kuku pɔtɛɛ ko loo kukuji komɛi ashishinumɔ lɛ, ebaahi jogbaŋŋ akɛ klɛŋklɛŋ lɛ ooogbele ŋmalɛi ni ato naa yɛ esɛɛgbɛ lɛ. Ani mɔ ko etsɛ Yohane 10:30 ni ekɛmiibɔ mɔdɛŋ ni ekɛti Triniti tsɔɔmɔ lɛ sɛɛ? Ŋmalɛi ni ato lɛ baatsɔɔ bo gbɛ kɛya saji ni ha Yesu wie nakai lɛ amli. Ŋmalɛi ni ato naa lɛ baaha wɔ-Biblia kanemɔ lɛ aya hiɛ yɛ be mli ni wɔbɔɔ mɔdɛŋ ni wɔnu kukuji ni wɔnuuu shishi loo amɛshishinumɔ bɛ faŋŋ lɛ shishi lɛ.
4 Saji ni ato naa lɛ hu kɛ gbɛi krokomɛi haa ni kɛ mɔ yaa adafitswaa he kome too ni sɛɛnamɔ yɔɔ he lɛ nɔŋŋ he. Akɛ nɔkwɛmɔ nɔ lɛ, saji ni kɔɔ nɔ ni esa akɛ ofee kɛ ohefatalɔ ni heee yeee lɛ sumɔɔɔ ni okɛ gbekɛbii lɛ yaa kpeei lɛ ahe baahia bo. Bɔni afee ni ona hetoo lɛ, obaanyɛ egbele yitsei ni ji ‘Wumɛi,’ ‘Ŋamɛi,’ ‘Gbekɛbii.’ ‘Shitee-kɛ-woo.’ aloo ‘Kpeei.’ Yɛ sane fɛɛ sane he lɛ, kɛ onaaa nɔ ni otaoɔ lɛ yɛ klɛŋklɛŋ yitso lɛ shishi lɛ, bɔɔ ekroko he mɔdɛŋ. Bi ohe akɛ: ‘Enɛ kɔɔ namɔ he? Ani he ko pɔtɛɛ he miihia? Su loo hesaa pɔtɛɛ ko? Henumɔ titri ko? Oti ko? Kɛ ona yitso titri ko ni no sa lɛ, klɛŋklɛŋ lɛ kwɛmɔ hei ni yɔɔ enɛ shishi ni atsɔɔ akɛ okwɛ mli lɛ. Enɛɛmɛi haaa ofite be ejaakɛ amɛhaa onaa yitso kroko ni kɔɔ osane lɛ he pɔtɛɛ.
5 Index lɛ ni wɔkɛaatsu nii kɛ hesaa lɛ baanyɛ aye abua omanye ni wɔyeɔ yɛ gbɛnaa nii ni yɔɔ krɔŋkrɔŋ lɛ ahe nii ni wɔtsuɔ lɛ mli. Yɛ be mli ni wɔhe saa jogbaŋŋ yɛ nɛkɛ dɛŋdade nɛɛ kɛ nitsumɔ mli lɛ, ehe baaba sɛɛnamɔ aha wɔ wekui, wɔ Biblia mli nikaselɔi kɛ wɔ asafoi lɛ. Bulletin nɛɛ krokomɛi ni baaba lɛ baatsɔɔ wɔ hei pɔtɛɛ ni Watch Tower Publications Index nɛɛ he baaba sɛɛnamɔ aha wɔ babaoo yɛ, yɛ wɔ Maŋtsɛyeli sɔɔmɔ lɛ he nitsumɔ mli.