Bɔ ni Aaafee Aná Nyɛmɔ ni Akɛsusuɔ Nii Ahe
1 Wiemɔ ni ji “niiahesusumɔ” lɛ shishitsɔɔmɔ kome ji “ní akɛ mɔ kroko aaawie bɔni afee ni aná enifeemɔi loo esusumɔi anɔ hewalɛ.” Bɔni afee ni oha ohe asa waa kɛya hiɛ yɛ shiɛmɔ nitsumɔ lɛ mli lɛ, esa akɛ onyɛ okɛ mɛi ni okɛkpeɔ lɛ asusu nii ahe. (Bɔf. 17:2-4) Shi te obaafee tɛŋŋ oná nɛkɛ hesaa nɛɛ?
2 Ekɛ Nii Ahejwɛŋmɔ Jeɔ Shishi: Yɛ be mli ni okaseɔ Biblia mli anɔkwalei lɛ, obaana akɛ sɛɛnamɔ yɛ he akɛ ooosusu nikasemɔ lɛ he. Kɛ etamɔ nɔ ni saji otii lɛ ekomɛi amli wa fioo lɛ, ŋɔɔ be ni okɛtao saji amli ni ojwɛŋ hetoohamɔ lɛ he. Jeee saji amlitsɔɔmɔi ni akɛha lɛ kɛkɛ esa akɛ okwɛ koni onu amɛ shishi jogbaŋŋ, shi moŋ esa akɛ onu Ŋmalɛ ni tsɔɔ sane lɛ shishi lɛ hu.
3 Hesaamɔ Kɛha Shiɛmɔ Nitsumɔ lɛ Hu Fata He: Susumɔ bɔ ni ooofee ogbála anɔkwale lɛ mli otsɔɔ gbɔmɛi srɔtoi lɛ he. Feemɔ sanebimɔ ni teeɔ sane hesusumɔ shi koni okɛtee miishɛɛ shi. Kwɛmɔ bɔ ni ooofee ni okɛ Ŋmalɛ ni gbálaa sane oti lɛ mli lɛ awo mli ni osusu he. Susumɔ saji ni abaanyɛ awie kɛte shi awo lɛ ahe, ní osusu bɔ ni ooofee ogba he sane. Tsɔɔmɔ wolo ni akɛhaa lɛ mli sane oti ni baahi fe fɛɛ.
4 Nyiɛmɔ Yesu Nɔkwɛmɔnɔ lɛ Sɛɛ: Yesu fee nɔkwɛmɔnɔ ni hi fe fɛɛ ni tsɔɔ bɔ ni akɛ Ŋmalɛi lɛ susuɔ nii ahe ahaa lɛ jogbaŋŋ. Bɔni afee ni opɛi bɔ ni etsɔɔ nii ehaa lɛ mli lɛ, susumɔ sane ni yɔɔ Luka 10:25-37 lɛ he. Kadimɔ nifeemɔ gbɛ nɛɛ: (1) Gbalamɔ jwɛŋmɔ kɛya Ŋmalɛi lɛ anɔ yɛ be mli ni ohaa mɛi asaji ahetoo lɛ. (2) Ha amɛtsɔɔ amɛjwɛŋmɔ, ni ojie amɛyi kɛ́ amɛha hetoo ni nilee yɔɔ mli lɛ. (3) Kwɛmɔ koni gbeekpamɔ ni yɔɔ sanebimɔ lɛ kɛ Ŋmalɛi lɛ amli lɛ afee faŋŋ. (4) Okɛ nɔkwɛmɔnɔ ni taa mɔ tsuiŋ atsu nii koni oná nɔmimaa akɛ anu nɔ ni hetoo lɛ tsɔɔ diɛŋtsɛ lɛ shishi.—Kwɛmɔ March 1, 1986 Watchtower lɛ baafai 27-28, kukuji 8-10.
5 Okɛ Dɛŋdade ni Akɛha Wɔ lɛ Atsu Nii: Akala Reasoning From the Scriptures lɛ akɛ shiɛmɔ nitsumɔ mli wolo ni wɔkwɛɔ mli kɛtsuɔ nii. Emli hiɛkpamɔ wiemɔi, bɔ ni ahaa mɛi ni kɛ ekãa tsĩɔ sanegbaa naa lɛ hetoo, kɛ saji otii kɛha sane hesusumɔ lɛ yeɔ ebuaa koni wɔnyɛ wɔsusu saji ahe. Reasoning wolo lɛ ji dɛŋdade ni he yɔɔ sɛɛnamɔ ni esa akɛ wɔhiɛ daa yɛ shiɛmɔ nitsumɔ lɛ mli ni esaaa akɛ wɔshashaoɔ shi akɛ wɔkɛaatsu nii be mli ni wɔkɛ mɛi gbaa Biblia mli saji. Tĩi wolo lɛ baafai 7-8 lɛ mli ni ona bɔ ni okɛaatsu nii koni ehe aba sɛɛnamɔ jogbaŋŋ kɛmɔ shi.
6 Kɛ onyɛɔ osusuɔ sane he lɛ, ebaaha ohesaa aya hiɛ yɛ shiɛmɔ kɛ nitsɔɔmɔ nitsumɔ lɛ mli. Nɔ ni baajɛ enɛ mli abaha bo kɛ mɛi ni okɛkpeɔ yɛ shiɛmɔ nitsumɔ lɛ mli lɛ ji jɔɔmɔi babaoo.