Ha Amɛnu He akɛ Ahere Amɛ Atuu yɛ Kaimɔ lɛ Shishi
1 Yɛ afii fioo ni eho nɛɛ amli lɛ, mɛi ni baa Kaimɔ lɛ shishi lɛ ateŋ mɛi 3 mli 1 pɛ ji sanekpakpa shiɛlɔ. Ekolɛ nakai ebaaba lɛ yɛ afi nɛɛ hu mli. Mɛi komɛi baaba yɛ amɛ wekumɛi loo nanemɛi ni yɔɔ maŋ kroko nɔ lɛ akanyamɔ hewɔ, ni mɛi krokomɛi baaba yɛ nine ni shiɛlɔi ni yɔɔ maŋ lɛ mli lɛ fɔ amɛ lɛ hewɔ. Mɛi krokomɛi hu baa ni eyɛ mli akɛ abaptisi amɛ moŋ, shi amɛkɛ amɛhe wooo sɔɔmɔ nitsumɔ lɛ mli dɔŋŋ. Wɔkɛ anɔkwayeli miihere mɛi fɛɛ ni jieɔ bulɛ kpo amɛtsɔɔ Yesu famɔ: “Nyɛfea enɛ ni nyɛŋɔ-kai mi” lɛ atuu.—1 Kor. 11:24; Rom. 15:7.
2 Sɔɔlɔi ni baaha mɛi ni baa lɛ sɛ̃i lɛ akwɛ ni amɛhere mɔ fɛɛ mɔ atuu, titri lɛ mɛi heei lɛ, beni amɛbashɛɔ Maŋtsɛyeli Asa lɛ nɔ lɛ. Shi kɛlɛ wɔteŋ mɔ fɛɛ mɔ baanyɛ ana gbɔfeemɔ yɛ Kaimɔ lɛ shishi lɛ mli gbɛfaŋnɔ. (Rom. 12:13) Shi mɛɛ gbɛ nɔ wɔɔtsɔ wɔfee enɛ yɛ?
3 Shiɛlɔi lɛ ekomɛi kɛ tsɔnei baahole mɛi ni yɔɔ wiemɔ lɛ he miishɛɛ ni baa nakai gbɛkɛ lɛ. Mɛi krokomɛi hu baanyɛ aba mra ni amɛbaŋa loo amɛbahere mɛi ni amɛkome amɛbaa lɛ hiɛmɛɛ. Kɛ gbɔ ko ba asa lɛ nɔ lɛ, nyɛkɛ miishɛɛ aŋaa lɛ ni nyɛjea sanegbaa shishi. Bi lɛ kɛ ele mɔ ko yɛ asafo lɛ mli. Kɛ ele mɔ ko lɛ, kwɛmɔ lɛ kɛyashi nakai mɔ lɛ aaaba. (Okɛto Luka 10:35 he.) Ni kɛ eleee mɔ ko kwraa hu lɛ, mɛni hewɔ ofɔɔɔ lɛ nine koni eta omasɛi beni kpee lɛ yaa nɔ lɛ? Tsɔɔmɔ bɔ ni akɛ wein lɛ kɛ aboloo lɛ baatsu nii aha yɛ gbɛjianɔtoo lɛ mli lɛ mli. Ekolɛ oyelikɛbuamɔ he baahia lɛ yɛ ŋmalɛi ni wielɔ lɛ tsɛɔ lɛ ataomɔ mli.
4 Kɛ Kaimɔ lɛ yeli ba naagbee lɛ, ha ele akɛ eŋɔɔ onaa waa akɛ eba jɛmɛ. Ekolɛ eyɛ sanebimɔi komɛi ni kɔɔ wɔ nitsumɔ lɛ he ni obaanyɛ oha hetoo. Miishɛɛ ni ooona yɛ ehe lɛ baatee Biblia mli sanegbaa ko shi, ekolɛ yɛ Maŋtsɛyeli Asa lɛ nɔ loo yɛ he kroko. Nyɛmimɛi ni hiɛ yɔɔ amɛhe nɔ ni kɛ hegbɛ ni tamɔ nɛkɛ tsuɔ nii lɛ enyɛ eje nikasemɔi kpakpai ashishi. Okɛ gbɔ lɛ atsɔɔ mɛi krokomɛi dani eshi Maŋtsɛyeli Asa lɛ nɔ, ni ofɔ lɛ nine koni eku esɛɛ eba ekoŋŋ.
5 Kwɛ miishɛɛ ni wɔnaa beni wɔhereɔ wɔnyɛmimɛi hii kɛ yei ni baaa kpeei daa loo amɛkpa sɔɔmɔ nitsumɔ lɛ mli ni amɛkɛ amɛhe woɔ lɛ yɛ be saŋŋ mli lɛ atuu lɛ! Ni wɔɔbi amɛ nɔ hewɔ ni amɛbaaa kpeei lɛ moŋ lɛ, tsɔɔmɔ akɛ amɛ ni ona lɛ eha ona miishɛɛ babaoo. Ekolɛ sane ko ni amɛbaanu yɛ Kaimɔ wiemɔ lɛ mli lɛ baakanya amɛ ni amɛsusu Yehowa ni amɛjɔɔ amɛhe nɔ amɛha lɛ lɛ he ekoŋŋ. Miishɛɛ ni okɛhere amɛ kɛ bɔ ni osusuɔ amɛhe diɛŋtsɛ lɛ baasa amɛtsuii ahe. Ha amɛle akɛ okɛ miishɛɛ miikpa gbɛ akɛ obaana amɛ ekoŋŋ.—Rom. 1:11, 12.
6 Abaaha maŋshiɛmɔ krɛdɛɛ ko yɛ asafoi pii amli yɛ April 10, ni eyitso ji “Anɔkwa Jamɔ Tsuɔ Adesai Ashihilɛ Mli Hiamɔ Nii Ahe Nii.” Akwɛ koni afɔ mɛi fɛɛ ni baa Kaimɔ lɛ yeli shishi lɛ nine ni aye abua amɛ ni amɛba. Wɔhiɛ ka nɔ akɛ mɛi ni baa kpeei krɛdɛɛi nɛɛ ashishi lɛ baanu he akɛ ahere amɛ atuu ni amɛnu miishɛɛ naanyobɔɔ ni yɔɔ Yehowa webii ateŋ lɛ he.—Lala 133:1.