Wo Amɛ Hewalɛ ni Amɛbafee Esɛɛnyiɛlɔi
1 Paulo ŋma yɛ 1 Korintobii 3:6 akɛ: “Mi lɛ, mitɛo; Apolo shwie nɔ nu; shi Nyɔŋmɔ hã shwere.” Paulo kɛ niiahesusumɔ nɛɛ tsu nii koni eye ebua enyɛmimɛi lɛ ni amɛna bɔ ni ehe hiaa ni amɛfee ekome kɛtsu nii yɛ Kristo yitsoyeli shishi. Etsɔ nɛkɛ gbɛ nɔ hu eye ebua amɛ ni amɛna gbɛfaŋnɔ ni he hiaa, ni amɛyɔɔ yɛ nidumɔ kɛ enɔ nu-shwiemɔ nitsumɔ ni he hiaa lɛ mli.
2 Akɛ nakai yiwalaheremɔ nitsumɔ lɛ baaba naagbee yɛ yinɔ nɛɛ mli. Ákɛ Kristofoi ni ejɔɔ amɛhe nɔ lɛ, gbɛnaa nii ni yɔɔ hiɛdɔɔ kã wɔnɔ akɛ wɔye wɔbua mɛi krokomɛi ni amɛbafee Yesu sɛɛnyiɛlɔi. (Bɔf. 13:48) Te obaafee tɛŋŋ oyadi miishɛɛ ni oha mɔ lɛ ná kɛtsɔ Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ kɛ nitsumɔ nɔ lɛ sɛɛ?
3 Kɛ ooku osɛɛ ni oyasara mɔ ko ni he wolo lɛ eko lɛ, obaanyɛ okɛɛ akɛ:
◼ “Nyɛsɛɛ ni wɔgba sane lɛ, wɔsusu bɔ ni Yesu Kristo ji akɛ gbɔmɔ lɛ he. Mina he miishɛɛ waa akɛ miha bo Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ eko. Mɛni ji nɔ ni onaa he miishɛɛ fe fɛɛ yɛ Yesu nitsɔɔmɔ kɛ esui ahe?” Ŋmɛɛ gbɛ ni ejie naa. Gbelemɔ wolo lɛ yitso 113, ni nyɛsusu Yesu heshibaa he nɔkwɛmɔ nɔ ni fe fɛɛ lɛ he. Kanemɔ Filipibii 2:8 ni okɛtsɔɔ lɛ bɔ ni bɔfo Paulo wie Yesu heshibaa su lɛ he eha. No sɛɛ lɛ, obaanyɛ otsɔɔ lɛ bɔ ni ebaanyɛ ekase nii babaoo kɛtsɔ Biblia lɛ kasemɔ daa nɔ.
4 Ekolɛ obaasumɔ hiɛkpamɔ wiemɔ nɛɛ:
◼ “Wɔwie nibii ni Yesu fee beni eyɔɔ shikpɔŋ nɛɛ nɔ lɛ ahe ni tsɔɔ akɛ esusuɔ wɔhe lɛlɛŋ. Mɛni osusuɔ akɛ naagbee lɛ ebaafee ni ekɛha mɛi ni ena amanehulu babaoo lɛ heyeli?” Ŋmɛɛ gbɛ ni ejie naa. Gbelemɔ yitso 133, ni nyɛtĩ kuku enumɔ lɛ mli wiemɔi amli. Gbelemɔ baafa ni tsa nɔ lɛ ni nyɛkwɛ mfoniri lɛ, ni otsɔɔ lɛ bɔ ni nibii baafee aha kɛ aafee Nyɔŋmɔ suɔmɔnaa nii yɛ shikpɔŋ lɛ nɔ taakɛ afeɔ yɛ ŋwɛi lɛ. Tsɔɔmɔ lɛ sɛɛnamɔi ni eeena kɛjɛ babaoo kasemɔ mli.
5 Kɛ miishɛɛ lɛ faaa tsɔ̃ kɛjɛ shishijee lɛ, no lɛ ekolɛ obaanyɛ oje osanegbaa lɛ shishi nɛkɛ:
◼ “Misusuɔ akɛ wɔyi enyɔ lɛ fɛɛ wɔkpɛlɛɔ nɔ akɛ mɛi pii ashihilɛ tsɔɔ ŋmɛnɛ akɛ amɛnyiɛɔ mɔ ko ni amɛbuɔ lɛ akɛ eji amɛ nɔkwɛmɔ nɔ lɛ sɛɛ. Yesu Kristo ji nɔkwɛmɔ nɔ ni fe fɛɛ ni mɔ ko baanyɛ ana. Masumɔ ni mikɛ bo agba nikasemɔ ko ni he hiaa waa ni mina kɛjɛ Yesu nɔkwɛmɔ nɔ ni efee efɔ̃ shi lɛ kasemɔ mli lɛ he sane. [Gbelemɔ Gbɔmɔ ni Fe Fɛɛ lɛ yitso 40, ni ogbala ejwɛŋmɔ kɛya Yesu mlihilɛ nitsɔɔmɔ ni kɔɔ mɔbɔnalɛ he lɛ nɔ.] Enɛ kaiɔ mi bɔ ni ehe hiaa ni majie nakai su lɛ kpo matsɔɔ mɛi krokomɛi lɛ jogbaŋŋ diɛŋtsɛ.” Kanemɔ Mateo 5:7. Kɛ otsɔ nɛkɛ gbɛ nɔ otee mɔ lɛ miishɛɛ shi lɛ, agbɛnɛ okɛ wolo lɛ loo Ani Nyɔŋmɔ Susuɔ Wɔhe Lɛlɛŋ? wolo bibioo lɛ aha lɛ.
6 Aloo ekolɛ obaasumɔ ni oka gbɛ ni yɔɔ tɛɛ nɛɛ okwɛ:
◼ “Nyɛsɛɛ ni miba biɛ lɛ, wɔsusu bɔ ni ehe hiaa ni wɔna Yesu he nilee lɛ he. Yohane 17:3 lɛ kɛɔ akɛ ‘eeefee naanɔ wala’ eha wɔ kɛji wɔna nɛkɛ nilee nɛɛ. Mɛɛ gbɛ nɔ wɔɔtsɔ wɔfee nakai?” Ŋmɛɛ gbɛ ni ejie naa. Yaa nɔ otsɔɔ lɛ wɔ Biblia kasemɔ gbɛjianɔtoo lɛ kɛ bɔ ni eeefee ni eha ehe aba sɛɛnamɔ kɛha lɛ.
7 Paulo kɛɔ akɛ nitsulɔ ni fata nikpamɔ lɛ he lɛ “aaana lɛ diɛŋtsɛ enyɔmɔwoo, yɛ lɛ diɛŋtsɛ enitsumɔ naa.” (1 Kor. 3:8) Kɛ wɔmia wɔhiɛ waa ni wɔye wɔbua mɛi krokomɛi ni amɛbatsɔmɔ Yesu sɛɛnyiɛlɔi lɛ, no lɛ eka shi faŋŋ akɛ wɔ nyɔmɔwoo baafa babaoo.