Ye Obua Mɛi Krokomɛi Ni Amɛle Gbɔmɔ Ni Fe Fɛɛ Lɛ He Nii
1 Mɛi ni ekane Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ ateŋ mɛi pii ejie anɔkwa hiɛsɔɔ kpo yɛ hewalɛ ni ena yɛ amɛshihilɛ nɔ lɛ he. Mɔ kome ŋma akɛ: “Beni miyashɛ wolo lɛ naagbee lɛ, minu he tamɔ nɔ ni Yesu efɔ̃ mi nine ni mikɛ lɛ ababɔ naanyo, ni mibahi emasɛi, ni mikɛ lɛ ana emanehului, ehenumɔi, kɛ esɔɔmɔ lɛ fãi sɔrɔtoi lɛ fɛɛ amli gbɛfaŋnɔ . . . Wolo lɛ kanemɔ tamɔ nɔ ni ookwɛ Yesu shihilɛ he sini ni aajie.”
2 Jeee Yesu pɛ Gbɔmɔ ni Fe Fɛɛ wolo lɛ yeɔ ebuaa wɔ ni wɔleɔ lɛ jogbaŋŋ, shi moŋ wɔleɔ Yehowa hu. (Yoh. 14:9) Gbekɛ ko ni eye afii 12 wie yɛ wolo lɛ he akɛ: “Eshɛje mimii aahu akɛ, ni mikane migbe naa nɔŋŋ lɛ, mikɛ miishɛɛ yaafonui sɔle miha Yehowa. Mibana hekɛnɔfɔɔ ni mli wa waa yɛ mimli tɔ̃ɔ akɛ male akɛ Yehowa kɛ Yesu miibu wɔhe.” Yesu wie, taakɛ eŋma yɛ Yohane 17:3 lɛ akɛ, Yehowa kɛ ebi lɛ ni wɔɔle amɛ lɛ tsɔɔ naanɔ wala kɛhaa wɔ. Ni nɛkɛ wolo ni kɔɔ Yesu shihilɛ he nɛɛ kasemɔ haa wɔnuɔ sɛɛyoomɔ krɛdɛɛ ko yɛ Yehowa su he, ejaakɛ Yesu ji “enunyam lɛ kpɛmɔ kɛ esu lɛ henɔ.”—Heb. 1:3.
3 Akala Gbɔmɔ ni Fe Fɛɛ wolo lɛ fe akpekpei 19 yɛ wiemɔi fe 70 mli. Enɛ tsɔɔ bɔ ni anaa wolo lɛ he miishɛɛ waa ahaa. Mɛi pii kaneɔ wolo muu lɛ fɛɛ amrɔ nɔŋŋ ni amɛnine shɛɔ nɔ lɛ. Nuu ko ni yɔɔ wiemɔ lɛ he miishɛɛ kɛ otsii enyɔ kane wolo lɛ egbe naa beni enine shɛ nɔ lɛ. Osɔfo ko ni he wolo lɛ eko lɛ wie akɛ: “Minyɛɛɛ mikɛ wolo lɛ afɔ shi. Mikɛ miŋa fɛɛ kaneɔ he ko daa gbɛkɛ dani wɔyakamɔɔ shi wɔwɔɔ.”
4 Trukaa Odaseyeli: Nyɛminuu ko kɛ Gbɔmɔ ni Fɛ Fɛɛ wolo lɛ tsɔɔ mɛi ni yɔɔ he ni etsuɔ nii yɛ lɛ. Kɛkɛ ni wiemɔ lɛ gbɛ eshwa akɛ eyɛ wolo nɛɛ eko, ni abɔi emli saji hu he wiemɔ yɛ he fɛɛ he. Ni enanemɛi nitsulɔi lɛ ŋmala mɛi fɛɛ ni taoɔ eko lɛ agbɛi amɛba lɛ. Eha woji 461 sɔŋŋ! Akɛ mɛi ni nine shɛ nɔ nɛɛ ateŋ mɛi enumɔ miikase nii. Nyɛmiyoo ko ni miifa gbɛ yɛ kɔɔyɔɔŋ lɛlɛ mli kɛ Gbɔmɔ ni Fe Fɛɛ wolo lɛ ekome ha osɔfo ko ni miiya nifeemɔ ni akɛbaahala osɔfonukpa ko lɛ shishi. Osɔfo lɛ kɛ afii 40 sɔŋŋ ehi Vatikan. Esa akɛ wɔteŋ mɔ fɛɛ mɔ kɛ hegbɛi ni wɔnaa ni wɔkɛaajie wolo lɛ yi wɔtsɔɔ mɛi krokomɛi lɛ atsu nii jogbaŋŋ
5 Obalaŋtai Ahiɛ Sɔɔ Waa: Obalaŋtai hu miina wolo lɛ he miishɛɛ waa. Gbekɛ ko ni eye afii nɛɛhu ŋma akɛ: “Wolo ni misumɔɔ fe fɛɛ ji Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ ejaakɛ mikaseɔ nii babaoo kɛjɛɔ mli.” Kɛ wɔkɛ gbekɛbii kpe yɛ shiɛmɔ mli Iɛ, esa akɛ wɔna be wɔha amɛ, ni kɛ amɛfɔlɔi baakpɛlɛ lɛ, wɔkɛ wolo lɛ atsɔɔ nɛkɛ gbekɛbii nɛɛ ni wɔkɛ amɛ asusu emli otii kɛ mfonirii lɛ ekomɛi ahe. Ekolɛ wɔbaanyɛ wɔkɛ woji lɛ aha nɛkɛ gbekɛbii nɛɛ. Kɛ aha amɛ hegbɛ ni amɛkɛaale Yesu he nii lɛ, gbekɛbii yɛ ŋmɛnɛ ni amɛbaanyɛ amɛkpɛlɛ enɔ. Yesu ji mɔ ko ni anyɛɔ abɛŋkɛɔ lɛ.—Mat. 19: 14, 15.
6 Gbɔmɔ ni Fe Fɛɛ wolo lɛ kanemɔ baanyɛ atsake gbɔmɛi ashihilɛ. Bɔɔ mɔdɛŋ ni oha mɛi babaoo ale emli saji bɔ ni ooonyɛ. Okɛ sane ni yɔɔ wolo lɛ hiɛkpamɔ wiemɔ lɛ naagbee baafa, yɛ yitso bibioo ni ji “Na Ehe Nikasemɔ He Sɛɛ” shishi lɛ atsu nii. Nɛkɛ sane nɛɛ baaye abua gbɔmɛi lɛ ni egbala amɛjwɛŋmɔ kɛba sɛɛnamɔ ni baajɛ wolo nɛɛ kanemɔ mli aba lɛ nɔ. Ekolɛ mɛi pii baakɛɛ yɛ oshikpɔŋkuku lɛ mli, taakɛ mɔ ko kɛɛ beni ekane wolo lɛ, akɛ: “No ji wolo ni hi fe fɛɛ ni mikane! Etsake mishihilɛ kwraa.”