Nyɔŋmɔ Gbalɛ Wiemɔ lɛ Fɛɛ Baaba Mli Anɔkwale!
1 Yehowa Odasefoi ená Biblia gbalɛ he miishɛɛ be fɛɛ be. No hewɔ lɛ, wɔná miishɛɛ waa akɛ wɔná wɔle akɛ nyɛsɛɛ afi lɛ kpokpaa wulu nɔ kpee lɛ saneyitso lɛ baafee “Nyɔŋmɔ Gbalɛ Wiemɔ” lɛ. Wɔhe miitswa shi akɛ wɔɔle nɔ ni Yehowa esaa eto wɔ akɛ ‘ŋmãa yɛ be ni sa nɔ lɛ.’ (Mat. 24:45) Ehaaa wɔnine anyɛ shi.
2 Kpee Shishi Saji Otii: Nɔ ni yɔɔ Sohaa wiemɔ krɛdɛɛ ni yitso ji, “Bó Nyɔŋmɔ Gbalɛ Wiemɔ lɛ Toi” lɛ mli ji sanegbaa ni akɛnáa nilee ni kɔɔ bɔ ni tsakemɔ sane lɛ ba ha lɛ he lɛ. (Mat. 17:1-9) Ema nɔ mi akɛ amrɔ nɛɛ wɔyɛ bei ni hi fe fɛɛ lɛ husui lɛ anaa tuuntu, ejaakɛ wɔbote naagbee be lɛ mli vii diɛŋtsɛ, ni gbɛjianɔtoo hee lɛ kã wɔhiɛ kpaakpa! Gbɛ kome ni he hiaa fe fɛɛ ni esa akɛ wɔtsɔ nɔ wɔbo Nyɔŋmɔ Wiemɔ lɛ toi ji ni wɔkane daa. Wiemɔ ni ahaa kɛtsaraa nɔ, ni yitso ji “Ná Nyɔŋmɔ Wiemɔ lɛ Kanemɔ He Miishɛɛ” lɛ kɛ gbɛtsɔɔmɔi kpakpai ha koni wɔkɛha wɔ-Biblia kanemɔ lɛ afee nɔ ni he yɔɔ sɛɛnamɔ kɛ miishɛɛ waa.
3 Hɔɔ shwane lɛ, wɔtĩ yiŋtoi ahewɔ ni esa akɛ wɔná nɔmimaa akɛ wɔyɛ naagbee gbii lɛ amli lɛ mli. Ani obaanyɛ okai enɛɛmɛi fɛɛ? Habakuk gbalɛ lɛ bafee faŋŋ Hɔgbaa leebi be mli ni wɔkase akɛ wɔgbii lɛ tamɔ egbii lɛ pɛpɛɛpɛ lɛ, ni ákɛ etsɛŋ ni nakai nibii ni ba ni he hiaa lɛ baaba beni Yehowa kpataa mɛi fɔ̃ji lɛ ahiɛ ni ehereɔ jalɔi lɛ ayiwala lɛ. Ani onu sane oti ni je kpo yɛ Biblia mli drama ni kɔɔ Yakob kɛ Esau he lɛ shishi? Esa akɛ wɔkɛ ekãa atiu jɔɔmɔi ni jɛɔ Yehowa dɛŋ lɛ sɛɛ, ni wɔte shi wɔwo nifeemɔ ni ji shikpilikpiifeemɔ kɛ sane ni kɔɔɔ mɔ he lɛ.
4 Wolo Hee ni Ekanemɔ Ŋɔɔ: Kwɛ bɔ ni wɔmii shɛ wɔhe wɔha beni wɔnine shɛ wolo hee ni ji, Bó Daniel Gbalɛ lɛ Toi! lɛ. Ŋwanejee ko bɛ he akɛ óbɔi wolo ni mli ŋɔɔ nɛɛ kanemɔ momo. Wielɔ ni jie lɛ kpo lɛ kɛɛ: “Gbalɛi ni yɔɔ Daniel wolo lɛ mli lɛ fɛɛ eba mli, ja fioo ko pɛ.” Ani no emaaa hiamɔ ni eba wɔbei nɛɛ ahe lɛ nɔ mi?
5 Kpee wulu lɛ shishi wiemɔ he gbɛjianɔtoo lɛ ewo hemɔkɛyeli ni wɔyɔɔ akɛ Nyɔŋmɔ shiwoi fɛɛ ni bako mli lolo lɛ baaba mli anɔkwale lɛ mli hewalɛ. Etsirɛɔ wɔ koni wɔya nɔ wɔjaje Nyɔŋmɔ gbalɛ wiemɔ lɛ wɔtsɔɔ mɛi krokomɛi!