Nɔ Hewɔ Ni Dɛhiɛmɔ Woji Ahe Hia Waa Yɛ Wɔ Sɔɔmɔ Nitsumɔ Lɛ Mli Ŋmɛnɛ
1 Akɛ niiashikpamɔ ko wo January 1, 1991, Buu-Mɔɔ lɛ baafa 30, ni yitso ji “Ena Dɛhiɛmɔ Wolo ko yɛ Oketeke Dade lɛ Nɔ.” Ewieɔ oketeke gbɛ saalɔi akuu nɔkwɛlɔ ko ni yana wɔ dɛhiɛmɔ woji lɛ ekome ni etsɛ oketeke dade shishi lɛ he. Ekane dɛhiɛmɔ wolo lɛ amrɔ nɔŋŋ, ni no sɛɛ lɛ ekɛɛ eshaanuu akɛ: “Ŋmɛnɛ mina anɔkwale lɛ!” Mɛi enyɔ lɛ fɛɛ shɛ woji babaoo ni amɛkase. Amrɔ nɛɛ, amɛseshibii fe oha yɛ ekaa babaoo yɛ anɔkwale lɛ mli. Enɛ tsɔɔ nɔ ni baanyɛ ajɛ dɛhiɛmɔ wolo kome pɛ kɛkɛ kanemɔ mli aba.
2 Hegbɛ ni Wɔnaa lɛ kɛ Nitsumɔ: Odasefonyo gbekɛ ko na akɛ eskul tsɔɔlɔ lɛ werɛ eho ehe waa yɛ eshaayoo gbele hewɔ. Nɛkɛ nyɛmiyoo fioo nɛɛ ŋma wolo eyaha etsɔɔlɔ lɛ ni ekɛshɛje emii, ni ekɛ Mɛɛ Hiɛnɔkamɔ Yɔɔ Kɛha Suɔlɔi ni Amɛgboi? dɛhiɛmɔ wolo lɛ ekome wo mli. Tsɔɔlɔ lɛ ŋma wolo ni ekɛbada lɛ shi, ni no sɛɛ lɛ ekɛ wɔnyɛmiyoo lɛ gba sane. Amrɔ nɛɛ tsɔɔlɔ nɛɛ heɔ woji tɛtrɛbii kɛjɛɔ eŋɔɔ daa.
3 Shiɛlɔi komɛi ni miiye odase yɛ gbɛ ko ni atsɔɔ nɔ kɛyaa gɔɔ mli he lɛ na mɛi komɛi ni miisha sãii ahe kaaloo. Shiɛlɔi lɛ kɛ hegbɛ lɛ tsu nii ni amɛha amɛ dɛhiɛmɔ woji. Enɔ jetsɛremɔ lɛ, hejɔɔmɔ gbi ni, ni mɛi pii kɛyaa gɔɔ lɛ mli, no hewɔ lɛ shiɛlɔi lɛ kpɛ amɛyiŋ akɛ amɛbaadamɔ gɔɔ lɛ naa ni amɛkɛ dɛhiɛmɔ woji aha. Amɛha dɛhiɛmɔ woji fe ohai enumɔ, ni mɛi etɛ pɛ ji mɛi ni heee eko. Enɔ afi lɛ, shiɛlɔi ku amɛsɛɛ amɛba jɛmɛ ekoŋŋ, ni amɛkɛ dɛhiɛmɔ woji fe akpe ha, ni mɛi ekpaa pɛ heee eko.
4 Etsɛko tsɔ ni shiɛlɔi kɛ gbɛgbalɔi akuu bibioo ko tee gɔɔ agbo ko mli, he ni mɛi babaoo ebabua amɛhe naa yɛ akɛ amɛyaafo gbohii lɛ ni amɛsɔle amɛha amɛ, yɛ Susumai Fɛɛ Agbi lɛ nɔ. Yarafeelɔi lɛ ná Mɛɛ Hiɛnɔkamɔ Yɔɔ Kɛha Suɔlɔi ni Amɛgboi? dɛhiɛmɔ wolo lɛ he miishɛɛ waa titri. Oya nɔŋŋ kɛkɛ ni nyɛmimɛi lɛ tee gɔɔ krokomɛi hu mli, ni amɛyaja dɛhiɛmɔ woji lɛ yɛ jɛmɛ hu. Amɛmii shɛ amɛhe kɛteke nɔ yɛ hegbɛ, taakɛ mɔ kome wie he lɛ, “ni amɛkɛshiɛ kɛjɛ gɔɔ kome mli kɛtee gɔɔ kroko mli” lɛ he.
5 Dɛhiɛmɔ woji lɛ daraaa ni ewaaa hu akɛ wɔɔhiɛ kɛya he fɛɛ he ni wɔyaa. Kɛ wɔkɛ mɛi krokomɛi miigba sane trukaa lɛ, esa akɛ wɔbɔ mɔdɛŋ ni wɔwie wiemɔ kuku ko ni baanyɛ atsa nɔ kɛya dɛhiɛmɔ woji kpaanyɔ ni wɔyɔɔ amrɔ nɛɛ mli ekome mli sanegbaa nɔ. Wɔbaanyɛ wɔfee enɛ beni wɔkɛ wɔkutsoŋbii wieɔ, beni wɔtee jara nɔ aloo beni wɔmɛɔ mɔ ko, beni wɔfaa gbɛ loo wɔtee wɔwekumɛi asaramɔ, aloo yɛ shihilɛi sɔrɔtoi babaoo mli.
6 Nɔ Hewɔ ni Emɔɔ Shi Jogbaŋŋ Lɛ: Dɛhiɛmɔ woji lɛ hiɛ sui sɔrɔtoi ni yɔɔ fɛo. Emli sane yɛ kuku. Ni kɛlɛ, sane lɛ mɔɔ mɔ jwɛŋmɔ ni etsɔɔ mɔ nii hu. Kanelɔ lɛ náa Ŋmalɛ naa shishinumɔ ni yɔɔ faŋŋ yɛ sane ni asusu he yɛ dɛhiɛmɔ wolo lɛ mli lɛ mli. Beni obalanyo ko nine shɛ Shihilɛ yɛ Toiŋjɔlɛ Jeŋ Hee ko Mli dɛhiɛmɔ wolo lɛ nɔ ni akɛ lɛ gba emli sane sɛɛ lɛ, ewie akɛ: “Minuko sane ni woɔ mɔ hewalɛ yɛ je lɛŋ shihilɛ he tamɔ nɛkɛ dã!”
7 Wɔmiisumɔ ni wɔkɛ dɛhiɛmɔ woji nɛɛ atsu nii yɛ be fɛɛ be ni hi mli. Shiɛlɔi pii ena akɛ eyeɔ ebuaa waa kɛha sanegbaa shishijee yɛ shia-kɛ-shia nitsumɔ lɛ mli. Aje nikasemɔi ni afeɔ bianɛ lɛ ateŋ babaoo shishi kɛ dɛhiɛmɔ wolo. Kɛ okwɛ Wɔ Maŋtsɛyeli Sɔɔmɔ nɛɛ baafa 4 lɛ, akɛ ŋaawoi ni anyɛɔ akɛtsuɔ nii eha yɛ jɛmɛ ni tsɔɔ bɔ ni aaafee akɛ dɛhiɛmɔ woji atsu nii jogbaŋŋ kɛmɔ shi. Hɛɛ, dɛŋdadei bibii ji dɛhiɛmɔ woji lɛ, shi amɛhe yɛ sɛɛnamɔ waa kɛha wɔsɔɔmɔ nitsumɔ lɛ.